Zelaietako mugikortasunaren berrantolaketaren inguruan, Udal Gobernuak “iruzurra” egin diola herritarren parte hartzeari salatu du Abadiñoko EH Bilduk, “behin betiko erabakia aldez aurretik hartuta” zeukatelako. Izan ere, maiatzaren 3an egin behar zen Hirigintza batzordea egin aurretik, “Iturritxo kalean heziak jarri eta lurra margozten hasi ziren”.

“Apirilaren 26an udaletxetik ‘Girder’ enpresako teknikariak jarri zituzten auzotarren iradokizunak jasotzeko, eta maiatzaren 2an, EH Bildutik ere parte hartze saio bat egin genuen Txanportan. Batzordean, auzotarrek egindako proposamenak biltzen zituen dokumentua eman ziguten, eta guk geuk jasotakoak ere aurkeztu genituen”, oposizioko alderdiak dioenez.

Txostenak ez du proposamen bat bera ere kontuan hartzen, “eta ezezkoa emateko teknikarien inolako argudio jaso gabe, hasierako plano berarekin ari dira Zelaieta moldatzen”.

Jarduera hori “oso larria da” zinegotzi soberanistentzat, “egunerokotasunean Zelaietatik mugitzen diren herritarren iritzia” ez delako kontuan hartzen. Gainera, Udal Gobernuak alde bakarrez horrelako neurriak hartzea, eta aldi berean parte-hartzea egon den itxura egitea, oso larria dela uste dute. Horregatik, “herritarron haserrea nabaria da”.

La entrada Zelaietako mugikortasunaren inguruko parte hartzea “iruzurra” izan dela dio EH Bilduk se publicó primero en durangon.com.