Durangaldeko bederatzi talde izango dira Merinaldeko Ezpatadantzari Egunean

Gerediaga Elkarteak, Durangaldeko dantza taldeek eta Bizkaiko Dantzarien Biltzarrak, elkarlanean, Ezpatadantzari Egunaren 42. edizioa antolatu dute Durangoko Euskal Astearen barruan.  Guztira eskualdeko bederatzi talde izango dira gaur arratsaldean.

Garaiko talde bat, Iurretako bi, Berriztik San Lorentzoko taldeko bat eta Iremiñeko bi, Durangoko Txoritxu Alaiko talde bat, eta Izurtzak eta Mañariak talde bana izango dute aurten.

Egitaraua arratsaldeko 18.30ean hasiko da, dantzariek bilketarekin udaletxeko plazan. Jarraian, kalejiran, hurbilduko dira Ezkurdi plazara. Bertan, Dantzari Dantza eta Soka Dantza edo erregelak dantzatuko dituzte.  21.30ean merkatu plazan lagun arteko afaria izango da. Ondoren, Ansorregik alaituko du erromeria.

1967an Iurretan ospatutako lehen edizioan bezala ekitaldi honen helburua ‘Dantzari dantza’ izenarekin ezagutzen den bederatzi dantzak osatzen duten multzoa ezagutzera ematea da.

Bizkaiko lurraldeetarra zabaldu

Bederatzi dantzek osatzen dute ‘Dantzari Dantza’: agintariena (lehengoa eta ikusgarriena, Durangaldeko zenbait elizatek mantendu izan duten banderak dantzarien gainean eraikitzen direlako). Jarraian zortzinangoa, ezpata joko txikia, banangoa, binangoa, ezpata joko nagusia, launangoa, makil-dantza eta txotxongiloa dantzatzen dira. Bukatzeko soka dantza edo erregelak plazaratzen dira: aurreskua eta atzeskua.

“Dantzari Dantza” edo gaur egun “Bizkaiko Ezpatadantza” izenarekin ezagututako dantzak, Durangaldean mendeetan zehar iraun ondoren, eskualdetik Bizkaiko lurraldeetara zabaldu ziren XX. mende hasieran.

Jatorrian lurralde zabalago baten dantzatutako dantzak izan omen ziren, baina XIX. mendearen bukaeran Mañaria, Izurtza, Abadiño, Iurreta, Berriz, eta Garaiko elizateetan bakarrik dantzatzen ziren. Gerediagatik azaldu dutenez, XX. mendearen hasieran, berriz, berpizkunde handi baten ondoren,  Bizkaiko lurralde gehienetara zabaldu zen, gaur egun ezagutzen dugun ikur bihurtu arte.