Zabalik dago Durangoko Udal Euskaltegian eta AISA programan izena emateko epea

AISA programak, berriz, 60 orduko doako ikastaroa eskaintzen die, udalerrira iritsi berri diren eta euskarazko aurretiazko ezagutzarik ez duten 16 urtetik gorako pertsonei. Izen-ematea irailaren 25era arte egongo da zabalik, Euskara Sailean, Durangoko Udal Euskaltegian, Intxaurrondoko bulegoan edo 946 030 016 eta 630 474 332 telefono zenbakietara deituta.

Ikasturte berriaren hasierarekin batera, Durangoko Udal Euskaltegiak zabalik du 2026-2027 ikasturterako matrikulazio epea, irailaren 18ra arte.

Euskaltegiak askotariko profiletara egokitutako prestakuntza eskaintza du, eta A1, A2, B1, B2 eta C1 maila ofizialei dagozkien ikastaroak eskaintzen ditu. Horrez gain, talde bereziak ere antolatzen dira erretiratuentzat eta ahozko euskara praktikatu eta hobetu nahi dutenentzat.

Eskolak goizez zein arratsaldez emango dira, egoera pertsonal eta laboral desberdinak dituzten pertsonek prestakuntzan parte hartu ahal izatea errazteko.

Herritarrentzako arreta bulegoa Murueta Torren (Auzunea, 21) dago. Ordutegia astelehenetik ostegunera izango da, 10:00etatik 13:00etara eta 15:30etik 18:00etara, eta ostiraletan goizez. Horrez gain, informazioa eta izena emateko inprimakia www.durangoeuskaltegia.eus webgunean kontsulta daitezke.

Taldeen zerrendak irailaren 30ean argitaratuko dira, bai Euskaltegian bertan, bai haren webgunean.

Doakoa da eta 60 orduko iraupena du

Bestalde, AISA euskara ikastarorako izen-ematea irailaren 25era arte egongo da zabalik. Ikastaroa Durangora iritsi berri diren eta euskarazko aurretiazko ezagutzarik ez duten 16 urtetik gorako pertsonei zuzenduta dago.

Ikastaroa doakoa da eta 60 orduko iraupena du. Durangoko Udal Euskaltegian emango da, astean bitan, bi orduko saioetan. Ordutegia taldea osatu ondoren zehaztuko da.

Euskara Sailak sustatzen du ekimena, Immigrazio Sailarekin elkarlanean, eta Durangon duela gutxi finkatu diren atzerritarren hizkuntza, gizarte eta kultura integrazioa erraztea du helburu.

Informazio gehiago eskatu edo izena eman nahi dutenek Durangoko Udaleko Euskara Sailera jo dezakete, Zeharkalea, 3 helbidean, Durangoko Udal Euskaltegira, Murueta Torre auzunea 21ean edo Itxaurrondoko bulegora, Laubideta, 6 helbidean. Halaber, 946 030 016 edo 630 474 332 telefonoetara deitu daiteke.