Ama izatea delitua?

Oraindik martxoaren 8an jasotako energia bor-bor dudanean,  hara non,  nire jaioterriko berri batek zeharo harritu eta sutu nauen. Hauxe heldu zait “Zornotzako enpresa batek emakume bat kaleratu nahi du ama izateagatik”.

Hau irakurri eta sinestu ezinda geratu naiz. Nola liteke horrelakorik gertatzea 2018an?  Nola da posible honelako diskriminazio egoerak jasotzea gaur egun? Onartezina iruditzen zait. Benetan. Orain dela ia 40 urte erditu nintzen lehenengoz. Hori gertatu izan balitzait? Pentsatu dut nire kautan.

Honen harira, duela zenbait egun hedabideetan jaiotze tasaren kezka azaltzen ikusi nituen  gorbatadunen  irudia etorri zait burura. Argazki hutsa? Kontu merkea? Nola animatu dira ba emakumeak ama izatera lan eskubiderik onarrizkoenak bermatzen ez bazaizkie?

Bestalde, Roberto Larrañaga Confebaskeko presidenteak bota berri duen harrikada ere ez da makala: “Gaizki ordaindutako lanak aukeratzeko joera dute emakumeek”. Edota, “emakumeentzat enpresak ez dira erakargarriak”. Zer du diskurtso honek eskubide urraketak estaltzeko hitzez haratago? Osterantzean, nola uler daiteke enpresari batek ama izateagatik emakume bat kaleratu nahi izatea?

Emakumeok,  ama izatea zigortzen den bitartean, gure babesa adieraztea eta borrokan jarraitzea beste biderik ez dugu. Hortxe ditugu, aipatutako gertaeraren aurrean Zornotzako talde feministak emakumeari babesa adierazteko iragari dituen mobilizazioak:  Apirilaren 10ean Bilboko  Epaitegi aurrean (09:30etan) eta apirilaren 14an Zornotzako Udaletxe plazan (12:00etan).

Eman diezaiogun gure atxikimendua eta babesa kaleratze mehatxua jaso duen emakumeari. Ama izateagatik ez dezatela inor diskriminatu eta baztertu. Ama izatea ez da delitua. Ama izatea aukera eta eskubidea da.

Marisa Barrena psikopedagogoa da