Ekitaldiz betetako egitaraua prestatu dute Muntsaratz auzoko jaietarako

Iraileko lehenengo asteburuan ospatuko dituzte urtero legez Abadiñoko Muntsaratz auzoko jaiak eta bertako bizilagunek ekitaldiz betetako egitaraua prestatu dute aurten ere.

Ostiralean arratsaldeko zazpietan altxatuko dute donien-atxa eta ondoren umeen dantza saioa hasiko da eta larunbatean izango diren paella eta tortilla txapelketetan izena emateko epea irekiko da. Iluntzeko zortzi eta erdietan parrillada egongo da eta ondoren Xaibor Dj-ak girotutako diskotekak emango die amaiera eguneko ekitaldiei.

Buruhandiekin hasiko dituzte goizeko hamaiketan larunbateko ekitaldiak eta jarraian mozorro lehiaketa abiatuko da partaideen argazkia eginez. Eguerdian puzgarriak egongo dira umeentzat eta 14.00etan paella txapelketako partaideek bakoitzak prestatutakoak aurkeztuko dute.

Bazkalostean Kondairak lagundutako ludoteka eta ‘Perudo’, ‘Jungle Spead’ eta ‘Clayoama’ren erakusketak egongo dira eta Munts kafetegian mus eta tute txapelketei ekingo diote. Umeen tailerrak, tortilla lehiaketa eta ‘Anima-t’k girotutako diskotekarekin amaituko dira eguneko ekitaldiak.

Zelai Alai hipikako ponien saioak emango dio hasiera goizeko hamaiketan iganderako prestatutako egitarauari. Ondoren buruhandien txanda izango da, xakeko aldibereko partidak jokatuko dira eta umeen herri kirolak egongo dira. Goizeko ekitaldiak bakoitzak bere erara prestatutakoarekin egingo den herri-bazkariarekin osatuko dira.

Futbito eta duatloia

Arratsaldean  igel-tokaren lehiaketa egongo da Imine kafetegian, disko txikia hasiko da  bostetan eta asteburuko ospakizunak borobiltzeko txokolatada egongo da.

Muntsaratzeko jaiak errepikapena izango dute hurrengo asteburuan eta, zapatuan, irailak 12 goizeko 10.00etan hasita, 13 urte arteko umeendako futbito txapelketa egongo da. Igandean berriz VI. duatloi txikia lehiatuko da eta bertan parte hartzeko izena eman behar da goizeko 10.00etatik 11.00tara bitartean.