Asfaltatze kanpaina San Rokebide, Madalena-Landako eta Fray Juan de Zumarragan hasiko da berriro

Egun batzuen etenaldiaren ostean, gaur, otsailak 25, berriro ekingo zaie asfaltatze lanei San Rokebide kalean, Funbarri eta Transferentzia plantaren inguruan. Ondoren, datorren astean, Madalena-Landako eta Fray Juan de Zumarraga kaleetako hainbat zati gauez asfaltatuko dira.

Lan horiek igandetik astelehenerako gauean hasiko dira eta hiru gau jarraian luzatuko dira, trafikoari ahalik eta eragin txikiena egiteko eta herritarren egunerokoan ahalik eta eragozpen gutxien sortzeko. Era berean, Muruetatorre inguruan konponketak egitea eta San Rokeburu kalean beste esku-hartze batzuk burutzea aurreikusita dago, betiere eguraldiak aukera ematen badu.

Esku-hartze berri hauek asfaltatze kanpainaren aurreko faseetan udalerriko hainbat tokitan egindako lanen jarraipena dira. Aurreko jarduketetan, Montorretako biribilgunean hobekuntzak egin ziren, Jesús María Pedrosa eta Jesús Mari Leizaola kaleen arteko elkargunea optimizatuz. Halaber, Aliendaldeko industrialdeko pasabide goratuak leundu ziren, zirkulazio arinagoa eta seguruagoa bermatzeko.

Azken fasea

Era berean, San Agustinalde kaleko zenbait zati eta Laubideta kaleen arteko biribilgunetik gertu dagoen eremua asfaltatu ziren. Intxaurrondo eta Gallanda kaleko asfaltatzea ere amaitutzat eman zen, eta konponketa puntualak egin ziren Txibitena auzoan eta San Rokeburuko garaje-sarbide batean. Gainera, Oiz kalean ere lanak burutu ziren, kanpainaren fasean aurreikusitako hobekuntzak osatzeko.

Horrela, Udala asfaltatze kanpainaren azken fasean sartu da, azpiegitura publikoen etengabeko hobekuntzarekin eta pertsona guztientzako mugikortasun seguruago, irisgarriago eta erosoagoa bermatzeko konpromisoa berretsiz.