Aurtengo Ibilaldiaren antolatzaileen arabera “emozio bat transmititu” eta “gauzak egiteko gogoa” azaldu nahi duen bideokliparen grabaketa eta edizioa Kimetz Blancok eta Imanol Garaizabalek egin dute eta dronarekin berriz, Aritz Kortazar aritu da.

Irudietan agertzen diren Txintxirriko ikasle, gazte, irakasle, guraso, ikasle ohi, guraso ohi eta urrunagoakoekin batera, ikastolak eskaintzen dituen hainbat baliabide erakusten dira, edizio honetarako egindako kantaren erritmora.

‘Hel Horri’ kantaren hitza Itsaso Basaurik, Haritz Luzarrek eta Iraitz Erkiagak idatzi dute eta kantaren grabaketan Mockers taldeko Asier Elias, Urkotxo txaldeko Urko Igartiburu, Han taldeko Gorka Molero, Sugoi taldeko Mikel Quesada, Oxabi taldeko Eneko Arraibi eta Adrian Lopez, Hayatola taldeko Iñigo Arruabarrena, The Galampers taldeko Itziar Azkarate, Puro Txileko Mamen Rodrigo eta Zoe Igartiburu izan dira.

Leloa eta logoa

Ikastolako familiak egindako lan saioetatik sortutako ‘Hel Horri’ leloaz gain, hiru elorri zuhaixka islatzen duen logoa ere aukeratu dute aurtengo Bizkaiko ikastolen jaiaren ezaugarri. Leloarekin zein logoarekin “Elorrio herriak elorriari zor diola izena” kontuan hartu dituzte.

Elorrioko ikastolak 50 urte bete zituen iaz eta aurten antolatuko duen Ibilaldia bere historiako hirugarrena izango da, 1999koa zein 2006koak herrian egin baitziren.

Oraingoan ere Txintxirri ikastolaren ​hezkuntza eredua ezagutzera ematea; erronka berriei aurre egiteko ​baliabideak eskuratzea edo herriko eragile eta taldeekin ​harremanak sendotzea dira Ibilaldiaren helburu nagusiak.

Antolatzaileak, hala ere, euskararen sustapena bultzatzea; sexu eta generoari lotutako rolak gainditzea; prestatuko diren ekintza guztietan jasangarritasunaren ikuspuntua izatea; ikastolako eta herriko eragile guztien arteko prozesu parte hartzailea gauzatzea; edo behar desberdinetako pertsonentzako Ibilaldia diseinatzea, izango dira aurtengo erronketako batzuk.

La entrada Elorrion aurten ospatuko den Ibilaldiaren bideoa aurkeztuko da arratsaldean Herriko plazan se publicó primero en durangon.com.

‘Hel Horri’ goiburuarekin ospatuko da Elorrion 2020ko Ibilaldia eta ekimen horren harira hainbat ekitaldi antolatu du Txintxirri Ikastolak. Zapatuan, esaterako, ‘Erroa eta geroa’ dokumentala emango da Arriola Antzokian, arratsaldeko 18:30ean hasita.

‘Erroa eta geroa’ dokumentalak emakumeak baserrian historikoki izan duen garrantzia agerian jartzeaz gain, gaur egun belaunaldi berriek baserri munduan hartu dituzten bide ezberdinak aztertzen ditu.

Emakumeak egindako pelikula honetan emakumeak dira protagonista eta iragana eta geroa uztartzen ditu. Iparraldetik Hegoaldera, emakume baserritarrek bere lanaren inguruko hausnarketak, kexak, kritikak eta bizipenak kontatzen dituzte dokumentalak irauten dituen 30 minutuetan zehar.

Sorginatxurrak taldeak ekoiztutako dokumentalean ikerketa, ekintza eta partaidetza bateratzen dira eta berau egiteko bultzada Baserritik Mundura ekimenaren bigarren edizioan jaso zuen.

Proiektuaren egileak Arriola Antzokian egongo dira egindako lana azaltzeko eta hurbiltzen direnen galderak erantzuteko prest.

La entrada ‘Erroa eta geroa’ dokumentala eskainiko da zapatuan 2020ko Ibilaldiaren egitarauaren baitan se publicó primero en durangon.com.