Eroski Fundazioko Alejandro Martínez Berriochoa, Elorrioko Alkatea Idoia Buruaga eta Kainaberako Juan Mari Lersundi izan ziren sinadura ekitaldian.

Elorrioko Udalak, Eroski Fundazioak eta Gobernuz Kanpoko Kainabera elkarteak Elikagaien Banaketa Programarako lankidetza hitzarmena sinatu berri dute. Ekimen horren bidez Eroskik 6.000 euro jarriko ditu, Udalak Galartzauria kaleko lokal bat jarriko du eta elikagaiak Kainaberak banatuko ditu.

Hitzarmen horrek ahalbidetzen duen hileroko elikagai loteen banaketaren bidez, “Elorrioko familia batzuek bizi duten momentu latza ahal den neurrian leuntzea du helburu”, ekimenean parte hartzen duten eragileen arabera.

Bost urtetik honantz Elorrioko familia behartsuenentzat laguntza Bizkaiko Elikagaien Bankutik dator -Europa Batasuneko programa baten bidez-, munduko pertsona eta gizarteen giza garapen jasangarriagoa lortzeko bidean laguntzen duen Kainabera elkartearen inplikazioari esker.

15 familia 2018an

Hitzarmen honen bidez, Gobernuz Kanpoko Erakundeak elikagaiak edota produktuak erosteko ardura izango du eta ondoren jasotakoa eta erositakoa Elorrioko familien artean banatuko ditu. Horrela, 2018 urtean, batez beste, premian zeuden 15 familiari laguntza eman zitzaien hilero.

Eroski Fundazioak jarriko dituen 6.000 euroak kooperatibak duen elkartasun helburuari erantzuten dio. Izan ere, horrelako hitzarmenak “gure inguruko pertsona behartsuenei laguntzen aritzen diren erakundeekin, elkarteekin edo gobernuz kanpoko erakundeekin sinatzen ditugu”, Eroski Fundazioaren zuzendaria Alejandro Martínez Berriochoaren arabera.

Elorrioko Udala izango da laguntzak bideratzeko arduraduna, objektibotasuna eta ez diskriminazioaren premisen pean. Horretarako, Galartzauria kalean duen 40 metro karratuko lokal bat jarri du elikagaien banaketa bertan egiteko eta aurrekontuetan diru-izendapena egiteko konpromisoa ere hartu du.

“Eroski Fundazioaren eta Udalaren borondatea alferrikoak izango ziren Kainaberak egiten duen guztia barik. Honen beharra proiektu honetan azpimarratzekoa da, beraiek banatzen baitute laguntza benetan behar dutenen artean”, Idoia Buruaga Elorrioko alkatearen esanetan.

La entrada Eroski Fundazioak sei mila euro emango ditu Elorrioko Elikagaien Banaketa Programarako se publicó primero en durangon.com.

Ezkerretik eskumara, Txus Arrieta, Gizarte arloko zinegotzia; Alejandro Martinez Berriochoa, Eroski Fundazioko zuzendaria; Idoia Buruaga, Elorrioko alkatea, eta Juan Mari Lersundi, Kainabera GKEko presidentea. (Argazkia: Eroski Fundazioa)

Elorrioko Udalak, Eroski Fundazioak eta Kainabera kooperaziorako eta elkartasunerako elkarteak Elikagaien Bankuaren Programan laguntzeko hitzarmena sinatu dute laugarren urtez. Ekimen honekin herriko zenbait familiak pairatzen dituzten zailtasunak arintzen lagundu nahi dute, hilero janari lote bat emanda.

Programa honen bitartez Bizkaiko Elikagaien Bankuak eta Europar Batasunak laguntza ematen ari dira Elorrioko familia behartsuei. Janarien eta produktuen erosketarekin eta banaketarekin Kainabera elkartea arduratzen da eta eginkizun horretarako Udalak utzitako lokala erabiltzen du.

Lankidetza hitzarmen horren bidez 6.000 euro jartzen ditu Eroski Fundazioak eta diru kopuru hori Bizkaiko Elikagaien Bankutik herrira iristen ez diren janariak eta produktuak eskuratzeko bideratuko da.

“Eroski Fundazioaren borondate ona eta Udalarena ezereza litzateke Kainaberak egiten duen lan handia egingo ez balu”, Idoia Buruaga Elorrioko alkatearen esanetan. Gobernuz Kanpoko Erakundeak “zeregin garrantzitsua betetzen du; izan ere, haiek helarazten diete laguntza egiaz behar dutenei”, azpimarratu du alkateak.

Bere egoitza San Agustin Etxebarrian duen kooperatibaren helburuetariko bat  “elkartasuna erakustea” dela adierazi du Eroski Fundazioko zuzendaria den Alejandro Martínez Berriochoak. Zeregin horretan “gizarteko hainbat erakunde, elkarte eta GKErekin batera, laguntza handia ematen diete gure ingurunean premiarik handiena dutenei”, gehitu du.

Kainabera elkarteko presidenteak, Juan Mari Lersundik, eskerrak eman die Eroskiri eta Elorrioko Udalari “eman duten babesagatik”, beraiei esker “erosi eta banatuko ditugu behar diren janariak, krisiak udalerrian eragin dituen gorabeherak arintzeko”.

La entrada Egoera zailean dauden familiak laguntzeko hitzarmena berritu dute Udalak, Eroskik eta Kainaberak se publicó primero en durangon.com.