Gounod eta Bersteinen piezak tartekatuko ditu domekan Tabira Musika Bandak eskainiko duen kontzertuan.

Durangoko Tabira Musika Bandak San Fausto jaietan urtero ematen duen kontzertua eskainiko du bihar, eguerdiko 13:00etan Andra Mariko elizpean. Agerraldian, herriko patroiaren izena izango dute kontuan, prestatutako egitarauan Charles Gounod konpositorearen ‘Fausto’ obra nabarmenduko baita.

Luis Orduña zuzendariaren aginduetara izango den ekitaldian ‘Fausto’ obratik aukeratutako sei pasarte eskainiko dituzte Tabira Bandako musikariek. Saioa osatzeko ‘La boda de Luis Alonso’ zarzuelatik aukeratutako intermezzo instrumentala eta Leonard Bernsteinek konposatutako ‘West Side Story’ zein ABBA taldeko kideek egindako ‘Chess’ musikaletako piezak joko dituzte.

1859an Parisen estreinatutako ‘Fausto’ opera, Charles Gounod, XIX. mendeko konpositore eta musikari frantziarrak idatzi zuen. “Kontzertu honetarako prestatutako programa, berez letra eta ahotserako idatzitako piezak diren arren, bandarako bertsiora egokitutakoak izango dira eskainiko direnak”, Tabira Musika Bandako kideen esanetan.

Kontzertua zuzenduko duen Luis Orduñak berriz, egitarauan tartekatuko diren “bi konpositoreen urteurrena betetzen dela aurten” gogoratu du. Alde batetik, Gounod jaio zela 200 urte betetzen dira eta Bernsteinen jaiotzaren mendeurrena ospatzen da.

La entrada ‘Fausto’ operaren pasarteak nabarmenduko dira Tabira Bandak eskainiko duen kontzertuan se publicó primero en durangon.com.