Etazer taldearen agur kontzertua Berrizko gaztetxea sortu zen urtean, 1999an.

Berrizko ‘Hiltegixe’ gaztetxearen 20. urteurrena ospatzeko prestatu dituzten ekintzei gaur emango diete hasiera eta, lau eguneko egitaraua osatuz, otsailaren 22ra arte, barikua, luzatuko dira. Izan ere, gaurko egunez, 1999ko otsailaren 13an sortu zen gaztetxea.

Gaur arratsaldeko 19:00etan txokolate beroarekin hasiko da urteurrenaren ospakizuna eta barikuan izango du jarraipena. 18:30etan kafe tertulia antolatu dute gaztetxeak 1999tik 2019ra arte izan duen ibilbidea mintzagai hartuta. Horren ondoren, 21:00etatik 22:30etara bokadiloak eta sangria afaltzeko aukera egongo da, Jam Session Akustikoa hasten den arte.

20. urteurreneko kamisetak salgai egongo dira gaztetxeko barran eta zapatuan, 15:00etan ospatuko den bazkari herrikoira berauek jantzita joateko gonbita egin dute antolatzaileek. Bazkarira joateko tiketak Fonda eta Guzur tabernetan egongo dira salgai 8 euro (ikasle eta langabetuak) eta 10 euroren truke.

Musika ugari

Bazkariaren ondoren ez da musikarik faltako, izan ere, 18:30etan poteo musikatua egingo dute Berrizko tabernetan zehar eta 22:00etan kontzertuen txanda izango da Kutre Band, Etsipen eta Los Moths taldeekin eta DJ Huicirekin, lehen biak herrikoak. Gauerdian ordu alaia izango dute eta goizeko 7:00etan mozkorren argazkia aterako dute.

Egitarauaren azken egunean, otsailaren 22an, kontzertu gehiagorekin gozatu ahal izango dute Berrizko gaztetxera urreratzen direnak. Gaueko 22:30etan hasita, The North, Zain, Hyssopus eta Etazer talde Berriztarrek eskainiko dituzte kontzertuak. Azken honek, 1999an, gaztetxea sortu zen urtean, eman zuen bere azken kontzertua eta Hyssopusek 2009an, gaztetxearen 10. urteurrenean; baina 20. urteurrena ospatzeko berriz elkartuko dira oholtza gainean. Kontzertu hauekin, “generazio aldaketa” islatu nahi izan dute ‘Hiltegixe’ gaztetxekoek, izan ere, The North taldeko gitarra-jolea, Etazer taldeko baxu-jolearen semea da.

La entrada Lau egunez ospatuko dute Berrizko gaztetxearen 20. urteurrena se publicó primero en durangon.com.