Euskal kulturaren erakusleiho erraldoia izanik, Durangoko Azokaren bokazio nagusienetako bat kultur sorkuntza zein zaletasuna hauspotzea eta sortzaile, bitartekari eta herritarren arteko zubi lanak eraikitzea da. Helburu horrekin abiatu zen 2020an ZuNonHanDA! ekimena eta, helburu horretan sakontzeko asmoz, aurten, Durangoko Azoka baino lehenago antolatzea erabaki da, bertan egiten diren liburu aurkezpenek are ikusgarritasun gehiago izan dezaten.

ZuNonHanDA! egitasmoari esker, Euskal Herri osoko 19 dendatan, Durangoko Azokan eskuragarri egongo diren liburu berrien aurkezpenak egingo dira. Aurkezpen horiek formatu askotarikoak izango dira eta idazlea beti egongo da presente.

Nobedadeak 67 libutu saltokietan

Horrekin batera, 60. Durangoko Azokan plazaratutako nobedadeen sortak Euskal Herri osoko 67 liburu saltokitan izango dira eskuragarri. Beraz, datorren astetik hasita, Durangoko Azoka ibiltaria izango da eta hartzaileen herrietara zuzenean helduko da.

Ekimen honen asmoa ez da soilik Durangoko Azokaren oihartzuna Euskal Herri osora zabaltzea; liburu saltokiek urte osoan zehar egiten duten lana aitortzea ere bada xedea. Horregatik, Durangoko Azoka Kulturaren Jaialdia den heinean, Durangoko Azokan batuko den indarra Euskal Herriko dendatara barreiatuko da.

Durangaldeko aurkezpen bakarra hau izango da:

Idazlea: Uxue Alberdi

Izenburua: Esne-berriketan

Hizlariak: Uxue Alberdi eta Miren Amuriza

Aurkezpen mota: Irakurraldia

Eguna: Abenduaren 1a

Ordua: 19.00

Saltokia: Hitz Liburudenda (Durango)

La entrada Lehenbizikoz, Durangoko Azoka baino lehen egingo da ZuNonHanDA! azoka ibiltaria se publicó primero en durangon.com.

Herritarren hizkuntza ohiturak aldatu eta euskararen erabilera handitzeko helburua duen Euskaraldiak, hirugarren edizioa egingo du azaroaren 18tik abenduaren 2ra. Euskal Herri osoan egingo den ariketa sozial erraldoia Durangon ere egingo da eta horretarako Euskaraldiaren batzordea sortu zuten hainbat eragilek.

Durangon, Euskaraldiaren batzordea martxan ipini berri dute edizio honen lanketari ekiteko, eta lehen pausua “durangarrei hirugarren edizioaren aurkezpena egitea izango da, batzar ireki baten bidez”, lantaldearen esanetan.

Aurkezpen ekitaldia bihar izango da, arratsaldeko 19:00etan Udal Euskaltegiko Berbagunean (Saibi kalea, 10) eta bertara durangar guztiak daude gonbidatuta. Eragileek “dei berezia” luzatu diete “herriko elkarte eta taldeetan parte hartzen dutenei, horien parte hartzea eta harremana garrantzitsua izango delako Euskaraldiko edizio berria arrakastatsua izan dadin”.

Bilera horretan, alde batetik, Euskaraldiko edizio honen nobedadeak eta nondik-norakoak azalduko dira, eta bestetik, Durangon herri batzordeak egin beharreko lanak zeintzuk diren azalduko da, eta interesa duenak bertan zelan parte hartu edo lagundu dezakeen.

Edizio honek bat egingo du aurreko edizioetako helburuekin; hau da, hizkuntza ohiturak aldatu, ahalik eta euskarazko hartu-eman gehien sorraraziz egun horietan, eta aurrerantzean ere ohitura horiei eustea.

La entrada Hirugarren Euskaraldia aurkeztuko dute bihar Durangoko eragileek se publicó primero en durangon.com.