“Meca Mekara”

Sosik kobratu gabe etorri zen David Meca Mekara, kirol instalazioen mekara, alegia. Eskertzekoa da igeriketan munduko txapeldunak durangora etortzeko egin zuen esfortzua. Eta eskertzekoa eta mirestekoa da baita ere, igeriketak eta kirolak herri honetan duten lekua izateko lanean aritu direnek egindako lana. Mecak Mekan inaugurazio ekitaldian esan zuen moduan, “erronkak lortzearekin amets egiten duenak, erronkak betetzea lortzen du, eta durangarrek honekin amets egin ostean zenuten ametsa bete duzue”.
 
David Meca kirol instalazioen mekan izan zela ez dut nik esaten. Komunikabideek eta agintariek esan dute. Eta badakigu ez zela inondik inora horretara etorri, baina Ahalguztidunak tenplu sakratuenean egindako bisita ematen zuen horrek guztiak. Ahalguztiduna etxera joango da, eta zeruko tenplurik sakratuenak, kirol instalazioak, hor jarraituko du, Durangon eta ez zeruan. Orduan, herritarrek erabiliko dute, eta herritarrek ez dute jainkoek erabiltzeko moduko ezer eskatuko: erabilgarria eta merkea den zerbitzu publikoa eskatuko dute, besterik ez. Itxaron duen denbora eta ordaindu duen dirua ere ez du ahaztuko, horren guztiaren ordainean zerbait lortzea espero duelako, bere neurrira eta ez jainkoen neurrira egindako zerbait.
 
Durangarrok ametsetan asko egiten dugu. Eta egongo ez den arren, Mecarekin gogoratuko gara gure herriak aurrerapausoak ematen dituenean, txikiak badira ere. Durangok konpondu beharreko erronka edo arazo ugari, txikiak baina garrantzitsuak, burutzeke dituelako. Herritarrek kirol instalazioaren meka erabili erabiliko dutelako, baina eguneroko beste hainbat arazo ere konpontzeko eraginkortasuna eskatuko diete erakundeei. Handitasunean ez baitago gobernatzearen gakoa, nik dakidala.

Julen Orbegozo, kazetaria.