Elorrioko Ferixa Nausikoak antolatzen dituen jai batzordeak Berrio-Otxoa Abesbatza eta Erdella Mendizale Taldea aukeratu ditu ospakizunei hasiera emateko. Izan ere, bi taldeek beraien sorreraren 50. urteurrena ospatzen ari dira eta “oso eskertuta” hartu dute jaiei hasiera emateko ohorea.

Bi taldeek kontuan izango dituzte talde bakoitza sortu zuten pertsonak, eta udaletxeko balkoian gaur egungo partaideak eta bazkideak izango badira ere, sortzaileek jasoko dute protagonismo osoa.

Protagonistak

Abesbatzaren aldetik, “hasiera-hasieratik taldeko kideak diren Maria Angeles Egidazu, Jose Luis Agirre eta Rosi Arkarazo izango dira protagonistak, gainontzeko taldekideok ere inguruan izango bagara ere”, Susana Ruperezen esanetan. Mendizale taldearen ordezkariak berriz, “bi bazkide beterano eta beste bi gazte” aukeratu dituzte Alain Valentin taldekideak adierazi duenez.

Talde bien historia ‘ofizialak’ mende erdia bete dutela badio ere, Berrio-Otxoaren kasuan, “taldea lehenago hasi zela esan beharra dago, eta 50. urteurrena erregistratu eta legeztatu zen urteari dagokio”.

“Parrokiako korutik alde egin zuen emakume talde batek sortu zuen abesbatza, eta lehen urteetan zuzendaria Sabin Alonso izan bazen zuzendaria, Juanito Gallastegi abadeak bultzada handia eman zion”, Ruperezen arabera.

Loraldia

Erdellari dagokionez, “loraldia bizitzen ari garela esan genezake”, izan ere “Elorrioko herritarren %10 inguru taldeko bazkidea” delako, Valentinek dioenez. “Guretzat oso inportantea da hori mantentzea”.

Hala ere, Covid-19aren ondoren, ohitura aldaketa nabarmendu dute bazkideen artean. “Lehen, Erdellak zituen bazkideek asteburuko irteerak zituzten gogoko, baina gaur egunekoek nahiago dituzte eguneko irteerak egitea”.

Mendizaleek eta abeslariek ohiko zereginak albo batera utziko dituzte gaur arratsaldean, eta, tarte batez bada ere, pregoia irakurri eta txupinazoa piztuko dute. Eta eginbehar horiek, batzuentzat zein besteentzat, “ohorea izango dira”, aitortzen dutenez.

La entrada “Oso eskertuta gaude jaiei hasiera emateko aukeratu gaituztelako” se publicó primero en durangon.com.

Aitor Elordi. (Argazkia: Julen Uribe)

Aitor Elordi pelotari mallabitarrak urteko bi txapelketa garrantzitsuenak lortu ditu, Altunari buruz burukoa irabazita, eta Zabaletarekin binakakoa, Laso eta Imaz mendean hartuta. Horregatik, Mallabiko Andra Mari jaietako txupinazoa pizteko aukeratu dute.  

-Gaur arratsaldean hasiko diren jaietako txupinazoa piztuko duzu. Aurten lortu dituzun buruz-buruko eta binakako txapelketen aintzatespena da. Hala hartzen duzu?
-Bai, horrela hartzen dut, baina ez dut uste Udalak inolako zorrik duenik nirekin. Urte guztian zehar oso ondo portatu da nirekin, eta herritarrei erraztasunak eman die izan ditudan partidu inportanteetara hurbiltzeko. Hala eta guztiz, lortu ditudan emaitzei esker, txupinazoa pizteko pertsona egokiena nintzela uste izan dute. Eta alde horretatik, oso eskertuta eta pozik joango naiz herriko jaiei hasiera ematen dion ekitaldira.

-Aurtengo Andra Mari jaiei hasiera emango diezu, baina disfrutatzeko denbora gutxirekin; izan ere, bi ordu geroago partidua jokatu behar duzu herriko frontoian.
-Bai horrela da. Txupinazoa piztu eta nahiko segidan frontoira joan beharko naiz, takoak ipintzeko denbora behar izango dute eta.

-Zelan daramazu txapeldunaren elastiko gorria janzteak dakarren erantzukizuna?
-Oso polita da, baina era berean gogorra be bai. Orain arte eduki ditudan udarak ez dira hain gogorrak eta intentsuak izan. Gainera, benetan gogorra izan da aurretik izan dudan urtea, onenen kontra ibili naizelako urte osoan zehar eta exigentzia maila oso altua izan delako. Oraingo udak ez du aurrekoekin zerikusirik. Urte guztiko neke hori somatzen hasi naiz eta udan atsedenik hartzeko denborarik ez dugunez, ahalik eta ondoen eramaten ahalegintzen naiz.

-Pilotariontzat uda garaia Euskal Herriko eta inguruetako frontoietan ibiltzeko sasoia izaten da. Zelan doa zure uda?
-Aurtengo udan hemendik hara nabil eta txupinazo piztu ostean ere, frontoira joango naiz zuzenean. Uztailean 11 partidu jokatu ditut eta abuztuan beste zazpi partidu ditut programatuta. 14tik 20ra partidurik gabeko tartetxo bat dut, eta atsedena hartzeko aprobetxatuko dut.

-Beraz, herriko jaietan disfrutatzeko aukera izango duzu?
-Bai. Egun horrek lagunekin egoteko eta jaiekin gozatzeko aukera izango dut.

-Zein da zuretzat egitarauko ekitaldi erakargarriena?
-Esango nuke herriko jendearentzat paella eguna dela erakargarriena eta politena, giro ederra sortzen delako. Azken baten, oso polita da herritar guztiak plazan elkartzea bakoitza bere koadrilarekin. Giro polita sortzen da egun horretan.

La entrada “Oso eskertuta eta pozik joango naiz herriko jaiei hasiera ematen” se publicó primero en durangon.com.

Ima Escribano Kainaberako presidentea, Jose Mari Ascargorta eta Juan Mari Lersundi taldeekideak alboan dituela.

“Edozein elorriarrentzat pozgarria da Ferixa Nausiko jaiei hasiera ematea; pregoia irakurtzea eta txupinazoa piztea ekitaldi alaia delako”, Kainabera elkarteko presidentea den Ima Escribanoren esanetan. Pregoiaren mezua aurreratzerik ez badu ere, “gure kidea den Bixente Aizpuruak” irakurriko duela adierazi du, “hala erabaki genuelako taldeko kideen artean”.

Jai Batzordeak hartutako erabakiarekin, GKE elorriarrak “merezi zuen errekonozimendua izango du”, Idoia Buruaga alkatearen esanetan. Izan ere,  Kainaberak “25. urteurrena bete zuen iaz, baina pandemia zela eta Ferixa Nausikorik egon ez zenez, urtebeteko atzerapenarekin jasoko dugu aintzatespena”. Jaiak piztuko dituen ekitaldiak, gainera, “herri guztiari eta, batez ere, gurekin lankidetzan aritu diren herritarren inplikazioa” eskertzeko aukera emango die, presidentearen esanetan.

Kainabera eta Elorrioko jaien arteko harremana, ia-ia GKEaren sorreratik dator. Lehenengo ekimenetan adreiluak saldu eta eraikin bat altxatu bazuten eskola bat gauzatzeko behar zuten dirua lortzeko helburuarekin, hurrengo edizioetan puzzleak osatu eta bestelako ekimenak antolatu zituzten baliabide ekonomikoak lortzeko.

Elkartasun eguna

Azken urteetan berriz, arrakastatsua bilakatu den ‘Elkartasun eguna’ antolatzen dute jaien azken egunean. “Gure helburua, kanpotik Elorriora bizitzera etorri direnekin, beraien kulturaren inguruko zerbait antolatzea zen. Eta kulturaren elementu adierazgarrienetako bat janaria denez, beraien herrialdeetako jaki tipikoak prestatzea eta saltzea proposatu genien. Beraientzat, harremanak sendotzeko aukera paregabea zen, eta proposamena gogo honez hartu zuten”, Escribanoren esanetan.

Ferixa Nausikoetan egiten dituzten ekintzak aldatzen joan badira ere, erakundearen helburuak ere egokitzen joan dira urteak igaro ahala. Aldatu ez dena, ordea, Kainaberaren lehentasunetako bat izan da; hau da, “laguntzeko egitasmo bat aukeratzen dugunean, zuzenean kudeatzen dugu. Guk antolatutako ekitaldietan lortutako dirua edo gure bazkideengandik jasotako ekarpenak zuzenean kontrolatzen ditugu”.

Horrela egin dute Tanzanian, Kolonbian edo Nikaraguan, elorriarren laguntzarekin gauzatutako egitasmoetan. Kainaberak garatutako ekimenei esker, eskola bat, eskola-jantokia, adinekoentzako eguneko egoitza, mendiko auzo batentzat osasun-zentroa edo etxebizitzak eraiki ahal izan dira, besteak beste.

Aurtengo Elkartasun egunean lortutako dirua, Europara iristen diren errefuxiatuei janari duina eskaintzen dien Zaporeak irabazi asmo gabeko elkartera bideratuko dute. Gainera, “hemen bertan ere errefuxiatuak daudela  ikusi dugu eta, horregatik, Atxondo Harrera Herria ekimenarekin harremanetan hasi eta beraiekin kolaboratzeko asmoa dugu”.

Beste herrialde batzuetatik etorritakoei laguntzeaz gain, Kainaberak lotura zuzena du udalerriko familia behartuen artean egiten den elikagaien banaketarekin. “Jakien banaketa hilero egiten da; Udalak eta Eroskik dirua jartzen dute horretarako, eta gu erosketekin eta zuzeneko banaketarekin arduratzen gara”.

La entrada “25. urteurrenaren aintzatespena jasoko dugu Ferixa Nausikoetan” se publicó primero en durangon.com.