Garaiko Udalak antolatutako Baserriko Produktuen Azoka egingo da domekan herriko plazan 11:00etatik aurrera. Aurten, bertan ekoitzitako produktuekin hornitutako 12 postu jarriko dira, Garaiko zein eskualdeko biztanleei “urteko sasoi berezi honetan kalitatezko elikagaiak eta produktu naturalak eskuratzeko aukera” eskainiz.

2019tik Urkiola Landa Garapenerako Alkartearekin batera antolatutako ekimenaren helburua da “bertan ekoitzitako elikagaiak ezagutaraztea eta merkaturatzen” laguntzea. Gainera, “baserriko produktuak, ekoizleak, abeltzaintza, gastronomia eta turismoa sustatzea” nahi dute.

Guztira jarriko diren 12 postuetan ardi- eta behi-gazta, ortuariak, kontserbak, garagardoa, baserriko ogia, gozokiak, txerrikiak, ahatekiak, txakolina, sagardoa, txokolatea eta eztia erosteko aukera egongo da. Taloa txorizoarekin edo urdaiarekin eta edatekoa eskainiko dituen txosna ere jarriko da.

Aipaturiko bi helburu nagusiez gain, antolakuntzak baserritarrak kalitatezko produktuak ekoiztera bultzatu nahi ditu, eta “berton ekoitzitako produktuak ardatz hartuta, elikadura-komunitatea sortzera eta indartzera” deitu du.

Euria eginez gero, azoka frontoian egingo da.

La entrada Edari eta elikagaien 12 postu jarriko dira domekan Garaiko Baserriko Produktuen Azokan se publicó primero en durangon.com.

Durangoko merkatu plazako seigarren postua irekiko da bihar arratsaldean eta saltoki berriaren eragileak eskualdeko baserritarrak izango dira. ‘Etartie’ deitu duten espazioan egongo den eskaintza “zabala eta dibertsitate handikoa” izango dela azpimarratu dute.

Ekimena “Soloko Nekazal Elkarteko hainbat kide eta merkatuan egoten diren saltzaile batzuren artean irekiko dugu”, ekimenaren bultzatzaileetako bat den Urdaspal Alberdiren esanetan.

Guztira, Durangaldeko 11 baserritar inguru izango dira eta “zerbait desberdina eskaintzeko” helburuarekin, gaur egun merkatuan dauden harategi, urdaitegi eta ozpinetakoen saltokietatik bereizi nahi dira.

Irekiko duten postuan, gertuko soloetan ekoiztutako sasoiko ortuariak eta frutak eskaintzeaz gain, salgai izango dituzte arrautzak, ogia, kontserbak, jogurta, gazta, salda eta hanburgesak, artisau erara egindako garagardoa eta sagardoa, besteak beste. Hala ere, “ez dugu salduko gurea ez den produkturik”.

Ordutegia

Irekiera, momentuz, “ordutegi mugatua baina dinamikoarekin” egiteko asmoa dute, salmentarekin arduratuko direnak baserritarrak beraiek izango direlako. Irekitzen duten egunetako ordutegia, oraingoz, 11:00etatik 13:30era eta 17:00etatik 19:30era izango da.

“Salmenta ordutegia betetzeko txandak egingo ditugu, baina gu ez gara dendariak”. Horregatik “hasieran, zapatu goizetan zabalduko dugu jendeak ezagutu dezan”, baina aurrerantzean “gure lekua betiko plazan dago eta gure produktuak han izango ditugu salgai”, azpimarratu dute.

Ekoizle guztiak: 

Bizio (Maore, Julia eta Omar-sagardoa/edarixek); Eskubaratz (Nere, Ion eta Asier-barazkiak); Urien (Aitor Urien-gazta, euskal txerriak, kasinak); Bejondeizuela (Alazne eta Jon-Ortuariak/kontserbak); Garai (Ana de la Maza-Garagardoa, kontserbak); Belaze (Berenice eta Markel-behi esnearen esnekiak/txerrikiak); Patxikobaso (Urdaspal eta Monika/Ortuariak, fruta eta ogia); Erlia (Amaia Arriaga-arrautze ekologikoak); Artizar (Román Bengoa-Ortuariak); Pulla Baserria (Fernando Lejarza-Ortuariak) eta Delikatetxe (Xabier eta Alazne-salda (kontserba ezberdinak).

La entrada Eskualdeko baserritarrek Durangoko merkatu plazako postu bat kudeatuko dute se publicó primero en durangon.com.

Gazta, txakolina, sagardoa, ortuariak, irina, garagardoa, ogia, txerrikiak, ahatekiak, askotariko kontserbak eta bestelako produktuak erosi ahal izango dira domekan Garain egingo den Baserriko Produktuen Gabonetako II. Azokan.

Garaiko Udalak eta Urkiola Landa Garapenerako Elkarteak lankidetzan antolatutako ekimena Herriko plazan egingo da goizeko 11:00etatik aurrera eta bertan 10 bat postu jarriko dira. Antolatzaileen helburua “lehen sektorea bultzatzea” eta “berton ekoitzitako elikagaiak merkaturatzen” laguntzea denez, ekimenan izango diren ekoizle guztiakGarai eta inguruko herrietakoak izango dira.

Baserritarrei eta elikagaien ekoizleei euren produktuak plazaratzeko eta saltzeko aukera eskaintzeaz gain, Garaiko Udalak herritarrei zein Durangaldeko biztanleei “kalitatezko elikagaiak eskuratzeko aukera” eman nahi die “urteko sasoi berezi honetan”. Gainera, kontsumitzaileak “bertoko produktuak erostera” bultzatu nahi dira, “baserritarrek kalitatezko produktuak ekoizteko egiten duten lana” indartzeko asmoarekin.

Emakume baserritarrak

Edizio honetan emakume baserritarren lana ikusarazteko ahalegina egin nahi du Garaiko Udalak eta helburu horrekin panel handi batzuk jarriko dira Azokaren eremu desberdinetan, non emakume baserritarren irudiak eta esaldiak azalduko diren.

Osasun agintariek ezarritako aginduak betetzeko, antolatzaileek zirkuitu bat antolatu dute, nahitaez segitu beharko dena. Hurreratzen diren pertsonek maskara erabili beharko dute eta, zirkuituaren toki desberdinetan, eskuak garbitzeko gela egongo da eskuragarri.

La entrada Garaiko Gabonetako II. Azokan baserriko produktuak eskainiko dituzten 10 postu izango dira se publicó primero en durangon.com.

Erroskilak eta opilak, kordelak, taloa, sagardoa eta txakolina izango badira aurten ere San Blas egunean Abadiñoko Zelaieta auzora gerturatzen diren ia guztiek dastatu edo erosiko dituztenak, eraberritutako Ferialekuan zein inguruetan barreiatutako do­ze­­­naka postuak bisitatzea ezinbestekoa izango da.

Trinketearen aparkalekuaren inguruan jarriko diren 90etik gora erakusmahaietan benetako ‘zero kilometro’ko ortuari eta fruituekin batera, eztia, ogia, gozokiak, gazta, sagardoa, txakolina eta bestelako elikagaiak egongo dira eskuragai. Inguruan izango dira ere 16 mintegizain ere.

Solozabal kalean jarriko den abelburuen erakusketan ere gertu-gertuko eta arraza garbiko abereak nagusituko dira. Bataz beste, 250 bat behi, idisko, txahal, mando, asto, zaldi, pottoka, ahuntz edo ardi egongo dira ikusgai, gehienak Abadiñokoak eta inguruetakoak.

Abelburuak hiru karpa handitan kokatuko dira. “Karpa batean herriko ganaduzaleak egongo dira arraza desberdineko 60 abelburu ingururekin; beste karpa baten Bizkaiko eta Euskadiko arraza garbiko animaliak egongo dira; eta hirugarren karpan azpi-gorri ahuntzak, ardiak eta zaldiak egongo dira”, Mikel Garaizabal, Abadiñoko alkatearen arabera.

Artisauek zein makineriak eta tresneriak ere beraien tokia izango dute San Blas eguneko azokan. Eskulangin­tza arloko 26 erakusmahai jarriko dira Arbaso elkartearen laguntzarekin Txanporta plazan eta alboko kaleetan. Gaztañodi eta Iturritxo kaleetan berriz makinaria, uhalgintza zein burdin edo zurezko tresneriarekin gerturatuko diren ia 30 enpresa eta saltzaile kokatuko dira.

Autobusak Matienatik

Mikel Garaizabal alkateak eta Francisco Javier Crespo zinegotziak aurkeztu dute aurtengo San Blas feriaren egitaraua.

Eguneko egitaraua Txanbolin txistularien kalejirarekin hasiko da goizean goiz, eta 11:00etan meza nagusia ospatuko da San Trokaz elizan eta eraso sexisten kontrako Beldu Barik Gunea irekiko da Txanporta plazan.

Bertsolariek jarriko dute giroa eguerdi aldean, Ferialeku plazan abestuko baitute Garikoitz Sarriugartek eta Txaber eta Bittor Altubek, Aitor Bizkarrak proposatutako gaiei erantzunez.

Ordu berean hasiko da herri kirolen ekitaldia probalekuan, saioan hiru proba jokatuko direlarik. Alde batetik, Ugaitz Muguerza II.ak eta Julen Alberdi Txikia IV.ak Iker Vicente eta Jesus M. Mujikarekin neurtuko dituzte indarrak ‘Urrezko Aizkolariak-Eusko Label Saria’ txapelketako gizonezkoen binakako norgehiagokan; Irati Astondoa eta Maika Ariztegi berriz, aurrez aurre arituko dira ‘Urrezko Aizkolariak’ txapelketako emakumeen banakakoan. Azken saioan, Julen Diazek eta Jokin Eizmendik nor baino nor gehiago arituko dira harri handiekin ‘Urrezko Harrijasotzaile’ak txapelketa­ko ekitaldian.

Arratsaldeko idi-proba saioa­rekin eta Lotxo taldeak girotuko duen erromeriarekin osotuko da eguneko egitaraua.

Abadiñoko Udalak 9:00etatik 15:00ak bitartean Matiena eta Zelaieta etengabe lotuko dituen autobus zerbitzua jarriko du lehenegoz, batez ere “trenean datozen pertsona nagusiei edo mobilitate murritza duten pertsonei San Blas feriara gerturatzea errazteko asmoarekin”, Garaizabalen esanetan. Zerbitzua doan izago da eta geralekuak Matienako eskolan eta Zelaietan dauden geltokiak izango dira.

Ekitaldi ugari giroa emateko

Astelehenean ospatuko bada San Blas eguna, gaurtik otsailaren 15era bitartean iraungo duen jai egitarau zabala prestatu du Abadiñoko Udalak. Ospakizunak hasteko, San Blas 2020 pilota txapelketa, garagardo dastaketa eta parrilada eta Maialen Lujanbio eta Unai Iturriaga bertsolariak girotutako bertso-afaria egongo dira gaur arratsaldean.

Bihar berriz, Igor Galar­tza eta Bittor Altube bertsolariek girotutako bertso-triki-poteoa egongo da arratsaldean eta gauean Alerta eta Rukula taldeez gain DJ ‘El Txef-a’ren saioak egongo dira.

Martitzenean, otsailaren 4an, Santa Agedaren koplak abestuko ditu kalerik kale Abadiñoko Done Zezili abesbatzak. Otsailaren 7tik 10era berriz, idi-probako saioak egongo dira.

Umeek izango dute protagonismoa hurrengo asteburuko egitarauan. Zapatuan, otsailaren 8an, beraientzat egokitutako jolasak izango dira Zelaietako frontoian eta hurrengo egunean Tor magoak ‘Amarru’ ikuskizunaren bi saio emango ditu Txanporta Kultur Etxean. Domekan, gainera, San Blas 2020 Pilota Txapelketako eskuz binakako finala jokatuko da 10:30etatik aurrera Tornosolo trinketean.

Otsailaren 15ean jokatuko da Burduntzi bildots txapelketaren XXXII. edizioa, eta goizean zehar txakoli dastaketa ere egongo da. Eguerdiko bildots bazkariarekin osatuko da azken eguneko egitaraua.

Bestalde, San Blas jaiak 2020 argazki lehiaketako erakusketa Errota Kultur Etxean egongo da ikusgai otsailaren 28tik martiaren 13ra bitartean.

La entrada Abadiñoko San Blas eguna, benetako zero kilometroa se publicó primero en durangon.com.