Pelota zuen eskuetan dago, hartu ardura!

Urtebete pasa da Greba Feminista Orokorra egin genuenetik. Urtebete, euskal gobernuei mahai interinstituzionala eskatu genienetik. Urtebete erantzunik gabe. Urtebete pelota zuen teilatuetan.

Urte gehiago daramazkigu, ordea, Mugimendu Feministatik zaintza sistema publiko eta komunitarioa aldarrikatzen eta zaintzarekin negozio egiten dutenak zuzenean interpelatzen. Argi utzi nahi dugu beste behin ere, gaur egungo Euskal Herriko zaintza erregimena ez zaigula baliagarri. Batez ere, emakume* migratu eta arrazializatuoi.

Euskal Gobernuetan dauden alderdi neoliberal ultrakontserbadoreek, zaintza lanekin negozioa egin dute eta negozioa egiten jarraitzen dute langileen zein erabiltzaileen bizkarrera. Azken hogei urteetan, sistematikoki pribatizatu dituzte ahal izan dituzten zaintza-zerbitzu publiko guztiak, enpresa lagunen eskuetan jartzeko eta horietatik milioi askoko etekinak ateratzeko, zaintzaren kalitate eza eta langileen lan-baldintzen kontura. Izan ere, pribilegio posizioetatik, botere ekonomikotik, erakunde publikoetatik, enpresa pribatuetatik, gizontasunetik, zuritasunetik… zaintzaren erantzukizunari uko egiten zaio sistematikoki.

Baina guk, behar bezain bestetan salatuko dugu, egungo Euskal Herriko zaintza sistema asistentzialista dela. Egun ditugun zaintza beharrekin alderatuz gero, gizarte zerbitzuen sarea eskasa dela, inbertsio ekonomiko gutxirekin. Hori gutxi balitz, zaintza sistema publiko eta komunitarioa aldarrikatzeko Greba Feminista Orokorra egin genuenetik, arduradun politikoek ez dute zaintza eskubide kolektiboaren bueltan antolatutako mugimendu sozio politikoa mintzaidetzat hartu ere egin.

Baina ez gara nekatuko erakunde publikoei dagokien ardura har dezatela exijitzeaz. Zaintza eskubide kolektibo bilakatuko duten neurri eraginkorrak behar ditugu orain. Beraz, mezua argia da: utzi iezaiozue zaintzarekin negozioa egiteari! Bizitza erdigunean jarriko duten politika publikoak eta urgentziazko egoerei berehalako erantzunak ematea behar dugu.

Bizitza erdigunean jarri nahi dugula diogunean, guztion bizitzak sostengatzen dituzten jardueren kontrolaz eta demokratizazioaz ari gara. Zaintza erantzukizun kolektiboa izan behar da, eta zaintza-sistema berriak bizitza sortzen den eremu guztiak egituratzeko gai izan behar du. Gizonek, ardura berezia daukate, ez zaintzeko pribilegiotik mugitu eta ardura kolektiboen alde posizionatuz. Pasibotasunak ez digu balio, eraldaketa emateko bidea orain eta hemen behar dugu.

Bihar bertan, kalera irtengo gara Euskal Herriko hiriburu eta txokoetan zaintza sistema publiko eta komunitarioa aldarrikatzeko, zaintza sistema publikoaren alde, zaintza sektoreko langileen lan baldintza duinen alde eta denon bizitza duinen alde.

Denon Bizitzak Erdigunean