Durangoko gobernu taldeak euskara teknikari postua ezabatu nahi duela salatu du EH Bilduk

Abenduaz geroztik, Durangoko euskara teknikariak erretiroa hartu zuenetik, ez da ordezkorik bilatu lanpostua betetzeko. EH Bilduren ustez, Udalak “planifikazio falta” erakutsi du, “aspalditik ezagutzen zen” zerbait delako.

“Orain, Durangoko Udal Gobernuak Euskara Teknikariaren figura ezabatzea erabaki du. Horrela ageri da EAJ, PSE eta PPk onartu dituzten 2025eko Udal Aurrekontuetan, Giza Baliabideen Txostenak ere jasotzen du erabaki hori”.

EH Bilduk jakin duenez, Udal Gobernuaren asmoa Euskara Teknikariaren figura kentzea, eta Herritarren Batzordeko koordinazio teknikari bat sortzea da. Langile berri hau Herritarren Batzordearen eremu ezberdinen koordinazioaz arduratuko litzateke, Kirola, Hezkuntza, Gazteria, Kultura eta Euskara, besteak beste.

“Euskara teknikariaren lana kudeaketa lan soil bat baino gehiago da. Eragiletza lana izan behar da, eta orain arte bezala, Esklusiboki lan horretaz arduratuko den pertsona bat izatea eskatzen dugu. Euskara teknikariaren ardura ezin da Herritarren Saileko koordinazio teknikari baten bigarren mailako zeregin bat izan”.

Koalizio soberanistak gaineratu duenez, “ez da Udal Gobernu honek Euskarari egiten dion lehen erasoa”. Zehazki, salatu du gobernura iritsi berritan Udal Araudi Organikoa aldatu zela, eta udal barruko funtzionamenduan “euskara lehenetsia” izatetik, “gazteleraren maila berean” jartzera pasatu ziren.

“Euskararen normalizazioaren bidean asko dago egiteko oraindik, baita Durangon ere. Euskara teknikariaren figura kentzea euskararen sustapenean atzerapausoa da. Teknikaria ezabatzeak Udala eta Durango bera erdalduntzea
eragingo du”.

Azaldutako guztia “oso larria” iruditzen zaio EH Bilduri. Horregatik, dei egiten dio Gobernu Taldeari “erabakia birplanteatu dezan”.

Gobernu Taldearen erantzuna

Prentsa oharrari erantzunez, Paule Sanchez Euskara zinegotziak adierazi du Durangoko Udal Gobernuarentzat euskara sustatzea “lehentasunezko konpromisoa” da, eta, horregatik, Euskara teknikariaren postua ez da ezabatzen, baizik eta egungo beharrizanei egokitzen zaion eredu berri baten barruan berregituratzen da.

Sanchez ere azaltzen du “errigintzako koordinatzaile teknikariaren figura sortzeak ez du euskararen kudeaketa bigarren mailan uzten; aitzitik, pertsona honek euskara eta hezkuntza arloetako ardura zuzena izango du, ikuspegi estrategiko integralago batekin. Euskara oinarrizkoa da eta zeharkakotasunez landua izan dadin pausua eman da”.

Gainera, zinegotziak ziurtatu du Durangoko Udal Euskaltegiak eta AROA euskara sustatzeko plan estrategikoa garatzeko kontratatutako enpresak euskara sustatzeko “lan esanguratsua” egiten jarraituko dutela.