Saioa Garrido, Ixone Sesma eta Maider Egiraun, Durangoko Fray Juan de Zumarraga Institutuko 4. DBHko ikasleak European Statistics Competition–ESCko (Europako Estatistika Txapelketa) Estatuko fasea irabazi dute. Orain, Unai Mendiguren matematika irakasleak gidatutako taldea Europa mailan lehiatuko da.

Urtero-urtero antolatzen den txapelketak hainbat fase ditu eta parte-hartzaileek erronka desberdinei aurre egin behar diote: oinarrizko ezagutza estatistikoen inguruko azterketa egin behar dute; estatistika-iturri ofizialetan informazioa topatzeko proba; txosten estatistikoak interpretatzeko galdetegia erantzun; eta datu multzo batzuetatik abiatuta, estatistika ezberdinez bideratutako prentsa-ohar bat prestatu behar dute.

Proba guztiak ebaluatu ondoren, Durangoko Institutuko ikasleak Estatu mailako irabazleak bilakatu ziren, Bartzelonako Escola Cultural, IES Oñati BHI, Palentziako IES Jorge Manrique eta Malagako Colegio Salliver institutuen aurretik.

Sariak jasotzeko ekitaldia

Garridok, Sesmak eta Egiraunek eta Mendiguren tutoreak apirilaren 21ean (10:15etan) jasoko dituzte sariak Institutuan bertan egingo den ekitaldian, Instituto Nacional de Estadistica eta Universidad Complutense antolatzaileen eskuetatik. Ekitaldian, irabazleen senitartekoak eta 3-4 DBHko ikasleak ere izango dira.

Estatu mailako txapelketa irabazteagatik, ikasle bakoitzak 100 euroko opari-txartela, estatistika-argitalpen sorta, promozio-materiala eta diploma bana jasoko du. Irakasleak berriz, 300 euroko opari-txartela, estatistika-argitalpen sorta, promozio-materiala eta diploma jasoko ditu.

Orain, Europa mailako txapelketan lehiatzeko, bideo bat sortu beharko dute eta horretarako Institutuko euskara, ingelesa, marrazketa eta teknologia eta matematika mintegien laguntza jasoko dute. Izan ere, bideoa euskaraz egingo dute, ingelesezko azpitituluekin, eta ondoren bideoaren ekoizpena egin beharko dute, Gainera, matematika mintegitik lanketa estatistikoaren aholkuak izango dituzte.

La entrada Durangoko Institutuko hiru ikasle Europako Estatistika Txapelketako Estatuko fasea irabazi dute se publicó primero en durangon.com.

Durangoko Frai Juan de Zumarraga Institutuak Jakoba Errekondo agronomo eta paisajista ezagunaren hitzaldia antolatu du gaur arratsalderako. ‘Herri-ortuak’ ardatz izango dituen berbaldia ikastetxean bertan izango da arratsaldeko 17:30ean hasita, eta irekita dago guraso, irakasle eta ikasle-ohi eta Durangaldeko herritarrei.

Ordu bete eta erdi iraungo duen hitzaldia, ikasleen bokazio zientifiko-teknologikoa bultzatzeko helburua duen STEAM-erronka (Science/Zientzia; Technology/Teknologia; Engineering /Ingeniaritza; Arts/Humanitateak; Maths/Matematika) ekimenaren barruan kokatuta dago. Izan ere, ikasturte honetan ‘Herri-ortuak eta elikadura burujabetza’ lantzen ari dira ikasleak.

Ekimenaren abiapuntua “Institutuko dbh12-ko eraikinean, joan zen urtetik gehiago, martxan dugun teilatu berdea izan da”, ekimena bultzatu duten irakasleen esanetan.

Izan ere, dbh-ko ikasleekin batera, teilatua “herri-ortu eta herri-lorategi bihurtu genuen, eta martxan dugun herri-ortu hori ikasleen ikasgela, laborategi, hausnar egiteko toki bihurtu gura dugu, hala, zientzia, teknologia, matematika, ingeniaritza, eta humanitateak lantzeko labe propioa eta orijinala esku artean izango dugularik”.

Aurreko urteko STEAM erronketan landutako gaiak honakoak izan dira: ‘Robotika (2017-2018 ikasturte-arte), ‘Inguruko erreken uren analisia eta uraren egoera eta erabileraren azterketa’ (2018-2019 ikasturtean), ‘Teknologia Prozesuen Eguneratzea – 3D inpresioa’ (2019-2020an), ‘Aisialdiaren Kudeaketa’ (2020-2021ean) eta ‘Eraikuntza jasangarriak’ (2021-2022an).

La entrada Jakoba Errekondok herri-ortuei buruz emango duen hitzaldia antolatu du Durangoko Institutuak se publicó primero en durangon.com.