Herritar bakoitzak bi bonu eskuratuko ditu gehienez.

Atxondoko Udalak herriko merkataritza eta ostalaritza laguntzeko bonu-kanpaina jarriko du martxan bihartik aurrera. ‘Atxondo berpiztu daigun’ goiburua duen kanpainarako 8.000 euroko diru atala jarri du Udalak, 5 euroko deskontu bonuak doan banatzeko atxondarren artean.

Bonuak, gehienez bi herritar bakoitzeko, 10 eurotik gorako erosketetan erabili ahal izango dira kanpainari atxikitako saltokietan eta urte bukaera arte trukatu ahal izango dira. Edari alkoholdunak eta tabakoa erosteko erabiltzea baztertuta dago.

Ekimen honekin “herriko denda eta negozio txiki guztiei lagundu nahi diegu, bertako kontsumoa sustatu, ekonomia suspertu eta, aldi berean, herritarrei deskontu-bonu hauekin lagunduko diegu ere”, Xabier Azkarate alkatearen esanetan.

Izan ere “gaur egungo osasun-krisia hasi zenetik, Atxondoko Udalak ezinbestekotzat jo du saltokiei eta zerbitzuei eta, aldi berean, herritar guztiei lagundu ahal izatea”.

Bonuak astelehenetik agortu arte jaso ahal izango dira Udaletxean, goizeko 9: 00etatik 14:30ra.

‘Atxondo berpiztu daigun’ kanpainarekin bat egin dute Carnicería Martxel, La Kompra, Kiosko Atxondo, Aitzpe, Asun Ileapaindegia, Alboan Psiko Gunea, Arrieta Farmazia eta Oihana Kiromasaje denda eta zerbitzu negozioak, baita Olazabal Azpikoa, Biezko Baserria, Gazte Leku, Penalty, Itziar, Amillena eta Tope ostatu eta tabernak.

La entrada Merkataritza eta zerbitzuak indarberritzeko bonu kanpaina hasiko du Atxondoko Udalak se publicó primero en durangon.com.