Zaldibarko Udalak azterlan bat eskatu du Juan de Aranoak ospitale psikiatrikoko kapera neorromantikoan margotutako freskoen kontserbazio egoera ebaluatzeko. Artelanek “urteetako mantenu falta” izan dute eta egoeraren txostena Bizkaiko Foru Aldundiko teknikariek egingo dute.

Zaldibarko Udalak, jarduera horrekin, “pauso berri bat eman du herriko ondarea babesteko norabidean”. Helburu horrekin, Eneritz Azpitarte alkatea eta Bizkaiko Foru Aldundiko hiru teknikari eta praktiketan dabiltzan bi arte ikasle aurreko astean gainbegiratu zituzten Aranoaren freskoak.

Freskoen kontserbazio egoera bertatik bertara aztertu ondoren, Bizkaiko Foru Aldundiak bere gain hartuko du margolanen egoera ebaluatuko duen txostena egiteko ardura, Zaldibarko Udalaren eskariz.

Lehentasunezkoa

“Urteetako mantenu faltaren ondorioz, margolanen egoera kaltetzen joan da”, Udal arduradunek adierazi dutenez. Izan ere, “sarritan, pinturen arrastoak topatu izan dira kaperako zoruan; pelikula piktorikoaren zatiak batzuetan; eta horma irudien kaltetzeagatiko hautsa beste hainbatetan”. Gainera, kaperako estalkiak hainbat hezetasun arazo izan ditu hamarkadetan zehar.

Zaldibarko Gobernu taldearentzat “lehentasunezkoa da herriko ondarea zaintzea eta berreskuratzea”, eta kaperako margolanekin “bide horretan sakonduko dugu”. Horregatik, “Foru Aldundiarekin hasitako lankidetza bezalatsu, gure esku dauden tresna guztiak eskainiko ditugu margolanok zaintzeko eskuduntza duen instituzio publikoari, Eusko Jaurlaritzari, bidea errazteko”, azaldu du Azpitartek.

Juan de Aranoak 1928an ekin zion Zaldibarko ospitale psikiatrikoko kapera neorromantiko freskoak egiteari eta 1930ean amaitu zituen. Irudietan Ama Birjinari buruzko eszenak, Kristoren haurtzaroa eta bere Pasioa irudikatu zituen.

Juan de Aranoa Carredano margolaria Bilbon jaio zen 1901ean. Ikasketak Bizkaiko hiriburuko Arte eta Lanbide Eskolan egin ondoren, Parisen eta Italian garatu zuen artearen inguruko jakintza.

La entrada Zaldibarko Udalak azterlan bat eskatu du ospitaleko kaperako margolanen egoera ezagutzeko se publicó primero en durangon.com.

Berrizko Udalak uztailaren 5etik 23ra egingo diren ‘Bizi Berriz Udan!’ deituriko udalekuak prestatu ditu eta dagoeneko izena emateko epea ireki du. Aste beteko iraupena izango duten tailerrak 4 eta 16 urte bitarteko ume eta gazteei zuzenduta daude.

Udalekuak goizeko 10:00etatik 13:00etara bitarteko ordutegia izango dute eta bertan mendi ibilbideak, orientazioa eta segurtasuna, birziklapena, ur jolasak, kirol anitza, zirku tailerrak, artelanak edo espeleologia bezalako tailerretan parte hartzeko aukera egongo da. Udalekuen helburu nagusia “euskaraz gozatzea da” antolatzaileen esanetan.

Udalekuetan parte hartzeko plaza kopurua mugatua da eta maiatzaren 23a arte egin daiteken aurretiko izen-emateak 30 euroko kostua du. Plaza libreak egon ezkero, inskripzioa egiteko beste txanda bat irekiko da ekainaren 1etik 13ra eta kasu honetan aste gehiago hautatu ahal izango da.

Udalekuei buruzko informazioa zein izena emateko orria www.berriz.eus webgunean eskuratu daiteke. Aurreinskripzioa egiteko Bizi Berriz Udan! atalean klikatu beharko da, astea hautatu eta instantzia bete.

Informazio gehiago behar duenak 946 22 53 69 telefonora deitu edo euskara@berriz.eus helbide  elektronikora idatzi dezake.

La entrada 4 eta 16 urte bitarteko berriztarrei zuzendutako udalekuak antolatu ditu Udalak uztailerako se publicó primero en durangon.com.