Urkiola Landa Garapenak Damarena aurkeztu du, Angurreta Harrobian ospatuko den jaialdi berria

Urkiola Landa Garapenak (ULG) Damarena aurkeztu du, Durangaldeko landa-lurraldea eta bertako baliabide turistikoak ezagutaraztea helburu duen jaialdi berria. Lehen edizioa irailaren 20an, igandez, egingo da Mañariko Angurreta Harrobia Arte Espazioan, eta musika, artea eta bertako produktua uztartuko ditu.

Jaialdia doakoa izango da, eta udazkeneko ekinozioarekin bat eginez egingo da. Damarena izenak berak lotura egiten du lurraldearekin: Damak urtean bitan begiratzen dio haranari, eta egun horietako batean ospatuko da jaialdia.

Damarena ez da ekitaldi isolatu gisa planteatzen. Lurraldeko baliabide turistikoak aktibatu, elkarren artean lotu eta bisitariari esperientzia erakargarri bat eskaintzeko estrategiaren parte da.

ULGko presidentea den Erramun Osaren hitzetan, “Damarena lurraldeari begiratzeko beste modu bat da. Gure helburua ez da ekitaldi bat antolatzea soilik, baizik eta Durangaldeak eskaintzen dituen baliabideak, espazioak, produktuak eta kultura bisitariei erakustea. Turismoa landa-garapenarekin lotu nahi dugu, eta Angurreta bezalako lekuak horretarako aukera paregabea dira”.

Eguneko egitaraua

Goizeko 12:00etan, Iratxe Jaio eta Klaas Van Gorkum artisten “LITOLOGIKA” izeneko instalazio berria estrainekoz bisitatzeko aukera egongo da. Artistek beraiek gidatuko dute bisita, horretarako aurrez izena eman beharko da Angurretako webgunean.

Bertako paisaiak, harrobiaren historiak eta arteak elkarrekin hitz egiten dute. Bisita honen bidez jendeak instalazio berria ez ezik, espazioa bera ere beste modu batera ezagutzea dela asmoa esan du Victor Arrizabalaga sortzaile eta Angurreta Harrobia Arte Espazioaren bultzaitzaileak. Gainera, instalazio berri honen sortzaileen eskutik egingo dira bisita gidatuak.

Arratsaldean, 19:00etan, Berrizko Haize Arrosa taldeak kontzertua eskainiko du. Emanaldia berezia izango da, sorpresaz eta kolaboratzaileez betetako ikuskizuna prestatu baitute, eta EITBk grabatuko du.

“Oso berezia da horrelako leku batean jotzea”

Eneritz Gorritxategi, taldeko abeslariaren hitzetan “Guretzat oso berezia da horrelako leku batean jotzea. Musika lurraldearekin lotzea eta Durangaldeko jendearekin eta beste sortzaile batzuekin partekatzea oso polita da. Gainera, Angurretak eskaintzen duen paisaia eta giroa ez dira ohiko kontzertu-eszenatoki baten modukoak. Gainera kontzertu berezia izango da, eskualdeko, herrialdeko eta estatu mailako gonbidatuekin.”

Ikusleek eskualdeko hainbat produktu eta edari dastatzeko aukera izango dute. Horrela, tokiko produktuak jaialdiaren esperientziaren beste osagai bihurtuko dira.

Bertaratzea errazteko, etengabeko autobus zerbitzua egongo da Mañariko plazatik Angurretaraino. Jaialdiak Mañariko Udalaren eta Bizkaiko Foru Aldundiaren turismo sailaren laguntza du.

Datu praktikoak

• Angurreta Harrobia Arte Espazioa, Mañaria
• Irailaren 20a, igandea
• 12:00 — LITOLOGIKA instalazio berriaren bisita gidatua (izena eman: angurretaharrobia.com)
• 19:00 — Haize Arrosa
• Autobus zerbitzua eskuragarri
• Bertako produktua dastatzeko aukera