Durangoko GKSk gazteek
San Faustoko frontoia doan
erabili ahal izatea eskatu du

Durangoko Gazte Koordinadora Sozialistak (GKS) San Fausto auzoko frontoia “doan erabiltzeko aukera izan dezagun borrokatzeko dei egiten dugu”, eta helburu horrekin asanblada irekia deitu dute biharko, 19:00ean, kirol instalazio horren atean.

Bileran “Udal azpiegituren izaera pribatua” salatuko dute, “gazte langileon pobreziari” aurre egitearekin batera. Izan ere “Durangoko gazte langileon baldintza ekonomikoak latzak dira: gazteon erdiak ez du lanik egiten, izatekotan soldata oso baxuak ditugu eta inflazioa gora eta gora doan honetan gure kontsumo gaitasuna nabarmen murriztu da”, GKSren esanetan.

Durangon gertatzen dena mingarria egiten zaie. Izan ere, “Udal azpiegituren izaera pribatuak are gehiago sakontzen du gazteon pobretze horretan. Futbol-zelaiak, padel-kantxak, igerilekuak, frontoiak… kirol instalazioak ordainduz baino ezin daitezke erabili eta gauza bera ekimen kulturalerako espazioekin”. Hori dela eta, “gazteriak ez du ganorazko aisialdira sarbiderik”.

GKSk frontoiaren kasua jartzen du egoera horren adierazle. Udaletxeak Ezkurdi Jai-Alai berritu eta zabaldu du, baina sarrera ordainduta izan ezean “ez dago herritarrentzat erabilgarri”. Eta iaz zabaldu zuten San Faustokoan jokatu ahal izateko berriz, “orduko 1o euro ordaindu behar da. Ondorioz, gazte durangarron artean ohikoa da frontoian aritzera inguruko herrietara joan behar izatea”.