1.800 euroko isunekin zigortu ahal dituzte Ziztada Gune Askeko bost kide

Zornotzako Ziztada Gune Askeko bost  kide daude inputatuta maiatzaren 23tik Luis Urrengoetxea kaleko lokal bat okupatzeagatik eta horren ondoren jabeak jarritako salaketagatik. Bost akusatuak irailaren 11n deklaratu beharko dute Durangoko Epaitegian eta okupazio horregatik 120 eta 1.800 euro bitarteko isunekin zigortuak izan daitezke.

Okupatutako lokalaren partaideak ez dute ulertzen jabeak “bere herrikideei salaketa jartzea” eta deia egin diote “salaketen kontua birpentsatzeko”. Gainera, “sartu ginenean bezala negoziatzeko gure borondatea azaltzen diogu”.

Ziztadako kideen esanetan okupazioa burutu eta berehala “jabearekin kontaktuan egotea eta akordio batera heltzea izan zen gure asmoa” eta “jabea lokaletik pasatu zenean denon artean hitz egin genuen”.

Baina 10 urte baino gehiago “itxita eta abandonatuta” egon zen lokaleko jabeak, “salaketa jarri zuen gure aurka eta egun bost gazte gaude inputatuta usurpazio delituarekin”. Horietako bi Ertzainak identifikatu zituen lokalean bertan eta beste hiruri zitazioa zuzenean heldu zitzaien etxera “inork lehenago identifikatu barik”.

Ziztada gune askeko asanbladak “okupazioa guztiz zilegi ikusten dugu eta ekintza kultural autogestionatuak eta merkatutik kanpokoak antolatzen jarraituko dugu”. Horretarako, garbiketa lanez gain, “apurtuta zegoena konpondu (uraren tuberiak, argiak, zorua, etab) eta egoera onean mantentzen dugu. Lokala berpiztu, erortzeko arriskutik libratu eta ziztadaz ziztada bizia eman diogu”.