Unai Iturriaga, Amets Arzallus, Andoni Egaña, Etxahun Lekue, Oihana Iguaran eta Jexus Mari Irazu egongo dira gaur San Agustinen.

Durangoko San Fausto jaiak azken txanpari ekingo diote gaurtik aurrera eta eguneko ekitaldi aipagarrienetarikoa gauean egongo den bertso ekitaldia izango da. San Agustin Kultur Gunean izango den saioa heldu aurretik, egunean zehar egongo diren hainbat ekitaldiekin gozatzeko aukera egongo da.

Goizean zehar, nagusientzako prestatutako mendi ibilaldiaz gain, Ezkurdin jarritako birziklapen komunikazio kanpainaren standa bisitatzeko aukera egongo da. Arratsaldean berriz, Gurutze Gorriaren ate irekien jardunaldia egongo da plaza berean.

Txosnagunean arratsaldeko 18:00etan hasiko den tortilla txapelketa girotzeko, bertso rap doinuak izango dira entzungai. Lehiaketa horren sari banaketaren ostean ginkana feminista egongo da.

Arratsaldean zehar antzerkia eta umorea uztartzen dituen El Gran Dimitrik ‘Crikusz Rupt’ ikuskizuna eskainiko du 18:30etatik aurrera Musika Eskolako Aurora Abasolo parkean eta ordu bete geroago ekialdeko dantzak gerturatuko ditu Khuzayma taldeak Andra Mariko elizpera. Toki horretan, baina gaueko 22:00etan, Asier Bilbaok eskainiko duen ikuskizuna hasiko da.

Zoo-ren kontzertua Kurutziagan

Gaueko 21:00etan, jaietako kontzertu nagusia abiatuko da Kurutziagako agertokian. Ekitaldian, rap, tekno, breakbeat, reggaeton, rock eta bestelako doinuak eskainiko dituen Zoo talde valentziarra; hardcorea oinarri duten Eat My Fear alemaniarrak; punk erritmoak eskainiko dituzten Genderlexx madrildarrak eta Godoys talde bilbotarra igoko dira oholtzara.

Gaueko 22:30ean San Agustin Kultur Gunean hasiko den ekitaldian, 2013an Euskal Herriko Txapelketa irabazi zuen eta aurtengo Txapelketa Nagusian titulua defendatuko duen Amets Arzallus hendaiarra izango da. Berarekin batera, Unai Iturriaga durangarra, lau aldiz Euskal Herriko txapela jantzi duen Andoni Egaña zarauztarra eta egungo Bizkaiko txapelduna den Etxahun Lekue ere izango dira. Seikotea Oihana Iguaran eta Jexux Mari Irazu gipuzkoarrak osatuko dute eta gai-jartzailea Jon Zaldua izango da.

Ohikoa denez, jaietako bigarren zapatuan ospatzen den mozorro eguna izango da bihar eta eguneko egitaraua goizeko 7:30etako Zezen dira-rekin hasiko da.

La entrada Jaietako bigarren asteburua bertso doinuekin abiatuko da se publicó primero en durangon.com.

San Fausto egunean aurekeztuko ditu Storm taldeak ‘Over the bridge’ diskoko kantuak.

Polemikak polemika, Kurutziagan kokatuko da aurten Sanfaustoetako jai-eremu garrantzitsua den txosnagunea. Txosna Batzordean bildutako 14 taldeek Udalak hasieran proposatutako lekua erabiliko dute, adostutako gune desberdinen arteko errotazioa baliatuta.

Txosnagunean eskainiko den egitarauak San Faustoetako programa osotuko du, Kurutziagan bertan zein herriko beste leku batzuetan burutuko diren ekitaldiekin. Egitarauan iragarritako lau kontzertuak eta erromeria nabarmenduko badira ere, Mañaria errekaren jaitsiera zein gastronomiarekin lotutako hainbat ekitaldi ere tartekatuko dira.

Kontzertu aipagarrienetakoa datorren asteko barikukoa izango da, agertokian lau talde egongo direlako, Zoo valentziarrak tarteko. Boskote horrek eskainiko duen saioan rap, tekno, breakbeat, reggaeton, rock eta bestelako doinuak entzungo dira.

Valentziarrekin batera hardcorea oinarri duen Eat My Fear talde alemaniarra; punk doinuak lantzen dituen Genderlexx madrildarra eta jostaketa oinarri duen Godoys bilbotarrak izango dira agertokian.

Euskal Herriko talde beteranoenetakoa den Potato gasteiztarra, aste honetan, zapatuan hain zuzen joko du Kurutziagan, reggae eta ska doinuak eskaintzeko. Kontzertua funk eta soul doinuak lantzen dituen Priscilla Band talde bilbotarrarekin osotuko da.

Eskualdeko taldeek euren doinuak eskaintzeko aukera izango dute eta gaur bertan, Tres41, Alerta eta Stronger Togheter igoko dira agertokira.

Etzi,  San Fausto egunez, Storm talde durangarra izango da ekitaldiko protagonista. Pop-rock estiloa lantzen duen boskoteak ‘Over the bridge’ lehen diskoa kaleratu zuen udaberrian.

Durangarrekin batera 70. hamarkadako rock&rolla lantzen duen Skean Kristo talde arratiarra zein Bedia, Lemoa eta Zornotzako hiru musikari batzen dituen Zeinke ere izango dira.

Agertokiko musika ekitaldiak 21ean osotuko dira Txapito Guzman eta Ibarrako Langostinuek eta Luhartz taldeek eskainiko dituzten saioekin. Gainera, gaur hasiko diren jaietako lehen ekitaldia batukada batek eskainiko du eta zapatuan Elektrotxaranga ibiliko da han-hemenka.

Erreka jaitsiera

Durangoko jaietan huts egiten ez duen hitzordu arrakastatsua da Mañaria errekaren jaitsiera. San Fausto egunean egingo den ekimenean, kolorez eta umore onez beteriko ontziek nabarmenduko dira Tabira eta Sanagustinalde arteko erreka tartean.

Jaitsiera hasi aurretik txosnagunean egongo den paella lehiaketa ez da izango gastronomiari lotutako ekitaldi bakarra. Bihar, oilasko errea dastatzeko aukera egongo da; zapatuan, gazteen bazkaria egingo da; 20an bertso-rap-arekin girotutako tortilla txapelketa egongo da eta 21ean Elkartasun bazkaria ospatuko dute.

Dispertsioaren aurkako taldeak gaur iluntzean piztuko duen txupinazoarekin hasiko diren ospakizunak, aire akrobazien ikuskizunarekin, umeentzat prestatutako puzgarriekin edo koadrilen arteko olinpiadarekin osatuko dira.

La entrada Musika eta bestelako ekitaldiak tartekatuko dira Kurutziagan jarritako txosnagunean se publicó primero en durangon.com.