Alderdi soberanistak egindako proposamenaren arabera, kirol-gune handi hori Tantora eta Ixer artean jarri daiteke, Lidl saltokiaren atzealdeko lursailean hain zuzen.

Azpiegitura hori gauzatzeko “Urgozo eraikitzeko eta Gane eraberritzeko aurrekontua” erabiltzea proposatzen dute, guztira, 10 milioi euro inguru. Gainera, “gune horretan eraiki beharreko azpiegiturak, Zornotzako klubekin eta kirol talde ezberdinekin elkarlanean landu beharko litzatekeela” uste dute.

EH Bilduren arabera “Urgozo kiroldegia saskibaloi taldeei zuzendutako pabilioia izango da eta aurten 5,5 milioi gastatuko dituzte bere eraikuntzan”. Ganeko kirol gunean berriz, 4,5 milioi euro gastatuko dira padel eta tenis kantxak egiten.

22 milioi

Kirol instalazioen inguruko ekarpena egiteko, Udalak aldez aurretik egindako inbertsioak ere kontuan izan dituzte. 2010ean 10 milioi euro bideratu ziren Larreako kiroldegia eraberritzeko “hasiera batean 4 milioiko obra izango zela aurreikusi bazuten ere” eta “berehala txiki geratu zen”. 2011n “beste 2,2 milioi gastatu zituzten Jauregibarriako frontoia eta bolatokia egiteko”.

Horri guztiari “Ixarreko kiroldegia bota egingo dutela” gehitu behar zaiola gogoratu dute.

“Hamar urtetan, guztira, 22 milioi eurotik gorako gastua egingo du Udalak eta duela hamar urteko arazo berdinekin segitzen dugu”, EH Bilduk egindako kontuen arabera eta arlo horretan “ezer gutxi hobetu da”.

Gainera, “kirol zerbitzuetan herritarren beharrizanak zeintzuk diren jakitea ezinbestekotzat” jotzen dute, eta horretarako “ikerketa bat egin beharko litzateke”, herriko kirol eragileak eta herritarrak “kontuan hartuta soilik lortu daiteke Amorebieta-Etxanok kirolaren arloan dituen beharrizanak asetzea”.

La entrada Zornotzako kirol azpiegitura ezberdinak gune handi batean batzea eskatu du EH Bilduk se publicó primero en durangon.com.

Mañariko Udalak kirola egiteko zein beste ekintza batzuk aurrera eramanteko espazio berriak sortuko ditu frontoian. Udaletxean egindako azken udalbatzan, aho batez onartu zuten frontoian egingo diren handitze lanak, 174.861,87 euroko aurrekontua eta egitasmoa aurrera eramateko plegua.

Toki polibalentea sortzeko lanak aurrera eramateko epea hiru hilekoa izango da eta “gabonetarako lanak amaituta egongo dira”, Endika Jaio alkatearen esanetan. Ekimen horren bidez “herriak kirol eta aisialdi jardueretarako espazioetan duen defizita” konpondu nahi da, nahiz eta sortuko diren guneen erabilera udazkenean herritarrek egingo dituzten bileretan erabakiko den.

Aurreikusitako lanak frontoiaren goialdean dagoen pasabidean eragingo dute gehien bat. Proiektuaren arabera, gaur egun ia erabiltzen ez den pasarela horri eranskin bat gehituko zaio plaza aldera. Gainera, beheko solairuan sortuko den espazioa ere erabilgarria izango da.

Udalak eskaintzen dituen zerbitzuen artean “kirol eskaintza egokia izatea gero eta garrantzia handiagoa hartzen ari da, udalaren egitekoetako bat bizi eredu osasungarriak bultzatzea delako, eta kirola osasunarekin lotzen baita”, azpimarratu du Jaiok. Horregatik, “Mañariko Udalaren helburuetako bat bizi eredu eta herri eredu horretara gerturatzen lagunduko digun ekipamendu bat ahalbidetzea da”.

Herri txikia eta baliabide ekonomiko urriak dituen udala izanda ere, “ez dugu ekipamendua erabilera mota bakar batera mugatu nahi; aktibitate ezberdinak jasan ditzakeen toki polibalentea sortzea nahi dugu”, azpimarratu du Jaiok.

Lanak egiteko prest dauden enpresak, 20 egun izango dituzte euren eskaintzak aurkezteko, lizitazio-iragarkia kontratazio profilean argitaratu eta hurrengo egunetik aurrera kontatuta.

La entrada Mañariko Udalak 175.000 euro inbertituko ditu frontoian kirol gune berriak sortzeko se publicó primero en durangon.com.