Ohiko egoeran Elorrioko Txintxirri Ikastolako ikasle, irakasle, guraso eta laguntzaileek buru belarri izango ziren lanean domekan ‘Hel horri’ goiburuarekin egin behar zen 2020ko Ibilaldia ospatzeko. Baina osasun-larrialdia dela eta urriaren 18ra atzeratu da urtero egiten den Bizkaiko Ikastolen jai nagusia.

Antolatzaileek, hala ere, “gizarteari zor diogun erantzuna emateko ahalegin berezia” egingo dutela diote eta horrekin batera, “Ibilaldiak hasieratik definitu dituen helburuak” bete nahi dituztela ere. Baina “arduraz eta erantzukizunez” jokatuko dutenez, Ibilaldia ”baldintza seguruetan” nahi dute egitea, “sormena landuz eta ​elkarlanean​”.

Hala ere, maiatzaren 31 “gure egutegian egun berezia” delako, aukeratutako leloak adierazten duenari jarraituz ​#helIbilaldiari, #helegunari, #helhorri proposatzen dute eta egun horretarako prestatutako ekitaldi bereziari “indarrez eta gogoz” heltzeko gonbidapena luzatu dute.

Eguneko ekitaldiak “Ibilaldiko web gunearen bidez jarraitu ahal izango den saio berezia” osatuko dute. Goizeko 11:00etatik aurrera bertsoak, musika, magia, dantza eta bestelako ikuskizunak izango dira ikusgai, bi ordu iraungo duen emanaldian.

Ikuskizunetan ikastolako guraso, ikasle, langile eta irakasleek parte hartzen dute. “Beste ikastoletako ikasleak ere animatu dira beraien ekarpenak bidaltzen eta arte eta ikuskizunen munduko lagun asko ere” agertuko direla azpimarratu dute antolatzaileek.

La entrada Emanaldi berezia eskainiko dute domekan Ibilaldiko web gunean se publicó primero en durangon.com.

Maiatzaren 31n Elorrioko Txintxirri ikastolaren antolaketarekin ospatu behar zen Ibilaldia 2020 bertan behera geratu bada ere, antolatzaileek aurrerako data baten egiteko asmoa iragarri dute. “Aurtengo Ibilaldia atzeratzea beste aukerarik ez dugu”, adierazi dute sare sozialen bidez zabaldutako idatzi baten.

“Osasun egoera egun batetik bestera aldatzen da eta ez dakigun noiz egin ahal izango dugun aurtengo Ibilaldia”, adierazi du David Cobos Txintxirri Ikastolako zuzendariak.

‘Hel horri’ goiburuarekin ospatu behar zen Bizkaiko Ikastolen jaiaren atzerapena “osasun larrialdia zenbat denboraz luzatuko den jakiterik ez dagoela eta” hartu dute antolatzaileek. Ibilaldiaz gain, ikastolen udaberriko beste jaiak ere, Herri Urrats eta Araban Euskaraz hain zuzen, atzeratu egingo dira.

“Urte osoa lanean daramagu jaialdi erraldoia gogoz prestatzen eta horretan jarraituko dugu”, adierazi dute antolatzaileek. Izan ere “milaka euskaltzale eta ikastolazale ere irrikitan egoten dira urtero jaiotara etortzeko, euskarari, ikastoloi eta euskal kulturari sustengua emateko. Guztiei adierazi nahi diegu gure esku dagoen guztia egingo dugula aurten Ibilaldira etortzeko aukera izan dezaten”.

Antolakuntzari laguntza eman dioten dozenaka laguntzaile eta erakunderekin eta hamaika kultur-eragilerekin “lanean jarraitzeko asmo irmoa” adierazi dute eta “baldintzak hobetzen direnean” Ibilaldia egingo dela baieztatu dute. “Egoera garatzen den heinean aurreratu ahal izango dugu data berria”, diote.

La entrada Elorrion maiatzean ospatzekotan zen Ibilaldia 2020 atzeratzea erabaki dute antolatzaileek se publicó primero en durangon.com.

Aurtengo Ibilaldiaren antolatzaileen arabera “emozio bat transmititu” eta “gauzak egiteko gogoa” azaldu nahi duen bideokliparen grabaketa eta edizioa Kimetz Blancok eta Imanol Garaizabalek egin dute eta dronarekin berriz, Aritz Kortazar aritu da.

Irudietan agertzen diren Txintxirriko ikasle, gazte, irakasle, guraso, ikasle ohi, guraso ohi eta urrunagoakoekin batera, ikastolak eskaintzen dituen hainbat baliabide erakusten dira, edizio honetarako egindako kantaren erritmora.

‘Hel Horri’ kantaren hitza Itsaso Basaurik, Haritz Luzarrek eta Iraitz Erkiagak idatzi dute eta kantaren grabaketan Mockers taldeko Asier Elias, Urkotxo txaldeko Urko Igartiburu, Han taldeko Gorka Molero, Sugoi taldeko Mikel Quesada, Oxabi taldeko Eneko Arraibi eta Adrian Lopez, Hayatola taldeko Iñigo Arruabarrena, The Galampers taldeko Itziar Azkarate, Puro Txileko Mamen Rodrigo eta Zoe Igartiburu izan dira.

Leloa eta logoa

Ikastolako familiak egindako lan saioetatik sortutako ‘Hel Horri’ leloaz gain, hiru elorri zuhaixka islatzen duen logoa ere aukeratu dute aurtengo Bizkaiko ikastolen jaiaren ezaugarri. Leloarekin zein logoarekin “Elorrio herriak elorriari zor diola izena” kontuan hartu dituzte.

Elorrioko ikastolak 50 urte bete zituen iaz eta aurten antolatuko duen Ibilaldia bere historiako hirugarrena izango da, 1999koa zein 2006koak herrian egin baitziren.

Oraingoan ere Txintxirri ikastolaren ​hezkuntza eredua ezagutzera ematea; erronka berriei aurre egiteko ​baliabideak eskuratzea edo herriko eragile eta taldeekin ​harremanak sendotzea dira Ibilaldiaren helburu nagusiak.

Antolatzaileak, hala ere, euskararen sustapena bultzatzea; sexu eta generoari lotutako rolak gainditzea; prestatuko diren ekintza guztietan jasangarritasunaren ikuspuntua izatea; ikastolako eta herriko eragile guztien arteko prozesu parte hartzailea gauzatzea; edo behar desberdinetako pertsonentzako Ibilaldia diseinatzea, izango dira aurtengo erronketako batzuk.

La entrada Elorrion aurten ospatuko den Ibilaldiaren bideoa aurkeztuko da arratsaldean Herriko plazan se publicó primero en durangon.com.

2020ko maiatzaren 31n Txintxirri Ikastolaren antolaketarekin Elorrion ospatuko den 41. Ibilaldiak ‘Hel horri!’ goiburua izango du, gaur bertan eman ezagutzera eman denez. Bizkaiko ikastolen jaia hirugarrenez egingo da Elorrion, lehena 1999an egin baitzen eta bigarrena 2006an.

Aukeratutako leloa eta logoa, udaberrian ikastolako haurrak eta gurasoak burututako lan saioaren kontzeptu eta ideia ezberdinetan oinarritzen da. “Lan saio horretan lortutako irudi eta esaldiak guraso eta irakasleek osatutako lantalde batean aztertu, aukeratu eta findu ostean, behin-betiko irudi eta hitzak lortu ditugu, ‘Hel Horri!’ leloa eta hiru elorri zuhaixka direlarik azken emaitza”, adierazi dute Eider Barrenak eta David Cobosek, Txintxirri ikastolako lehendakaria eta zuzendaria, hurrenez hurren.

Elorrio herriak elorriari izena zor omen diola eta, “leloa eta irudia lantzerakoan abiapuntu hori hartu dugu, izenak eta izanak duten lotura oinarri hartuta”, antolatzaileen esanetan.

Elorrioko ikastolak 50. urteurrena ospatu zuen iaz, 1968ko urtarrilaren 12an zabaldu baitzituen ateak. Orain ere ibilbide horretan izandako konpromisoari eusten dio, izan ere, “lanean jarraituko du ‘arduraz hezi, nortasunez hazi’ ohiko leloari jarraituta”, Barrenak eta Cobosek adierari dutenez.

Ibilaldiaren helburu nagusiak, besteak beste, euskararen sustapena bultzatzea; sexu eta generoari lotutako rolak gainditzea eta antolatzen diren ekintza guztietan jasangarritasunaren ikuspuntua izatea dira. Gainera, Ibilaldia prozesu parte hartzailea izatea nahi du ikastolako eta herriko eragile guztien artean, eta behar desberdinetako pertsonentzako Ibilaldia diseinatuz, berdintasun-ezberdintasuna bultzatzeko asmoa agertzen du.

La entrada ‘Hel horri!’ goiburuarekin ospatuko da Elorrion 2020ko Ibilaldia se publicó primero en durangon.com.