Iribarrea

Egunotan denbora txarraren ondorioz, pizka bat makal nabil eta ez naiz erabat osasuntsu sentitzen. Tenperatura aldaketak dakarren ondorioa izango da. Egun gutxitan, 32 gradutik 6gradura iritsi gara eta. Soinekoak eta udako sandaliak jartzetik neguko euritakoa eta botak ipintzera pasatu gara. Badakizue, eguraldi txarrak eraginda, katarroa, sudurrak sarratuta, belarrietako mina eta datozen egunetarako eguraldiaren iragarpena ikusita, tristura ere ematen du.  Egoera honetan, “Ba, zoaz medikuarengana”, esaten didate. Zertarako daude ba medikuak, anbulategia, erizainak, farmaziak? Egia da baina medikuarengana joaten banaiz, denetarik aurkituko didate eta ez dut nahi. Hau beldurra.

Bitartean, Internetan nabilela hara zer topatu didan: ”Pozik bizi zaren testa” eta gainera doanik. “Galderoi erantzun eta berehala jakingo duzu pozik bizi zaren ala ez”, eta azpian, pozik bizitzeko gizakiok behar ditugun tresnak eta aholkuak azaltzen dira. Txorakeriak baina ze demontre? Egingo dut eta kitto!

12 galdera labur azaltzen dira test honetan: kirolarik egiten dudan, erretzailea naizen, kritikak jasotzen ditudanean ia ondo edo txarto hartzen ditudan, lo ondo egiten dudan, pisua soberan dudan eta bankuko ilaran norbaitek txanda pasa egiten badit, haserretzen naizen eta ia etxekoren batek depresioak dituen.

Erantzundakoan, 12 puntutik 8 lortu ditudala esaten du inkestak. Horrela dio, “beste guztien moduen egun onak eta txarrak dituzu baina bizitza honetan pozik bitzeko aholku bat emango dizut”, irribarrea ez kendu. Barre egin denetaz eta batez ere, zutaz dio Interneten aurkitutako testak. Ondo da. Ez dut irribarrea kenduko aurpegitik. Frogatuko dut.

Hurrengo egunean, lanera joateko autoa hartu eta geldi! Errepidearen eskumako zein ezkerreko bidera begiratu eta autoak eta kamioiak gelditu barik. Uff! Zelako trafikoa dagoen. Astiro astiro joan behar eta Durangoren mugan dagoen saihesbidera iristerakoan, tona handiko kamioiak aparkaturik bazter guztietan eta dena hautsa eta hautsa. Orain dela gutxi garbitutako autoa berriro zikindu da. Ai ene, Abiadura Handiko Trena egiten ari direnez, dena hautsa, kamioiak, eta buztina bazter guztietan. Bertatik pasatzea pena ematen du.

Irribarrea joan zait Durangora iritsi aurretik. Pozik bizitzearen Testa ez dut gainditu. Agian, hurrengo batean.

Idoia Azkorbebeitia kazetaria da