Gaur arratsaldean hasi eta domekan amaituko da Durangon ospatuko den Zap’Ing film laburren lehiaketaren seigarren edizioa. Zapaburu konpartsak antolatutako ekimenak sormena, autogestioa eta aisialdia uztartu nahi ditu. Parte hartzaileek 42 ordu izango dituzte film labur bat egin eta aurkezteko.

Ekimena arratsaldeko 18:00etan hasiko da Plateruena Kafe Antzokian. Bertan, film laburren grabazioan jorratu beharreko gaia eta bete beharreko baldintzak azalduko dira. Lehiaketan parte hartzen duten taldeek 42 ordu izango dituzte filma pentsatu, grabatu eta ekoizteko.

Lanak domekan eguerdiko 12:00ak baino lehen entregatu beharko dira. Arratsaldean, lan guztiak ikusteko aukera egongo da Plateruenan 18:00etan hasita egingo den itxiera galan. Ondoren, sariak banatuko dira.

Izen-ematea aldez aurretik egin daiteke zapaburukonpartsa@gmail.com helbidera idatziz. Hala ere, ez da arazorik egingo bariku arratsaldean izena eman eta ekimenean parte hartzeko.

La entrada Gaur arratsaldean hasiko da Zap’Ing film laburren lehiaketa se publicó primero en durangon.com.

Berrizko Udalak San Pedro eta Santa Isabel jaietako kartel lehiaketa  martxan jarri du. Irabazleak 400 euroko saria jasoko du eta 250 eurokoa herritar batek egindako kartel onenak, beti ere irabazlea berriztarra ez bada.

Lehiaketa nahi duen orori zuzenduta dago eta kartelak, lemarekin eta egilearen izenperik  gabe aurkeztu beharko dira. Lema bera daraman gutunazal itxi batean, egilearen datuak adieraziko dira: telefono zenbakia, adina, helbidea, herria eta NAN zenbakia. Lanak Berrizko Udal Liburutegian entregatuko dira apirilaren 4ko arratsaldeko 20:30ak baino lehen.

Baldintzei dagokionez, lanen neurria 60X40 zentimetrokoa izan beharko da eta ‘San Pedro eta Santa Isabel Jaiak – Berriz 2019’ testua derrigorrez agertu behar da. Kartela, Photoshop programarekin bateragarria den euskarri digitalen aukezteaz gain, euskarri zurrunean ere aurkeztu beharko da.

Erakusketa eta bozketa

Aukeratutako lanekin erakusketa bat egingo da apirilaren 5etik maiatzaren 3ra arte. Epe horretan, berriztarren botoen bidez, saria irabazi dezaketen hiru kartelak aukeratuko dira. Irabazlea, udal ordezkari batek eta jai batzordeko lau kidek osatutako epaimahai batek hautatuko du.

Epaimahaiaren erabakia maiatzaren 11n jakinaraziko da eta sari banaketa jaietan izango da.

La entrada Berrizko San Pedro eta Santa Isabel jaietako kartel lehiaketak 550 euro banatuko ditu saritan se publicó primero en durangon.com.