Bizkaiko Bertsolari Txapelketa Bilboko Casillan jokatu zen atzo, 4.700 bertsozalerekin, zortzi finalistekin gozatzen. Aitor Etxebarriazarragak irabazi zuen txapela eta Onintza Enbeita geratu zen bigarren. Txaber Altube eta Aitor Bizkarra abadiñarrak hirugarren eta laugarren sailkatu ziren, eta Gorka Pagonabarraga zortzigarren.

Horrela geratu zen sailkapena:

Aitor Etxebarriazarraga Gabiola…………….1163
Onintza Enbeita Maguregi…………………….1162.5
Txaber Altube Sarrionandia…………………..698,5
Aitor Bizkarra Ruiz………………………………. 694,5
Xabat Galletebeitia Abaroa……………………691
Jone Uria Albizuri…………………………………691
Oihana Bartra Arenas…………………………..689
Gorka Pagonabarraga Agorria………………671

Gai-emaile beharretan Idoia Anzorandia Kareaga eta Igor Menika Bengoetxea. Epaileak, ostera, hurrengoak izan ziren: Ainhoa Arregi Elosua, Ander Arrien Aspiazu, Garazi Mendoza Agirre, Jurgi Fuentes Goikoetxea, Marta Ortiz Mateo, Mirari Azula Aurrekoetxea eta Miriam Juaristi Urizar.

Idazkari beharretan Itziar Basterretxea Olarreaga aritu zen.

La entrada Aitor Etxebarriazarragak irabazi du Bizkaiko Bertsolari Txapelketa eta Txaber Altube hirugarren izan da se publicó primero en durangon.com.

Busturian eta Zallan jokatuko dira  bihar ‘Udabarria Bertsotan’ sailkapen faseko azken bi saioak. Kanporaketetan puntu gehien lortzen dituztenek udazkenean ospatuko den Bizkaiko Bertsolari Txapelketan parte hartu ahal izango dute.

Kanporaketa fase honen azken bi saioetan, eskualdeko bost bertsolarik kantatuko dute. Saio biak arratsaldeko 18:30ean hasiko dira.

Zallako El Longar jauregiko kaperan, Ander Aldazabal zornotzarra, Bittor Altube abadiñarra, Garikoitz Sarriugarte zaldibartarra eta Iruri Altzerreka garaitarra izango dira.

Busturiako kultur etxean berriz, Irune Basagoiti ermuarra jarriko da mikrofonoaren aurrean.

Orain arte jokatu diren sei kanporaketetan eskualdeko bost bertsolari lehiatu dira. Igor Galartza abadiñarra eta Araitz Katarain mallabitarra, Urdulizen eta Durangon kantatu zuten, 176 eta 183 puntu metatuz, hurrenez hurren. Ander Sarriugarte durangarra Diman kantatu zuen, eta 167,5 puntu lortu zituen. Bittor Salterain eta Ander Elorriaga durangarrek Aulestin eta Sopelan izan ziren eta lehenak 134,5 puntu lortu zituen eta bigarrenak 150,5.

Udazkenean hasiko den Bizkaiko Bertsolari Txapelketan 36 lagunek parte hartuko dute. Kanporaketetan 2018ko finalistek parte hartzeko eskubidea izango dute, baita 2021eko final aurrekoetan lehiatu zirenek ere. Beraz, izena eman dutenen kopuruak baldintzatuko du Udabarrian Bertsotan txapelketatik sailkatuko den bertsolarien kopurua.

La entrada Eskualdeko bost bertsolarik kantatuko dute Udabarria Bertsotan kanporaketaren azken bi saioetan se publicó primero en durangon.com.

Unai Mendiburu algortarra gailendu zen Plateruenan jokatuko saioan.

Bizkaiko Bertsolari txapelketa hasi aurreko Udabarria Bertsotan kanporaketa saioak jokatzen hasi dira aurreko astean, eta lehenengo jardunaldian Araitz Katarain mallabitarra eta Igor Galarza abadiñarra lehiatu dira.

Katarainek saio txukuna egin zuen Durangoko Plateruena kultur aterpean izan zen lehiaketan, bigarren postua eskuratu baitzuen 183 punturekin. Irabazlea, Unai Mendiburu izan zen 194,5 punturekin.

Urdulizen jokatu zen ekitaldian berriz, Igor Galarzak hartu zuen parte eta lehiaketan eskuratu zituen 176 puntuekin hirugarren postuan kokatu zen, Aissa Intxaustiren (203,5) eta Beñat Bilbaoren (178) atzetik.

Hurrengo saioak Diman eta Muxikan jokatuko dira, eguenean hilak 11, eta eskualdeko ordezkari bakarra izango da, Arratian izango den ekitaldian Ander Sarriugarte durangarrak abestuko baitu.

La entrada Araitz Katarain bigarren eta Igor Galarza hirugarren izan ziren Udabarria Bertsotan saioetan se publicó primero en durangon.com.

Erabakita gelditu da Bizkaiko Bertsolari Txapelketako finalean arituko den zortzikotea eta azken ekitaldian egongo diren lehiakideen artean Durangaldeko bi partaide izango dira: Gorka Pagonabarraga eta Aitor Bizkarra.

Lehiaketa azpimarragarria egin du Pagonabarraga durangarrak, jokatu dituen bi kanporaketetako irabazlea izan eta gero. Bere lehen agerraldia Igorren jokatutako kanporaketan izan zuen eta 482.50 puntu lortuta irabazi zuen saioa.

Bigarren ekitaldia Etxebarrian jokatu zen finalaurrekoan izan zuen eta bertan ere onena izan zen 529.0 puntu pilatuta. Saio horren azken txanpan, gainera, oraindik txapelduna den Onintza Enbeitari gailendu zitzaion.

Aitor Bizkarra abadiñarra bestalde, finalaurrekorako sailkatuta zegoen 2018an jokatutako aurreko txapelketako finalista izan zelako. Edizio honetako partaidetza bakarra Galdakaoko finalaurrekoa izan zuen eta bertan bigarren postuan sailkatu zen 541.50 punturekin, saioa irabazi zuen Etxahun Lekuek baino sei puntu gutxiagorekin.

Pagonabarraga eta Bizkarraz gain Aitor Etxebarriazarraga, Etxahun Lekue, Jone Uria, Nerea Ibarzabal, Onintza Enbeita eta Xabat Galletebeitia lehiatuko dira Miribillako oholtzan.

Eskualdeko beste bertsolariak

Eskualdeko beste hiru bertsolari ere izan dira 2021eko finalaurrekoetan. Miren Amuriza Etxebarriko saioan aritu zen baina hirugarren postuan sailkatu eta finaletik kanpo gelditu zen. Txaber Altube eta Eneko Abasolo ‘Abarkas’ berriz, Larrabetzun lehiatu ziren Bilborako txartelaren bila baina hirugarren eta bosgarren postuetan sailkatu eta finaletik kanpo gelditu ziren.

2021eko edizioan lehiatu diren Garikoitz Sarriugarte zaldibartarrak, Igor Galartza abadiñarrak eta Iruri Altzerreka garaitarrak ez zuten lortu aurrera egitea euren kanporaketetan.

La entrada Gorka Pagonabarraga eta Aitor Bizkarra izango dira eskualdeko ordezkariak Bilboko finalean se publicó primero en durangon.com.

1994tik 2008ra Durangaldeko bertsolariak izan baziren Bizkaiko Bertsolari Txapelketaren dominatzaileak, azken hamarkadan ez da eskualdeko txapeldunik izan lurraldeko lehiaketan, partaideen kopuruak gora egin duen arren.

Durangaldeko bertsolari­tzak goia jo zuen XX. mendeko azken hamarkadan eta XXI. mendeko lehenengoan Unai Iturriagak lortutako bi txapelekin (1994 eta 1996) eta Igor Elortzaren bostekin (1998, 2000, 2002, 2004 eta 2008). Iturriagak eta Elortzak lurraldeko txapelketa albo batera utzi ostean, hainbat finaletan sartu dira Beñat Ugartetxea, Eneko Abasolo ‘Abarkas’ zein Miren Amuriza, baina txapela janztea ez dute lortu.

‘Abarkas’ eta Amurizak abenduaren 15ean jokatu zen azken finalean kantatu zuten eta beraiekin batera eskualdeko ‘harrobiko’ beste ordezkari bat izan zen: Aitor Bizkarra gaztea. “Finalean bi izen nabarmendu ziren. Batetik, Onintza Enbeita, txapelduna izan zelako, eta bestea Aitor Bizkarra, oso lan polita egin zuelako nahiz eta bere lehen finala izan. Harro egoteko saioa egin zuen eta jendeak bere izena apuntatu du”, Iturriaga txapeldun ohiaren arabera.

Amurizak eta ‘Abarkas’ek ere lan polita egin zutela uste du Iturriagak. “Miren oso ondo hasi zen baina gero, presioagatik edo gaiengatik, bere egunik onena ez zuen izan. ‘Abarkas’ berriz, oso ondo ikusi nuen, bera disfrutatzera joan zen eta pozik egoteko moduko saioa egin zuen”.

Durangaldeko 14 partaide

Apirilean hasi zen 2018 Biz­kaiko Bertsolari Txapelketak 87 partaide izan ditu guztira eta horietako 14 Durangaldekoak. Batzuk beteranoak dira lehiaketan, baina gehienak 20 urte inguru dituzte eta, kasu batzuetan, helduen txapelketan lehenengo aldiz parte hartu dute.

Bizkarrak finalean sartzea lortu bazuen bere bigarren saiakeran, beste gazteek ez lortzea ez da porrot bat bezala hartu behar “inondik inora. Gatxa da lehenengo ahaleginean final batean sartzea” Iturriagaren esanetan. Horregatik uste du kontuan hartzeko modukoa dela Durangoko, Zornotzako eta Berrizko eskoletan zein gaztetxoekin egiten den lana, “bertsolaria ez delako bakarka egiten den lan bat”.

Aurtengo txapelketan parte hartu dutenek eta eskoletan dauden bertsolariek Durangaldean ‘harrobia’ badagoela erakusten dute eta egiten ari den lanak emaitzak ematen dituela. Izan ere, aurten lehenengoz nagusien txapelketan parte hartu duen Gorka Pagonabarragak Bizkaiko zein Euskal Herriko Eskolarteko Txapelketak irabazi ditu. Etorkizunari buruz baikorra bada ere, harridura puntu bat aitortzen du Iturriagak, “Durangoko eskolan ez dagoelako neskarik eta Mirenek Berrizen duen eskolan ia denak neskak direlako”.

Durangaldeko bertsolariak 2018ko Bizkaiko Bertsolari Txapelketan

2018ko finalistak

• Aitor Bizkarra (Abadiño, 1996). Finalaurrekoetara heldu zen 2016an.
• Miren Amuriza Plaza (Berriz, 1990). 2010, 2012 eta 2016an ere finalista izan zen. Finalaurrekoetara heldu zen 2008 eta 2014 urteetan.
• Eneko Abasolo ‘Abarkas’ (Iurreta, 1976). 2010ean ere finalista izan zen. Finalaurrekoetara heldu zen 2004, 2008, 2012, 2014 eta 2016 urteetan.

2018ko finalaurrekoetara heldu diren bertsolariak

• Beñat Ugartetxea Ostolaza (Mallabia, 1979). Finalista 2010 eta 2016an. Finalaurrekoetara heldu zen 2004, 2006, 2012 eta 2014 urteetan.
• Txaber Altube Sarrionandia (Abadiño, 1998). Finalaurrekoetara heldu zen 2016an.
• Gorka Pagonabarraga Agorria (Durango, 2000). Lehenengo aldiz parte hartu du.
• Garikoitz Sarriugarte Onaindia (Zaldibar 1976). Finalaurrekoetara heldu zen 2004 eta 2014 urteetan.

Udaberriko fasea gainditu ez zuten bertsolariak

• Iker Apraiz Solaguren (Atxondo, 1998).
• Peru Astigarraga Murgoitiobeña (Iurreta, 1999).
• Eneko Barruetabeña Bilbao (Durango, 1999).
• Igor Galartza Intxausti (Abadiño, 1998).
• Beñat Molina Uribe (Durango, 1999).
• Beñat Romero Maguregi (Zornotza, 1989).
• Jon Ander Urkiaga Egidazu (Zornotza, 1987).

La entrada Harrobiaren emaitzen zain se publicó primero en durangon.com.

Eskualdeko hiru bertsolari egongo dira, gutxienez, Bizkaiko Bertsolari Txapelketaren finalaurrekoetan, 2016ko finalistak izateagatik sailkatuta dauden Miren Amurizari eta Beñat Ugartetxeari Txaber Alturbe gehitu baitzaie atzo Zornotzako saioa irabazi eta gero. Aitor Bizkarra eta Gorka Pagonabarraga datorren asteburuan ahaleginduko dira txartela lortzen Plentzian.

Txaber Altube abadiñarra izan zen onena Amorebieta-Etxanoko Zornotza Aretoan atzo jokatutako Bizkaiko Bertsolari Txapelketaren hirugarren kanporaketan. Ekitaldira 300 bertsozaletik gora gerturatu ziren eta antzokia bete egin zen.

Bertsolari abadiñarrak hasierako lanetan oinarritu zuen bere garaipena, zortziko handian zein zortziko txikian botatako bertsoekin puntu gehien lortu zituen partaidea izan baitzen 110 eta 110,5 punturekin, hurrenez hurren. Gainera, hamarreko txikian ofiziotan botatako hiru bertsoekin ere puntu gehien eskuratu zituen bertsolaria izan zen eta beste bi frogetan hirugarren onena izan zen.

Altubek 478 puntu lortu zituen guztira eta saioa irabazi zuenez, abenduaren 1ean Lekeition jokatuko den hirugarren finalaurrekoan izango da. Zornotzako saioko bigarren postua Ander Elortegirentzat izan zen 472 punturekin eta ondoren Unai Mendiburu (466), Ander Ucelay (447), Inazio Vidal (419,5) eta Aitor Esteban (418) sailkatu ziren.

Bikandi eta Pagonabarraga

Eskualdeko bi bertsolari izango dira datorren domekan Plentziako Jai Alai frontoian, arratsaldeko bostetan,  jokatuko den laugarren kanporaketan, agertokian Aitor Bikandi abadiñarra eta Gorka Pagonabarraga durangarra izango baitira. Bikandi, Udaberriko fasean puntu gehien lortu zituen bertsolaria izan zen eta Pagonabarra 17. postuan sailkatu zen.

Plentziakoa azkenaurreko kanporaketa izango da eta ekitaldiko beste lau partaideak Arkaitz Zipitria, Julen Ibarguengoita, Peio Ormazabal eta Peru Vidal izango dira. Gai jartzaile beharretan Zihara Enbeita ariko da.

La entrada Txaber Altube izan zen Zornotzako kanporaketako bertsolari onena eta finalaurrekoetan egongo da se publicó primero en durangon.com.

Amorebieta-Etxanoko Zornotza Aretoan jokatuko da domeka arratsaldean Bizkaiko Bertsolari Txapelketaren Udagoieneko faseko hirugarren kanporaketa. Saioa arratsaldeko 17:00etan hasiko da eta agertokian Txaber Altube abadiñarra izango da beste bost bertsolarirekin lehian.

Domekako kanporaketan lehenengo postuan sailkatzen ahaleginduko da bertsolari abadiñarra, postu horrek bermatzen duelako finalaurrekoetan egoteko txartela. Hori lortzeko Urdulizko Aitor Esteban, Gernika-Lumoko Ander Elortegi, Artzentaleseko Ander Urcelay, Leioako Inazio Vidal eta Algortako Unai Mendiburu gainditu beharko ditu.

Ekitaldian egin beharreko lana Zortziko nagusian ofiziotan hiruna bertsorekin hasiko da eta ondoren, zortziko txikian ofiziotan beste hiruna bertso abestu beharko dituzte; puntua emanda bertso bi zortziko txikian; hamarreko txikian ofiziotan hiruna bertso eta bakarkako lanari ekingo diote azkenik, gai bati buruz bertso bi abestuz, doinu eta neurri librean.

Sarriugarte eta ‘Abarkas’

Orain arte jokatutako bi kanporaketetan eskualdeko bi ordezkarik abestu dute. Garikoitz Sarriugarte zaldibartarrak urriaren 6an abestu zuen Gernika-Lumoko Lizeo Antzokian. Udagoieneko faseari hasiera eman zion saio horretan laugarren postuan sailkatu zen 439 punturekin.

Kanporaketa faseko bigarren saioa aurreko domekan jokatu zen Santurtziko Serantes Aretoan eta ekitaldian Eneko Abasolo ‘Abarkas’ek abestu zuen. Saio txukuna egin arren iurretarrak bigarren sailkatu zen 460 punturekin, ekitaldia irabazi zuen Malen Amenabarren atzetik.

Beraz, Sarriugarteren zein ‘Abarkas’en aukerak finalaurrekoetan egoteko azken kanporaketaren ostean erabakiko dira. Guztira bost bertsolari izango dira lortutako puntuen arabera aurrera egingo dutenak; beste bost, kanporaketa bakoitzeko irabazleak izango dira eta finalaurrekoan egongo diren beste zortziak 2016ko finalistak izango dira.

La entrada Txaber Altubek abestuko du Zornotzako Bizkaiko Bertsolari Txapelketaren kanporaketan se publicó primero en durangon.com.

38 bertsolari lehiatuko dira Bizkaiko txapelaren bila.

Eskualdeko zazpi bertsolari lehiatuko dira urriaren 6an hasiko den Bizkaiko Bertsolari Txapelketaren azken fasean. Seina lehiakide izango dituzten bost kanporaketa eta hiru finalaurreko jokatu ondoren, zortzi bertsolari sailkatuko dira abenduaren 15ean Bilbao Arenan jokatuko den finalerako.

Udabarriko fasean izan ziren 78 bertsolarietatik 29k lortu zuten Udagoieneko kanporaketa faserako txartela, 30.a 2014ko finalista izan zen Oihana Bartra izango baita.

Apirilean eta maiatzean jokatutako 13 saioen ondoren, eskualdeko bost bertsolarik Udagoieneko faserako sailkatzea lortu zuten. Aitor Bizkarra abadiñarra izan zen sailkapeneko lehena 196,5 punturekin, herrikidea den Txaber Altube hirugarrena izan zen 185,5 punturekin eta Eneko Abasolo ‘Abarkas’ iurretarra zazpigarren postuan sailkatu zen 175 punturekin. Gorka Pagonabarraga durangarrak eta Garikoitz Sarriugartere zaldibartarrak ere sailkatzea lortu zuten 167 eta 162,5 punturekin, hurrenez hurren. Bildutako puntuak sailkatzeko balio zuten eta ez dira kontuan hartuko kanporaketa saioetarako.

Saioan Zornotzan eta Berrizen

Iragarritako bost kanporaketetatik lautan, eskualdeko ordezkariak izango dira. Garikoitz Sarriugarte izango da lehen parte-hartzailea, Gernika-Lumoko Lizeo Antzokian, urriaren 6an jokatuko den saioan hain zuzen. Ondoren, Eneko Abasolo ‘Abarkas’ izango da Santurtziko Serantes Aretoan urriaren 14an;  Txaber Altube urriaren 21ean Amorebieta-Etxanoko Zornotza Aretoko saioan egongo da eta Aitor Bizkarra eta Gorka Pagonabarraga urriaren 28an Plentziako Jai Alai frontoian jokatuko den kanporaketan abestuko dute.

Bost kanporaketatako irabazleak eta fase horretan puntu gehien lortu dituzten bost bertsolariek sailkatuko dira finalaurrekoetarako. Fase horretan 2016ko zortzi finalistak, Miren Amuriza berriztarra eta Beñat Ugartetxea mallabitarra tarteko, lehiatzen hasiko dira.

Amurizak ‘etxean’ kantatuko du azaroaren 18an, lehenengo finalaurrekoa Berrizko pilotalekuan jokatuko baita. Ugartetxeak berriz, Igorreko Udal kiroldegiko saioan kantatuko du azaroaren 25ean. Hirugarren finalaurrekoa Lekeition jokatuko da. Bilboko finalean finalaurre bakoitza irabazitako bertsolariak eta puntu gehien metatutako bostak egongo dira.

La entrada Eskualdeko zazpi bertsolari lehiatuko dira Bizkaiko txapelketaren Udagoieneko fasean se publicó primero en durangon.com.

Urte oparoa darama Gorka Pagonabarraga bertsolari durangarrak. Maiatzaren 5ean Eskolarteko Bizkaiko Bertsolari Sariketa irabazi zuen Balmasedan eta ekainaren 5ean eskolarteko Euskal Herriko txapela jantzi zuen Saran. Bizkaiko Txapelketaren Udabarriko faseko saioan ere maila bikaina eman zuen: maiatzaren 13an Getxon jokatutako kanporaketan lortutako puntuekin lehiaketan aurrera egiteko eta Udagoieneko fasean egoteko baliagarriak izan ziren.

-Orain arte lortutakoak indarra emango dizu Bizkaiko Bertsolari Txapelketaren Udagoieneko faseari ekiteko, ezta?
-Bai, oso gogotsu joango naiz saiora, nahiz eta aldez aurretik dakidan aurrera egitea zaila izango dela. Finalerdietara pasatzea zaila izango da, baina saiatuko naiz.

-Prestaketa berezirik egingo duzu?
-Ez dut uste. Bertso Eskolan batuko gara, betiko martxan. Baina ezer berezirik prestatzeko asmo barik; betiko antzera jarraituko dut.

-Ez zenuen ezer berezirik prestatu Eskolarteko txapelketetarako?
-Ez, nahiko normala izan zen dena. Oso motibatuta egon ginen bertsotan egiteko. Ofizioak eta betiko ariketak egin genituen.

-Hori da maila ematea!!!
-Bueno, txapelketak prestatu genituen baina ezer berezirik egin barik. Barikuetan batzen gara Bertso Eskolan eta bertan ofizioak, bakarkako ekitaldiak… denetako ariketak egiten ditugu. Aldez aurretik landutakoari errepasoa eman eta finaletan izango ziren ariketak landu.

Pagonabarragak Saran jokatutako Eskolarteko Euskal Herriko Bertso Txapelketa irabazi zuen ekainean.

-Zenbat urte daramazu bertsolaritzan?
-Hamalau urte nituela hasi nintzen, DBHko 3. ikasturtean. Niri betidanik gustatu zait bertsolaritza. Bertso Eskolan zeuden lagun batzuk ezagutzen nituen eta beraiekin hitz egin eta gero animatu egin nintzen. Gainera, jakina, bertsotan egiteko beharrezkoa da gustukoa izatea. Azken boladan, inoiz baino bertso saio gehien ikusten nabil. Ekitaldi pila ikusten nabil interneten; ‘friki’ totala bilakatu naiz.

-Nortzuk izan dituzu irakasle?
-Bertso Eskolan, hasieratik, Eneko Abasolo ‘Abarkas’, Gorka Lazkano, Unai Iturriaga eta Manu Goiogana izan ditut irakasle. Beraiek animatu ninduten Eskolarteko sariketara apuntatzeko. Aurtengoa hirugarren txapelketa izan dut. Aurreko bietan finalean lehiatu nintzen eta aurten Bizkaikoa irabazi eta Euskal Herrikora joateko txartela lortu nuen.

-Eta Saran Euskal Herriko txapela jantzi zenuen.
-Hori da. Eta oso pozik gainera.

-Bizkaiko Txapelketaren Udabarriko fasean pilatutako puntuak Udagoieneko faserako txartela eskuratu zenuen.
-Bai, espero nuena baina errazagoa izan zen. Puntuak sobera izan nituen baina Udagoienekoa beste gauza bat izango da.

-Txistuarekin ere hainbat lehiaketa irabazi dituzu.
-Bai, txiki-txikitan hasi nintzen, zortzi bat urtekin. Hernaniko Txistulari Gazteen Txapelketa hiru aldiz irabazi dut; azkena iaz.

-Bertsolari edo txistulari.
-Azken boladan, egia esanda, txistua apur bat baztertuta daukat. Motibazioa galdu dut, edo hobe esanda, beste zaletasun batzuetan murgiltzen naiz, Bertso Eskolan esaterako.

-Kirola ere gogoko duzu, ezta?
-Bai. Urte askotan triatloi taldean ibili naiz baina aurten belaunetatik lesionatuta egon naiz eta ez dut ezer egin. Ez da izan ezer graberik, eta aurten berreskuratzeko asmoa dut.

La entrada “Bertso ekitaldi pila ikusten nabil interneten; ‘frikia’ bilakatu naiz” se publicó primero en durangon.com.

‘Abarkas’ek irabazi zuen atzo arratsaldean Getxon jokatutako saioa.

Eneko Abasolo ‘Abarkas’ eta Gorka Pagonabarraga eskualdeko bertsolariek saio txukunak eskaini zituzten atzo Getxoko Faduran jokatutako Bizkaiko Bertsolari Txapelketaren udabarriko fasean. Iurretarak arratsaldeko saioa irabazi zuen eta durangarra bigarrena izan zen goizeko ekitaldian.

Eskualdeko bi bertsolari izan ziren arratsaldeko saioan. Ekitaldiko irabazlea ‘Abarkas’ iurretarra izan zen 175 puntu bildu ostean eta Beñat Romero zornotzarra txandako seigarren sailkatu zen 144 punturekin.

Goizeko ekitaldian berriz, Gorka Pagonabarraga izan zen eskualdeko parte-hartzaile bakarra. Aurreko asteburuan Bizkaiko Eskolartekoa irabazita gerturatu zen Fadurara. Lan txukuna egin ondoren bigarren sailkatu zen 167 punturekin, ekitaldiko irabazlea izan zen Peio Ormazabal baino hiru gutxiago, hain zuzen.

Bezperan Elorrioko Arriola Antzokian jokatutako saioan, Ander Elortegi gernikarra gailendu zen 178 punturekin.

Hamar saio jokatu ondoren, hiru ekitaldi falta dira Bizkaiko Bertsolari Txapelketaren Udabarriko faseari amaiera emateko eta eskualdeko bertsolariek sailkapenaren goialdean daude. Behin behineko liderra Aitor Bizkarra abadiñarra da, 196,5 punturekin; Txaber Altube herrikidea dago hirugarren postuan, 185,5 punturekin, eta Faduran lortutako 175 puntuekin behin-behineko sailkapeneko zazpigarren postuak jarri da ‘Abarkas’.

La entrada ‘Abarkas’ eta Pagonabarraga, lehenengo eta bigarren sailkatu ziren Getxon jokatutako saioetan se publicó primero en durangon.com.