AHTren kontrako mendi martxa egingo dute Atxondon

AHT Gelditu! Elkarlana plataformak, Euskal Herriko hainbat mugimendu, sindikatu eta erakunde sozialekin batera, mendi martxa antolatu du Atxondon datorren larunbaterako, AHT gelditzea exijitzeko kanpainaren barne.

Larunbateko mendi martxa AHT Gelditu Orain! manifestua eta Donostian ekainaren 13an egingo den manifestaziorekin lotutako ekimena da. Antolatzaileen esanetan, ohikoa da horrelako martxetan “azpiegitura txikitzaile honek eragiten dituen kalteak ikustaratzeko modua” izatea baina, Atxondoren kasuan, “zorionez, oraindik ez da makinarik sartu”.

Goizeko 10.00etan abiatuko den ibilaldiak, “AHTaren ‘y greko’ guztian zehar orain arte ikutu gabeko herri bakarrak” gainean daukan arriskuarekin jabetzeko aukera eskainiko du. Beraz, “kalte handiena jasoko luketen guneak“ bisitatuko dira, ume eta adinekoek ere egin ahal izango duten ibilbide erraz bat eginez.

AHTa egiteko Atxondon aurreikusten diren lanen artean, herria erdibituta utziko lukeen trazatuko zubirik handienetarikoaren berri emango da. Gainera, “bestelako obrek eragin dituzten kalteak ikusi ahal izango dituzte mendi martxara Euskal Herri osotik hurbiltzen direnek”.

“Guztion artean ozen aldarrikatzeko orain dela unea AHT behin betiko gelditzeko” asmoarekin, prestatutako ibilbidea egin ondoren, kalejira-poteoa hasiko da eguerdian trikitilariek lagunduta. 15.00etan herri bazkaria izango da eta honen ostean musika ikuskizuna eskainiko da plazan eta arratsaldeko 17.00 etan hasiko den ekitaldiak osatuko du egitaraua.