Ilustrazioa, abentura, irudimena eta itsas-erronkak uztartzen dituen proiektu berezi batean murgilduta dago Eider Eibar ilustra­tzaile zornotzarra. Iskander Sagarminaga igerilariarekin batera, Kokolulu izeneko espedizioa burutzen ari da Hawaiin. Bertan, Zazpi Itsasoak (Oceans Seven) nazioarteko erronkako laugarren itsas-zeharkaldia egingo dute, hau da, Ka‘iwi kanala zeharkatzen saiatuko dira, munduko itsas- erronka gogorrenetako bat: 42 kilometroko tartea olatu erraldoi, korronte indartsu, marmoka pozoitsu eta marrazoen artean.

Baina bidaia ez da soilik kirol balentria bat: Kokoak proiektuaren baitan, sormenak eta irudimenak ere leku nagusia hartuko dute. Izan ere, koko misteriotsuen bila joango dira, eta abentura narratibo eta bisuala sortuko dute.

Sare sozialen eta kokoak.eus atariaren bidez, eguneroko kontakizuna zuzenean zabal­tzen ari dira, publiko zabala bidelagun. Nahiz eta Bilbon hazi, sortzaileak lotura estua du Zornotzarekin, eta samurtasunez gogoratzen da bere amama zenaz. Durangon ere horma-irudi nahikotxo ditu, eta Arteka liburutegian ia urtero erakusketa antolatzen du.

Orain, Hawaiin bizitzen ari den esperientzia osoa marrazki eta irudien bitartez konta­tzen ari da. “Itsas-zeharkaldia betetzeko aukera izatea, egin ahal izatea, jada oparia da”, dio abenturazaleak.

-Kokolulu abenturan murgilduta zaudete hilaren 25etik Hawaiin. Koko berriak aurkitu behar dituzue, eta bide batez, Ka‘iwi kanala zeharkatuko duzue, Ozeano Barean dagoen 42 kilometroko tartea.
-Hala da, bai. Hegazkina hartu genuenetik hasi gara gure abentura saretzen kokoak.eus webgunean eta @kokoakgara sare sozialetan. Guztira, proiektuak lau aste iraungo du. Iskanderren erronka baliteke maiatzaren 1etik 8ra izatea. Hango kapitainak aste hori eman digu, eta aste horretan egun posible bat aterako balitz, eguraldiak uzten duelako, egun horretan saiatuko ginateke itsas-erronka egiten. Bitartean, koko desberdin bat aurkitzen saiatuko gara astero.

-Oraingo erronka ez da batere makala. Iskanderrek 42 kilometro egin beharko ditu 15 ordutan, 24-27 ºC inguruko uretan, 700 metroko sakonerako itsa­soan. Eta zailtasunak ez dira nolanahikoak (olatu erraldoiak, korronte indartsuak, marmoka pozoitsuak eta marrazoak…) Kanpotik izugarri arrisku­tsua ematen du…
-Bada, bai. Oso arriskutsua izango da, oso gogorra eta luzea. Arrisku pilo bat dauzka; berak badaki. Horregatik, munduan ehun pertsonak baino gutxiagok lortu dute erronka hau betetzea. Ni Iskanderren alboan egongo naiz txalupan, ordu erdiro elikatu beharko dut eta ondo dagoen egiaztatu beharko dut.

-Dagoeneko hiru kanal historiko gainditu dituzue, eta laugarren honen bidez Zaz­pi Itsasoak (Oceans Seven) izeneko nazioarteko erronka gogorraren beste mugarri bat lortu nahi duzue.
-Bai, helburua Zazpi Itsa­soak betetzea da, eta badakigu apurka-apurka joan behar garela. Gainera, nazioarteko erronkaren arautegi zorrotza bete behar dugu, esaterako, Iskanderrek bainujantzi hutsean igeri egin behar du, ezin du inoiz txalupa ikutu, ezin da gelditu, ezin du erlojurik ezta antzeko gailurik eraman… Dena oso kontrolatuta dago, eta hori guztia betetzen ari dela ziurtatzeko epaile bat etorriko da gurekin txalupan.

-Familiak zer esaten dizue?
-Nik uste dut emozio nahaste handia sentitzen dutela gure senideek. Batetik, beldurrarekin eta urduri daude, eta bestetik, pozik daude nahi duguna lortzen ari garelako. Gainera, erronkaren egunean, itsas-zeharkaldia burutzen dugunean, track bat lortzen dugu, eta horri esker, gure familiak zuzenean jarraitu ahal izan du proba beti. Oraingoan mundu guztiak ikusi eta jarraitu ahal izango du, web-orrian zabalduko dugulako.

-Zuentzat zer da gogorrena?
-Itxaronaldiak. Aurrekoan, Ipar Irlandan, hilabete osoa itxaron behar izan genuen egun apropos baten zain. Bertako kapitainak ematen digu noiz den egunik onena itsas-zeharkaldia egiteko, eta horregatik, aurreko erronka burutzea asko kostatu zitzaigun. Behin kapitainak aukera ematen digunean, Iskanderrek erronka gainditzea lor­tzen du. Oso igerilari gogorra da eta zintzoa ere bai, une oro esaten du nola dagoen, eta horrek asko laguntzen digu txalupan goazen guztioi.

-Inoiz pentsatu duzue “zergatik sartu gara zoramen honetan”?
-Erronka bakoitzean eta hainbatetan! (barre egiten du) Itsas-zeharkaldiaren eguna dakigunean, kapitainak “bihar izan daiteke” edo “etzi aterako zarete” esaten digunean, aurreko gauean minuturo pen­tsatzen dugu: “zer egiten dugu hemen? zergatik? zertarako?” Baina txalupara igotzen garenean, poz ikaragarria sentitzen dugu. Erronka betetzeko aukera izatea, egin ahal izatea jada oparia da. Izugarrizko lana dago atzetik; izan ere, gure bizitza osoa dago proiektu hau lortzea bideratuta.

-Zeuretzat ere erronka handia da. Iskanderren laguntzailea izateaz gain, marrazkiak eta bideoak egin beharko dituzu.
-Bai, erronka osoa hegazkina hartzen dugunetik hasten da. Gu kokoen bila goaz erronka hauetara. Aurten Pō, Kea, Pua eta Kai kokoak aurkitu behar ditugu, eta horiek bilatzeko abentura guztia kontatuko dugu. Egunero edukiak argitaratuko ditugu sare sozialetan eta web-orrian: zer egiten dugun, zer aurkitzen dugun, zer animalia berri ezagutzen dugun, zein hondartzatan entrenatzen den Iskander, nik guztia nola marrazten dudan… Nik egunero marraztuko dut eta edukiak zabalduko ditut.

Gero, erronkaren egunean, Iskanderrek itsas-zeharkaldia egiten duen bitartean, bera elikatu eta zaintzeaz gain, bideoak grabatuko ditut 360 kamerarekin, dronearekin eta abar, eta hori guztia igo internetera. Orduan, erronka egunean tartetxo gutxi ditut marrazteko. Marrazki arinak izaten dira, baina oso bereziak. Adibidez, Kalifornian bale bat agertu zen eta hura marraztu nuen, marrazo bat ere bai.

-Hilabeteak ikertu ostean, kokoak aurkitzeko pista nahikotxo bildu dituzue.
-Bai. Guk aztertzen dugu mundutik zehar non egon daitezkeen kokoen pistak. Lehenengo zazpi kokoak marrazkietan agertu ziren zulotxo batzuetatik atera ziren, eta hortik sortu genuen unibertso guztia. 2024an Pamiela argitaletxearekin Kokoak album ilustratua argitaratu nuen. Iaz hiru erronka burutu genituen eta beste hiru koko aurkitu genituen eta oraingoan lau koko aurkitzea espero dugu. Pista batzuk bildu ditugu eta ziur gaude hango jainko eta jainkosa mitologikoekin harremana izango dutela.

-Eta zer-nolako pistak dituzue?
-Beren izenak aztertuz, nahiko ziur gaude non egon daitezkeen. Lehenengo astean itsas-nabigazio izarren irakurketa-sistema aztertu nahi dugu, eta hor Pō kokoa -Pō gaua da hawaieraz- aurkitzea espero dugu, Gina jainkosarekin, ilargiaren jainkosarekin, harremana daukana. Bigarren astean, Islanderren itsas-zeharkaldia izango da, eta Moloka´i kanalean Kai kokoa aurkitzea espero dugu -Kai itsasoa da hawaieraz- eta gainera, Iskanderrek erronka bukatzen duen tokian Koko kraterra dago. Beraz, ziur gaude kokoekin harreman zuzena duela leku horrek.

-Eta Pua eta Kea non egotea espero duzue?
-Puak lore forma daukanez, aterik gabeko helikoptero batera igoko gara, eta goitik grabatu eta bilatu dugu hango baso eta landa artean. Eta Kea aurkitzeko

Mauna-Kea sumendira igoko gara, berez, mendirik altuena da itsasotik neurtzen hasiz gero. Han aurkitzea espero dugu Pele sumendiaren jainkosarekin batera.

–Kokoak.eus-en oso material baliagarria eta dibertigarria eskaintzen duzue doan eta gainera, euskaraz.
-Zortzi urte daramatzagu jo ta su, eta den-dena arreta handiz prestatzen dugu. Marrazkiak egiteko ereduak, bideoak, web-jokoak, euskarazko sticker animatuak daude, eta erronketan material pilo bat sortzen dugu. Oraingoan, irudi zoragarriak grabatuko ditugu, eta hor egongo dira erabiltzeko. Horrez gain, Hawaierak euskararekin loturak dituela aurkitu dugu, eta hori ere aztertu nahi dugu. Jendea harritu egiten da gure materiala ikustean, adibidez, mugimuki stickers animatuek 180 milioi bisita izan dituzte dagoeneko.

-Kokoak proiektuak badu mezu inpliziturik?
-Bai, nire helburua beti izan da haurrek ikustea marrazkigintza bizimodu bat izan daitekeela, honetatik bizi daitekeela, eta ez dutela utzi behar. Eta kirol-erronka hauen atzean nik uste dut mezu asko daudela: batetik ikusten dituzte bi pertsona “heldu”, zorotxo batzuk moduan, mundutik abiatzen garela kokoen bila, marrazkien bitartez, kirolaren bitartez, eta hori dela gure bizitzeko era. Bizimodu hori posible dela haurrengana iristea oso garrantzitsua da.

-Kokolulu abenturaz gain, zu beste mila saltsatan sartuta zaude.
-Kokoak proiektuak nire bizitzaren denbora handia hartzen du, baina ilustratzaile moduan hainbat lan egiten ditut: liburuak, diseinu-lanak eta animazio-piezak.

Esaterako, Itxaso Martin idazlearekin batera egiten ari naizen Mati bilduma oso arrakastatsua izaten ari da, eta buru-belarri ari gara horretan. Gainera, Juul hauteskundeetan Euskal Herriko 15 mila umek aukeratu dute Mati libururik gogokoena, eta neu 16. aldiz aukeratu naute ilustratzailerik onena. Pozarren nago eta oso eskertuta!

-Zornotzan jaio zinen. Zer-nolako eragina izan du Durangaldeak zugan?
– Ni Bilbon hazi naiz, baina familia zuzena eta lagunak Zornotzan ditut. Amamarekin, bereziki, askotan egoten nintzen herrian. Durangorekin lanak lotu nau. Nire horma-irudi asko daude bertan: oktogonoan, musika-eskolan, Bixenta Mogel liburutegian… Ia urtero, gainera, Arteka liburudendan erakusketa bat egiten dugu.

La entrada “Askotan pentsatzen dugu: zergatik sartu gara zoramen honetan?” se publicó primero en durangon.com.

Ganso&Cía, Ane Berriotxoa, Miren Amuriza eta Joseba Sarrionandia.

Musika, ikus-entzunezkoak, antzerkia, liburuak, proiektu digitalak… Disziplina askotakoak eta publiko guztiei zuzendutakoak izango dira, gaurtik eta igandera arte, Durangoko Azokan aurkeztuko diren Durangaldeko lanak. Ia hogei bat sortzailek osatuko dute eskualdeko zerrenda, eta azokako gune guztietan egongo dira ordezkatuta. Gainera, bihar, Gazte Eztanda egunean, Nekkar musika taldeak eta Xaukena Xauk musika jartzaileek girotuko dute gaueko egitaraua. Uzta oparoa da, beraz, aurten eskualdeak emandakoa. ‘Hartzea ematea DA!’ euskal erakusleiho nagusiaren leloari jarraituta, zaleak gerturatzea eta lanez gozatzea baino ez da geratzen.

Kultura zaleek ezer gal ez dezaten, guneka sailkatuko ditugu sortzaileak. Ahotsenea Musikan eskualdeko musikariak bilduko dira. Ainke taldeak, adibidez, bere bigarren diskoa ‘Hamar gezur eta hiru tiro’ aurkeztuko du Plateruenan. Gune berean, Ander Erzillak zuzenekoa eskainiko du ‘Durundi’ diskoa ezagutzera emateko. Ahotsarekin eta saxofoiarekin hirugarren lan honetako burua bada ere, ondo lagunduta egon da. Izan ere, bere hiru alabak ondoan izan ditu.  Horrez gain, Ander Garcia (kontrabaxua), Dani Artetxe (gitarra) eta Rakel Arbeloa (bateria) musikariek parte hartu dute.

Durangaldean sortutako ikus-entzunezkoak Irudienean, hau da, Zugaza zineman eskainiko dira. Horien artean, Ane Berriotxoa zornotzarraren ‘Nire amaren etxea’ film laburra ikusi ahal izango da. Karmen 40 urteko emakumearen istorioa ezagutzeko aukera emango digu. Protagonistak ama galdu du, eta ez du inoiz harreman onik izan berarekin, baina orain, jaiotzen ikusi zuen etxearen bitartez, haren azalean jartzen da, eta galdera asko erantzuten ditu, zerbait ulertzen du. Pantailan alaba, etxea eta erantzungailuan utzitako ahots-mezuak baino ez dira agertuko.

Halaber, ‘Errekatxo baten onduen’ dokumentala aurkeztuko da. Markel Onaindia gidoigile eta zuzendariak Mediolako auzo eskolan ibilitako ikasle eta irakasleen bizipenak jaso ditu, tokiaren mendeurrena ospatzeko. “Auzolan handi baten emaitza da”, aitortu du Onaindiak. Atzera begirakoa ere egin dute Ibaizabal ikastolakook. Duela 25 urte egon zen mugimenduarekin sortu zen ikastola. Mugimendu horrek gaur egun arte darrai, eta horren fruitua izan da ikas komunitateak ‘Bost bider bost 25’ lelopean aurrera eraman duen bideoklipa. Ikusgai egongo den lana Peio Azkarateren musikarekin eta Ainhoa Olasoren gidaritzapean ondu da.

Eduki digitalak

Eduki digitalek ere beren lekua izango dute Durangoko Azokan. Gune honetan, Eider Eibar ilustratzaile zornotzarrak Iskander Sagarminaga itsasoko igerilariarekin batera egindako ‘Margo Piratak’ lana erakutsiko digu. Proiektu transmediak zazpi itsasoen erronkak igerian eta marraztuz euskaraz sorturiko eduki digital guztiak biltzen ditu: eskulanak, euskarazko sticker animatuak, mapa interaktiboak, bideoak eta animazioak, besteak beste. Horrez gain, ‘Kokoak’ izaki fantastiko txikien abentura koloretsua ezagutzera emango du Eibarrek Saguganbaran, umeentzako gunean.

Ildo beretik jarraituz, txikiei zuzendutako egitarauan leku berezia izango du Peru Magdalenaren ‘Lo-kantak’ proiektuak. Sehaska-kanta berri bezain ederrak asmatu ditu etxeko haurtxoei lo egiten laguntzeko, eta liburu-jostailu berezi eta ederraz gainera, grabazioa ere eskaintzen digu, haurrari nola kantatu jakin dezagun. 2 urtetik gorako umeentzat da Amaia Egidazuren ‘Itsaso gazian’ liburua,  kantatzeko eta  kontatzeko sortutakoa. Testu errimaduna duen kartoizko liburuak itsasoa eta bertako animaliak ezagutzeko balio du.

Jon Ander Urkiagak ‘Baziren behin… hiru ipuin’ ipuin kontaketa burutuko du 5 urtetik gorakoentzat.  Haur txikiei kontatzeko hiru ipuin idatzi ditu eta Gastonek ilustratu, alegia erakoak. Gainera, herri tradizioan bizirik dirauten kantuak eta ume txikiekin jolasteko edo kantatzeko ohiko abestiak ‘Txalopin Txalo’ liburuan jaso dira. Mankomunitateak eta Enrike Morentek aurkeztuko dute.

Durangaldeko ondare literarioa

Talaian bestelako gaiak landuko dira. Esaterako, Martin Arbeok ‘Liluraren kontra: trantsizio geopolitikoaren argi-ilunak’ liburua aurkeztuko, eta horrez gain, beste bi aurkezpen interesgarri izango dira. Batetik, Joseba Sarrionandiaren eskutik, ‘Iurretako berbeta eta literatura: Sator hegalariak’ liburua ezagutuko dugu. Durangaldeko ondare literarioa jasotzea eta ezagutaraztea helburu izango duen bildumaren lehenengoa alea da. Bestetik, Mikel Uribelarreak genero identitatearen gaia jorratuko du ‘Gorputz txiki batean jaio nintzen’ lana oinarri hartuta.

Durangaldeko antzerki taldeak Szenatokiko oholtzara igoko dira. Lehenengo, Karrikaren txanda izango da. ‘Hurrengo geltokia’ zain egoteari buruzko antzezlanaren 20 minutuak eskainiko dituzte. Horrez gain, Ganso&Ciak ‘The Question’ taularatuko dute, barrea eragiteko asmoz.

Azkenik, Ahotsenea Literaturan helduentzako fikziozko literatura eta poesia Miren Amuriza eta Leire Vargasen eskutik eskainiko dira. Idazle berriztarrak bere bigarren eleberria ‘Pleibak’ eramango du Durangoko Azokara, eta olerkari durangarrak ere ‘Bihotz-museo bat’ bere bigarren poesia bilduma aurkeztuko du.

La entrada Durangaldeko uzta kultural oparoak oihartzuna izango du Durangoko Azokan gaurtik aurrera se publicó primero en durangon.com.

Zornotzako Andra Mari Ikastolako Haur Hezkuntzako 5 urteko haurrek sortutako artelanekin egin den Ttipia erakusketa, urtarrilaren 28ra arte egongo da ikusgai Zelaieta zentroan.

Loraldia elkarteak bultzatutako eskolaren baitan sortutako ekimenaren helburuak transmisioa eta euskal kultura bizitzaren erdigunean kokatzea da.

Haurrek egindako lanak udazkenean ezagutu zituzten lau artista plastikoren adierazpide artistikoan oinarritzen dira: Eider Eibar ilustratzailea, Ainhoa Ortells margolaria, Elena Mendizabal eskultorea eta Eriz Moreno argazkilaria.

“Haurrek, egitasmo honen bitartez, sentipenak adierazteko kulturak betetzen duen paperaz ohartu dira, baita erakargarritasun kulturalaren indarraz jabetu ere” Loraldiko eragileen arabera.

Zornotzan antolatutako erakusketaz gain, Loraldia elkarteak izen bereko festibala egiten du udaberrian Bilbon.

La entrada Andra Mariko ikasleek Loraldia egitasmoaren barne egindako lanak Zelaieta zentroan daude ikusgai se publicó primero en durangon.com.

56. Durangoko Azokak Landako Guneko espazioa berreskuratuko du. Osasun-neurriak betetzeko asmoz, aurten bisitari-kopuruari eta erakusmahaietara joateko denborari mugak jarri bazaizkie, publikoa ohiko guneetan egon ahal izango da berriro.

Literatura, musika, ikus-entzunezkoak eta bestelako kultur produktuen zaletuek, Euskal Herria osoan ekoiztutako produktuak izango dituzte eskuragai. Horien artean Durangaldeko sortzaileek asmatu eta argitaratutako hainbat lan izango dira. Beste behin ere, hemen bertan egindako liburu, disko eta gainerakoek uzta oparoa osatzen dute.

Euskaraz inprimatutako lehenengo liburua den ‘Lingua Vascorum Primitiae’ren bertsio-itzulpena egin du Xabier Amuriza berriztarrak. ‘Etxepare, jalgi hadi batura’ izenburua duen lanak, 1545ean idatzitakoaren edukia errespetatzen ahalegindu da eta Amurizak kaleratu berri duen lanak hamabost poema biltzen ditu.

Ez bat, ez bi; hiru lan berrirekin gerturatuko da Durangoko Azokara Eider Eibar diseinatzaile zornotzarra. ‘Ez dakit marrazten’ laneko protagonista, bere buruari “…ez dakit marrazten”, esaten dion pertsonaia da eta berritutako ‘Kokoak.eus’en joko eta eskulan berriak aurkezten ditu. Gainera, Yolanda Arrietak idatzitako ‘Letren jolaslekuan’ liburuan tartekatzen diren irudien egilea ere bada.

Argitaratu berri duen ‘Barruko ahotsak eta bestelako soinu txikiak’ lana aurkeztuko du Leire Bilbaok. Maite Mutuberriaren ilustrazioak dituen poema bilduma honetan egun oso bateko soinu banda eskaintzen dute.

Irakurle helduentzat egindako literatura edo saiakera lanak nabarmendu badira Joseba Sarrionandiaren obran, aurtengo Azokan gaztetxoen literaturan murgilduko da idazle iurretarra. ‘Tristura’ deituriko lanean, nahigabean erortzen denari bizipozaz eta alaitasunez hitz egiten dion laguna azaltzen zaio. Haurrak protagonista egiten dituen ‘Txoriak’ poema-abestiaren itzulpena egin du.

Irun Hiria saria

Eñaut Aiartzaguena irudigile iurretarrak Iñaki Sanzekin argitaratu duen ‘Xapoketan’ egitasmoren barne gauzatutako puzzlea eta karta-jokoa aurkeztuko ditu. Lanetan, Euskal Herriko animaliak eta lurraldeko zazpi ekosistema nagusiek dute protagonismoa.

Irun Hiria-Kutxa Literatura saria eskuratu zuen irailean Leire Vargas durangarrak, ‘Dena ametsa den irudipena’ poema liburuagatik. Orain, gazte baten noraezak, barne-minak eta egokitu ezinak agerian uzten dituen poema sorta eskuratzeko aukera egongo da Elkarrek Landakon jarriko duen erakusmahaian.

Durangoko historiak ere bere lekua hartuko du bertako egileen artean eta horren eredu da Iban Gorritik aurkeztuko duen ‘31 vidas : el bombardeo contra Durango. Biografías del 31 de marzo de 1937’. Egun hartan eraso faxista jasan zuten 40 gizon eta emakumeren biografiak biltzen dira liburuan.

Musika nonahi

Doinu eta musika berriak zein aspaldikoak, bere lekua izango dute Landakon, Seiurte berriztarren, Iheskide elorriarren edo Mikel Urdangarin zornotzarraren lanak eskuragai izango baitira.

‘Cabo Cañaveral’ jarri diote izenburu, Seiurte taldekoek argitaratutako zortzigarren diskoari. Iokin, Iñaki eta Ekain Elortza anaiek eta Julen Oarbeaskoak osatzen duten laukoteak urteetan izan duen garapena erakusten du, beti ere indie-rock estiloaren inguruan murgildu da.

Indarberrituta baina laukote zireneko esentzia berberarekin itzuli da hirukote bilakatu den Iheskide. ‘Tinko gurean’ izenburuarekin argitaratutako seigarren lanean, Xagu, Tronpi eta Unaxek taldearen nondik-norakoak agerian uzten dituzte, rocka zainetan, punka izaeran eta borroka bihotzean daramatzatelako.

Kaleratu zuen lehen diskoaren 25. urteurrena betetzen dela eta, ‘Haitzetan 1997-2022’ berrargitalpena aurkeztuko du Mikel Urdangarinek. Agian bere ibilbideko lan ezagunenetarikoa denari ‘Su ñimiño bat’ kantua gehitu dio.

Zuzenean

Zuzeneko ikuskizunek ere bere lekua izango dute Durangoko Azokan eta San Agustin Kultur Guneko agertokian azalduko da gaur bertan Durangoko Bagara kolektiboa ‘I(n)tera(k)zioa’ dantza sorkuntza taularatzeko. Uribarri Atxotegi, Ane Gabilondo, Maider G. Etxegibel, Unai Bilbao eta Aritz Lasargurenen proiektuak, dantzaren bidezko gorputzen mugimendua, zuzeneko musika eta teknologia berriek eskaintzen duten aukeren artean osatutako interakzioan sakontzen du.

Baleuko ekoiztetxeak ‘Iratxoen kantu sekretuak’ magiaz beteriko ikuskizun musikala eskainiko du bihar Saguganbaran. Animazioa, zuzeneko musika eta dantza uztartuz, naturaren misterioz betetako kontakizunak jartzen dira agerian.

Ander eta Eneko Sagardoy durangarrek sortutako Sumendi Films ekoiztetxeak ere bere lekua izango du Azokan. Kasu horretan, ‘Lekukoa hartu, edo gure lekua hartu’ eztabaidan, eta Anderrekin batera, Erein argitaletxeko Uxue Razquin eta Musikari Elkarteko Zuzendaritzako kidea den Eneritz Furiya, gazteek Euskarazko kultur industriaren etorkizunari buruz mintzatuko dira, aurkezle lanetan Ane Zuazubiskar izango delarik.

La entrada Eskualdeko uzta oparoa se publicó primero en durangon.com.

53. Durangoko Azokako ateak domekara arte egongo dira irekita.

Bide erdia baino gehiago egin duen 53. Durangoko Azokak, programazio zabala eta oparoa iragartzen du edizio hau agurtu eta ateak itxi aurretik. Lehen hiru egunetan jendetza ibili da Landakon zein erakustazokatik kanpo jarritako guneetan eta, itxura baten, bisitarien kopuruak ez du behera egingo azken bi egunetan.

Izan ere, gizakiok ohiturako animaliak gara eta eginbeharrak, sarritan, azken ordurako uzten ditugu; baita Azokarako bisita ere. Beste kasu batzuetan Landakora egindako bisita bat ez da nahikoa izaten, beste erosketaren bat egin behar delako, eguneko egitarauan dagoen zerbait erakarria delako edo, bestelako barik, lagunekin hitzordua egin delako. Gainera, egunotan, Azokako zein Durango osoko giroa primerakoa da.

Gutxi balitz, Azokako gune desberdinetarako prestatutako egitarauak proposamen indartsuak iragartzen ditu azken txanparako. Gaur goizean, Gatibu, Txapelpunk, Bad Sound, Hara!, McOnak edo Lehiotikan taldeek euren azken lanak aurkeztuko dituzte Ahotsenearen zuzenekoen gunean. Solasaldien aretoan berriz, Uxue Alberdik eta Eider Eibarrek zein Unai Iturriagak eta Alex San Vicentek egindako azken liburuak aurkeztuko dituzte.

Soinujolearen semea Irudienean

Bernardo Atxagaren liburuaren oinarritutako ‘Soinujolearen semea’  pelikularen emanaldi berezia egongo da Irudienean eta areto berean aurkeztuko da ‘Agur Etxebeste! filmaren proiektua.

Szenatokian berriz, ‘Tomiris’, ‘Agur eta Dolore’ eta ‘Schrodinger-en katua’ pieza laburrak eszenaratuko dira; Areto Nagusian Carlos Garaikoetxea edo Telesforo Monzon politikariak zein ‘Kulturaren transmisioa eskolan’ izango dira hizpide eta eguna amaitzeko 25. urteurrena ospatzen ari den Anestesia taldearen kontzertua egongo da Plateruenan.

Hainbat proposamen izango dira bihar ere, 53. Durangoko Azoka Olatz Salvadorrek Plateruenan eskainiko duen kontzertuarekin amaitu aurretik. Areto Nagusian ‘Cárceles y derechos. Alejamiento, enfermedad, acumulación de condenas” izango dute hizpide Joseba Azkarragak, Iñaki Lasagabasterrek eta Jon Iñarrituk eta Szenatokian ‘Inondik inora’ familientzako antzezlana eszenaratuko da.

Ahotseneako egitaraua ekitaldiz beteta egongo da eta zuzeneko aretoan Inun, Ibai Martin, Guda dantza edo Elortegi anaien lan berrien aurkezpena egongo bada, solasaldien aretoan Edorta Jimenezek edo Jon Arretxek euren azken lanak aurkeztuko dituzte.

La entrada Durangoko Azokak proposamen ugari iragartzen ditu edizio honetako azken bi egunetarako se publicó primero en durangon.com.

Uzta oparoarekin gerturatu dira Durangaldeko sortzaileek 53. Durangoko Azokara, Landakon jarritako erakusmahaietan eskualdeko zigilua duten literatura lanak, ipuinak, komikiak, musika proposamenak eta bestelakoak eskuragai baitaude. Aniztasuna goiburu duen edizio honetan, bertaratzen den bisitariak estilo eta itxura ugariko sorkuntzak aurkituko ditu.

Bere lehenengo liburuarekin dago Bego Goitia durangarra Landakon. Autoekoizpenaren bidez argitaratutako ‘Kaka dantzaria’ 0 eta 8 urtera bitarteko umeei zuzenduta dago. Miren Amuriza bertsolari berriztarrak berriz, familia ereduen aniztasunaren aldeko apustua egiten duen ‘Familia Milakolore’ ipuin bilduma aurkezten ari da.

Unai Iturriaga bertsolariak Alex Sanvirekin batera egindako ‘Haur Besoetakoa: Paristik datorren artista’ komikiarekin dago Ikastolen Elkartearen standean. Iturriagaren gidoian oinarritutako liburua gazteei zen helduei zuzendutako sorkuntza da.

Durangon bizi diren Leire Bilbao ondarrutarra eta Paddy Rekalde bilbotarra ere gaztetxoei zuzendutako lan berriekin daude Landakon. Bilbaok, Pirritx, Porrotx eta Marimototsekin, Xabier Zabalarekin eta Maite Mutuberriarekin elkarlanean sortutako ‘Musua’ disko-liburua aurkezten ari da egunotan eta Rekaldek ‘Itsasadarreko kontuak’ liburu berria ekarri du Azokara.

Eider Eibar ilustratzaile zornotzarrak lan berri bi ditu Azokan. Alde batetik, Iskander Sagarminagarekin egindako ‘Kokoak, marrazkiei kosk!’ lan berria aurkeztuko du eta bestetik, Uxue Alberdik idatzitako ‘Poza’ liburuko irudiak egin ditu.

‘Txotxe’ eta Sarrionandia

Antzerkiak ere bere lekua du Durangoko Azokan eta atal horretan aipamen berezia merezi du Eztenak jaialdiak egindako ekarpena. Oreretako ekimen horrek otsailean hil zen Jose Martin Urrutia ‘Txotxe’k idatzi eta Karrika antzerki taldeak eszenaratutako ‘Ametsen faktoria’ antzezlanaren testua argitaratu du.

Lan berri bat aurkezten duen bakoitzean gertatzen den bezala, aurten ere Joseba Sarrionandia izango da Azokak ateak ixten dituenean ale gehien saldu dituen sortzaileetariko bat. Kuban bizi den idazle iurretarrak ‘Bizitzea ez al da oso arriskutsua? Habanako gaukaria’ liburuarekin dator. Kartzelan idatzitako ‘Ni ez naiz hemengoa’ obran egin zuen bezala, testu laburrez osatuta dago lan berria, baina oraingoan La Habanako gauetan idatzitako piezak tartekatzen ditu.

Ikertzaileek ere bere lekua izaten dute Landakon eta oraingoan labetik atera berria den ‘Jatorriak. Elorrio. Orígenes. San Agustin 1053- Elorrio 1356’ liburuarekin dator Rikardo Ajuria historialaria.

Mikel Onaindia arte historialariak berriz, Bilboko Arte Ederren Museoak  argitaratu duen ‘Después del 68 : arte y prácticas artísticas en el País Vasco 1968-2018’ katalogoa argitaratu du eta bertan azken 50 urteotako euskal sorkuntzaren errepasoa egiten duen.

Azokako standetan ohikoak badira sukalde errezeten liburuak, aurten Zigor Iturrietak ETBko Txoriene programan egindako errezetak batzen dituen ‘Txorieneko lau urtaroak’ bilduma gerturatu du.

Mendiko gaiei lotutako liburuak ere bere lekua dute Azokan eta aurten afizio hori eta korrika batzen dituen lana gerturatu du Oihana Azkorbebeitia abadiñarrak. ‘Mendiaren altzoan’ liburuan mendi lasterketetan bizitako hainbat gertaera kontatzen ditu.

Eskualdeko musika taldeek ere berain azken sorkuntzak esakaintzeko aukera baliatu dute, horietako pare bat Pott Produkzioak ekoiztetxearen bidez. Bertan, Txapito Guzman eta Ibarrako Langostinuek eta State Alerta talde abadiñarren lanez gain, Hartz zein Egurra eta kitto! azpeitiarren, Nomadak bergararren edo Dekot jatabetarren proposamen berriak eskuragai daude.

Zinea eta dantza

Eguneko egitarauan badago zer nabarmendu. Irudienean, Eneko Sagardoy antzezle durangarra protagonista duen ‘Errementari’ pelikula emango da eguerdian eta arratsaldean ‘Aralar, mundua leku den lurra’ dokumentala eskainiko da. Ahotsenea, beraien disko berriak aurkeztuko dituzte Tooth, Maddi, Ertzak, Iker Lauroba, Hibai edo Hezurbeltzak, besteak beste, eta gune horretako solasaldien aretoan Pako Aristik, Oier Guillanek, Asisko Urmenetak edo aurtengo kartela egin duen Txakur Gorria kolektiboak euren proposamen berriak aurkeztuko dituzte.

Areto Nagusian, Esloveniako Barbara Pregelj eta Peter Sventina, Juan Kruz Igerabide, Amaia Apalauza eta Elizabete Manterolarekin arituko dira ‘Besteak gure ispilu’ deituriko solasaldian. Szenatokian berriz, ‘Baserri’ dantza ikuskizuna eskainiko du Larrua Proiektuak eta egunari amaiera emateko Modus Operandi taldearen kontzertua izango da Plateruenan.

La entrada Eskualdeko sortzaileek uzta oparoa gerturatu dute Landakora se publicó primero en durangon.com.