Buzkantz kaleko lursaila bisitatu ahalko da datorren zapatuan, Aste berdearen ekimenaren baitan.

Elorrioko Udalak ekainaren 1etik 11ra bitartean antolatutako Aste Berdearekin ospatuko du aurten Ingurumenaren nazioarteko eguna. Ekimenaren helburua “ingurunea zaintzeak duen garrantzia”  gogoraraztea da.

Aste berdearen baitan antolatutako lehen ekitaldia bihar, arratsaldeko 19.00etan, Iturri Kultur Etxean eskainiko den hitzaldia izango da. Arantza Royuelak emango duen berbaldian ‘Liztor asiarra’ izango da hizpide.

Bi saio prestatu dira eguenerako. Goizean, herriko ikastetxeetako ikasleek ‘Olio birziklapena’ri buruzko saioak izango dituzte.

Arratsaldeko 19.00etan, Iturri Kultur Etxean, ‘Eraikuntza ekoeraginkorra’ri buruz mintzatuko dira Eiser eta Ekidom enpresetako Mikel Amiano eta Josu Salazar. Solasaldian, eraikitze sistema ekoeraginkorraz gain, energia berriztagarriei buruzko informazioa ere emango.

Tomate landareak opari

Ingurumenarekiko konpromisoa eta kotxe beraren erabilera partekatua izango dira barikurako antolatutako ekitaldien ardatzak. Goizeko 10.00etatik 13.00etara konpost eta tomate landare banaketa egingo da Herriko plazan eta hauek eskuratzeko beharrezkoa izango da ingurumenaren aldeko konpromiso bat hartzea.

Arratsaldeko 19.00etan, Iturri Kultur Etxean, kotxea konpartitzeko ‘Lagunkar’ ekimenari buruz mintzatuko da Iker Maguregi.

Buzkantz kaleko lursaila bisitatu eta gune horretan zer egin daiteken proposatzeko aukera izango dute herritarrek, zapatuan. Bisitak 10.00etatik 20.00etara izango dira, Buzkantz kaletik sartuta, eta ingurunea ezagutzeaz gain, herritarrek proposamenak egiteko aukera izango dute. Gainera, goizeko 11.30etatik 14.30era Circomotik jolasak izango dira Buzkantz kalean.

Ingurumenaren nazioarteko eguna ospatzen den ekainaren 5an, herriko Naturbideak ezagutzeko aukera egongo da. Herriko plazan goizeko 10.00etan hasiko da ekimena eta, partaideak taldetan banatu ondoren, bakoitzari dagokion tramoan “dauden hobetu beharreko puntuak identifikatzen” saiatuko da.

Ortu agroekologikoak

Aurtengo Aste berdea ‘Ortu agroekologikoak nola eraiki feminismotik’ ekimenarekin ostuko da. Hiru egunetan gauzatuko den tailer teorikoa eta praktiko horretan “agroekologia etaekonomia feministaren inguruko kontzeptuak jorratuko ditugu”, antolatzaileen esanetan. Gainera “konposta edota landareen zaintzarekin, adibidez, jarduera praktikak” egingo dira.

Burujabetzaren aldeko mugimenduaren partaidea den Esti Redondok emango duen ikastaroa  ekainaren 6an eta 8an, arratsaldeko 17.00etatik 20.00etara, eta 11n, 10.00etatik 14.00etara, izango da.

Ekimen honetan parte hartzeko beharrezkoa da aldez aurretik izena ematea, genero.teknikaria@elorrio.net helbide elektronikoan edo 946582712 telefonoan.

La entrada Aste osorako antolatutako ekitaldiekin ospatuko da Elorrion Ingurumenaren nazioarteko eguna se publicó primero en durangon.com.