Lanku eta Mundukideren ekimenez eta Eider Eibarren ilustratzailearen laguntzarekin, Amurizak Mozambikeko eskualde bateko errealitatea gerturatuko du. Iragarritako saio bietan, bertan bizi izandakoa eta ikusitakoa islatuko du bertso, testu eta ipuinetan oinarrituta.

Ekitaldian kapulana bat zabaldu eta bertan goldetako kantu, kontu eta irudiak aterako dituzte. Mozambikeko lurrazalaren historiatik abiatuta, emakumeen eskuetako azal zimurrak irakurtzerainoko bidaia egingo dute.

‘Kapulanak’ Mozambikeko emakumeen oihal koloretsuak dira eta hainbat gauzetarako erabiltzen dira, besteak beste, soineko moduan, haurrei lepoan eusteko, jana biltzeko edota etxeak apaintzeko. “Hain dira erabilera anitzekoak, ezen edozer aurki baitaiteke zapi handion estalpean”, emanaldia ekoitzi dutenen arabera.

‘Kapulana bat zintzilik’ “ez da abentura baten kronika izango, ezta Gobernuz Kanpoko Erakunde baten hitzaldia ere. Ekoizleen arabera, emanaldia osoa “hausnarketa txikiz eta galdera handiz jositako kontakizuna” izango da.

La entrada Mozambikeko errealitatea gerturatuko du Miren Amurizaren ‘Kapulana bat zintzilik’ emanaldiak se publicó primero en durangon.com.