Gorka Pagonabarragak irabazi zuen Balmasedan jokatutako Bizkaiko Eskolarteko Bertso sariketa.

Gorka Pagonabarraga bertsolari durangarrak irabazi zuen zapatuan Balmasedan jokatutako Bizkaiko Eskolarteko Bertsolari sariketaren bat-batekoa. Finalerako sailkatutako zortzi bertsolarien artean, Pagonabarragak eta Iruri Altzerreka berriztarrak lortu zuten buruz-burukorako txartela eta azkenean durangarra izan zen garailea.

Peagonabarraga eta Altzerrekaz gain Ander Sarriugarte durangarra eta Bittor Altube abadiñarra egon ziren Balmasedako Klaret Antzokian jokatutako eskolartekoen finalen. Beste laurak Amaiur Atxa, Maddi Egiguren, Maite Sarasola eta Peri Irastorza izan ziren.

Zortziko handian eta txikian ofiziotan egin ondoren, bakarka gaiari erantzun zioten zortzi bertsolariek. Ariketa horien ostean, Pagonabarraga eta Altzerreka izan ziren buruz-burukora sailkatu ziren bi lehiakideak. Azken txanpan, puntuari erantzun eta gai bati bertso bana bota behar izan zioten eta eginbehar horretan Pagonabarragak batu zituen puntu gehien eta 2018ko Bizkaiko eskolarteko txapela lortu zuen. Txapela Miren Amurizak ipini zion txapeldunari.

Pagonabarraga eta Altzerreka, buruz burukoa jokatu zuten bertsolari biak, ekainaren 9an Saran jokatuko den Euskal Herriko Eskolarteko finalean egoteko txartela lortu zuten.

Aitor Bizkarra onena arratsaldean

Bizkaiko eskolarteko bat-batekoaren finala jokatzeaz gain, Balmasedako ekitaldian idatzitako bertsoen finala ere jokatu zen. DBH3, DBH4 eta Batxillegokoen atalean, bigarren saria eskuratu zuen Ermua BHIko Irune Basagoitik eta DBHko 2. mailako atalean berriz, hirugarren saria eskuratu zuen Durangoko San Jose Jesuitak ikastetxeko Begotxu Garibik.

Bazkalostean, Bizkaiko Bertsolari Txapelketako Udabarriko fasearen zazpigarren saioa jokatu zen Klaret Antozkian. Agertokian azaldutako sei lehiakideetatik hiru, Beñat Molina durangarra, Aitor Bizkarra abadiñarra eta Jon Ander Urkiaga zornotzarra, Durangaldekoak izan ziren.

Eskualdeko hiru bertsolariek lan txukuna egin zuten. Aitor Bizkarrak lortu zuen lehenengo postua 196,5 punturekin; Urkiaga hirugarrena izan zen 157,5 punturekin eta Molina laugarren sailkatu zen 133,5 punturekin. Bigarrena, Ion Berrocal (160) izan zen eta bosgarrena eta seigarrena, hurrenez hurren, Aritz Landeta (125,5) eta Iñaki Lersundi (122,5) izan ziren.

Datorren asteburuan Udabarriko faseko zortzigarren saioa jokatuko da Elorrioko Arriola Antzokian. Ekitaldia arratsaldeko 17:30ean hasiko da.

La entrada Gorka Pagonabarragak irabazi du Bizkaiko Eskolarteko txapelketa se publicó primero en durangon.com.