Elorrioko Zenita auzoan dagoen Argiñetan, Kofradi jaiak ospatuko dituzte abuztuaren 4tik 7ra bitartean, eta ohiko Kofradi bazkariaz gain, erromeriak, bertsolariak eta rock kontzertuak egongo dira, besteak beste.

Ospakizunak barikuan hasiko dira ohiko afariekin eta 22:30etik aurrera Eingo taldeak girotuko duen erromeriarekin.

Zapatuan Kofradiaren bazkaria egingo da 14:00etan hasita. Aurretik, meza egongo da 12:30ean eta egun guztian zehar trikitilariek alaituko dute nekropoliaren ingurua. Iluntzean, ohiko afariak dastatzeko aukera egongo da, eta afalostean Gauargi taldearekin erromeria eta bolo txapelketa egongo dira.

Eguerdian egingo den eliza ospakizunarekin eta jarraian auzoko dantzari zaharrak eskainiko duten saioarekin abiatuko dira domekako ekitaldiak. Arratsaldean umeentzako puzgarriak eta bitsaren jaia egongo dira, eta 20:30etik aurrera Amets eta Maddalen Arzallus bertsolarien ekitaldia egongo da.

Argiñetako ospakizunak astelehenean amaituko dira. Eguerdian paella jana egongo da eta 22:30ean hasita kontzertua eskainiko dute Estutu eta Kokatu taldeek.

La entrada Eingo eta Gauargiren erromeriak, bertsolariak, Estutu eta Kokatu egongo dira Argiñetako jaietan se publicó primero en durangon.com.