Mahasti Artean Durangaldera iritsiko da asteburu honetan

Amorebieta-Etxano Mahasti Artean ekimenaren zazpigarren edizioko egoitzetako bat izango da. Irailaren 11tik 13ra bitartean, kulturarekin, gastronomiarekin, naturarekin eta Bizkaiko txakolinarekin lotutako hainbat proposamen eramango ditu ekimenak Durangaldera.

Bizkaiko Txakolina JDBk eta Urkiola Landa Garapenerako Elkarteak antolatuta, jaialdia aurten Durangaldera iritsiko da, aurreko edizioetan Bakio, Urdaibai, Txorierri, Enkarterri eta Gorbeialdea zeharkatu ondoren. Egitaraua Amorebieta-Etxanoko, Elorrioko eta Durangoko hainbat gunetan garatuko da.

Amorebieta-Etxanoren kasuan, Etxanojauregi mahastiak edizio honetako lau esperientzietatik bi hartuko ditu.

Lehenengo hitzordua irailaren 11n, ostirala, izango da, 19:30etik 21:30era, Mahasti Komedia ekimenarekin. María Cruickshankek bakarrizketa eskainiko du eta, eguneroko egoeretatik abiatuta eta umorearen bidez, gizarte-ohiturei, emakumeek jasotzen duten tratuari eta gizarteak ezarritako presioei buruzko gaiak landuko ditu. Esperientzia osatzeko, Bizkaiko lau txakolin, Idiazabal gazta eta Etxerriagako taloa dastatuko dira.

Hurrengo egunean Etxanojauregi berriro ere topagune bihurtuko da. Irailaren 12an, larunbata, 18:30etik 22:00etara, Mahasti Musika egingo da, ilunabarrean zuzeneko musika eta txakolina uztartuko dituen proposamena. Oholtzan Aiora & Piti, Zea Mayseko kideak, eta Arima Soul arituko dira. Sarrerak Bizkaiko lau txakolin, Etxerriagako taloa eta Idiazabal gazta dastatzeko aukera ere jasoko du.

Durangaldea ezagutzeko asteburua

Egitaraua eskualdeko beste bi esperientziarekin osatuko da. Larunbat goizean, Mahasti Yoga egingo da Elorrioko Solatsu Tellerian, IZAKI Yogako Miren Mentxakaren eskutik. Saioarekin batera, espazioa bisitatzeko aukera eta proposamen gastronomiko bat eskainiko dira.

Igandean, hilaren 13an, Mahasti Gourmet – Durangoko Zaporeak eta Historia izango da txanda. Durangon zehar egingo den ibilaldi gidatu batekin hasiko da eta Durangoko Azokan amaituko da, txakolin dastaketa eta gertuko gastronomia-proposamenekin.

Mahasti Artean uda amaierarekin eta mahats-bilketaren hasierarekin batera ospatzen da, eta Bizkaiko hainbat txoko ezagutzeko aukera eskaintzen du bertako mahastien, ondarearen, gastronomiaren eta paisaiaren bidez. Zazpigarren edizio honetan, Amorebieta-Etxanok eta Etxanoko inguruak protagonismo berezia izango dute, txakolinaren kultura publiko berriei hurbiltzea eta, aldi berean, Durangaldeko gune bereziak balioan jartzea helburu duen egitarauaren barruan.

Sarrerak eta jarduerei buruzko informazio guztia Bizkaiko Txakolinaren webgunean daude eskuragarri.