Abadiñok kirol instalazioen hobekuntzan inbertituko du, herritarren ongizatea sustatzeko

Abadiñoko Udalak berretsi egin du kirola egiteak herritarren ongizatean eta osasunean duen garrantzia, eta, ildo horretan, udal kirol instalazioen mantentze eta hobekuntzan aurrera egiten jarraituko du 2026. urtean ere.

2025eko likidazioa egin ondoren geratutako diru-gerakina kontuan hartuta, Udalak hainbat inbertsio egingo ditu, eta horietako batzuk kirol azpiegiturak hobetzera bideratuko dira. Guztira, 300.000 eta 400.000 euro arteko inbertsioa aurreikusten da lan horietarako.

Aurkeztutako ekimenen artean, Astolako kiroldegiko gimnasioa berritzeko proiektua nabarmentzen da. Indarra lantzeko ekipamendu berria erosiko da, eta ahalmen kardiobaskularra lantzeko makinak errentan hornituko dira, etorkizunean erosteko aukerarekin. Gimnasioak eta spinning jarduerek eskaera handia dute gaur egun, eta Udalak herritarrek baloratzen duten zerbitzu hori indartu nahi du. Lizitazio prozesua amaitu ondoren, instalazioa udako oporren ostean martxan egotea aurreikusten da. Bestalde, Astolako goiko futbol zelaiaren berdegunea berritzeko lanak ere egingo dira. Hainbat urte igaro dira azken berrikuntzatik, eta uda honetan aldaketa gauzatzea aurreikusten da.

Frontoiei dagokienez, Zelaietako frontoiaren teilatua berritzeko proiektua idatziko da, etorkizunean eguzki plakak jartzeko aukera aztertuz. Lanak urte amaierarako amaituta egotea espero da, eta bitartean, dauden itoginak konpontzeko neurriak hartuko dira. Horrez gain, Traña-Matienako frontoiaren egituraren egoera aztertuko du enpresa espezializatu batek, eta erabilera anitzeko gunean espazio berri bat sortuko da kirol taldeen materiala gordetzeko.

Udalak, gainera, lanean jarraituko du Bizkaiko Foru Aldundiak kirol instalazioetarako eskaintzen dituen dirulaguntzak eskuratzeko, inbertsio hauek osatu eta indartzeko helburuarekin.

Herri aktibo, osasuntsu eta bizia

Ahalegin hauek ez dira isolatuak. Iaz, besteak beste, Astolako igerilekuko arazketa sistema berritu zen, 358.000 euroko inbertsioarekin; kalistenia parkea instalatu da, eta herriko hainbat gunetan mahai-teniseko mahaiak jarri dira.

Abadiñoko Udalak azpimarratu nahi du kirola funtsezkoa dela osasuna zaintzeko, ohitura osasungarriak sustatzeko eta komunitatea indartzeko. Horregatik, herritar guztiak gonbidatzen ditu udal kirol instalazioak erabiltzera eta jarduera fisikoa eguneroko bizitzan txertatzera.

​Udalaren konpromisoa argia da: kirolerako azpiegitura egokiak eskaini, herritarren beharrei erantzun eta Abadiño herri aktibo, osasuntsu eta bizia izaten jarraitzea.