Durangoko Udalak hasiera eman dio Berdintasunerako I. Barne Plana egiteko prozesuari

Durangoko Udalak hasiera eman dio Berdintasunerako I. Barne Plana egiteko prozesuari, udal langile guztiei zuzenduta. Plan honen helburua genero berdintasuna Udalaren lan-ingurunearen baitan sustatzea da, barne-politikek emakumeen eta gizonen arteko berdintasunarekiko benetako konpromisoa islatzen dutela ziurtatuz, eta, horrela, lan-ingurune berdinzaleagoa eta udal plantillako langile guztientzat errespetuzkoagoa sortzea bermatuz.

I. Berdintasun Plan hau sindikatuekin batera egingo da, plantillako ordezkariek plana garatzeko parte-hartze eta lankidetza aktiboa izango dutela ziurtatuz.

Plan hau garatzeko erabiliko den metodologia buruzagitza partekatuan, etengabeko ebaluazioan, lankidetzan eta ikuspegi feministako eraldaketan oinarrituko da. Horrela, berdintasuna modu integral batean landuko da, beti ere berdintasunaren eta errespetuaren balioekin konprometituta. Lan-prozesua hiru fase nagusitan banatuko da:

• 1. Fasea: Berdintasun Plana egiteko prozesua abian jartzea. Lehen fase horretan, lan-prozesua planifikatuko da, eta planaren garapena gainbegiratzeaz eta koordinatzeaz arduratuko den negoziazio-batzorde bat eratuko da.
• 2. Fasea: Emakumeen eta gizonen arteko berdintasunaren egoerari buruzko diagnostikoa egitea. Fase honetan, Udalak genero-berdintasunari dagokionez gaur egun duen egoerari buruzko datuak bildu eta aztertuko ditu. Lortutako datuetatik abiatuta, txosten diagnostiko bat idatziko da, sexu-jazarpeneko edo/eta sexuan oinarritutako jazarpeneko kasuak artatzeko jarduera-protokolo bat barne.
• 3. Fasea: Berdintasun Plana egitea, onartzea eta erregistratzea. Azkenik, hirugarren fase honetan, Berdintasun Plana egingo da, eta ezarritako lege eta arau-eskakizunen arabera onartu eta erregistratuko da. Plan horrek berdintasunezko lan-ingurunea bermatzeko beharrezkoak diren neurriak eta ekintzak jasoko ditu.

Gainera, Udaleko langileei zuzendutako prestakuntza-prozesu bat egingo da, langileak genero-berdintasunaren garrantziaz eta Berdintasunerako Barne Planaren printzipioez sentsibilizatzeko eta gaitzeko.

“Lan-politikak inklusiboak”

Berdintasunerako I. Barne Plana 2026ko hasierarako onartzea espero da.

Jesica Ruiz, Durangoko Udaleko Berdintasun zinegotziak nabarmendu duenez: “Berdintasunerako I. Barne Plan hau gure Udalaren konpromiso argia da lan-politikak inklusiboak eta pertsona guztiekiko errespetuzkoak izango direla bermatzeko, generoa edozein dela ere. Lan-ingurune segurua, bidezkoa eta diskriminaziorik gabea sortu nahi dugu, berdintasuna dimentsio guztietan baloratuko duena. Prozesu hori beharrezkoa da araudia betetzeko ez ezik, gizarte berdinzaleago eta bidezkoago baterantz aurrera egiten jarraitzeko ere.”