Berrizko Udalak euskaraz irakurtzeko ohitura sustatzeko talde berriak antolatu ditu

Berrizko Udalak 2026-2027 ikasturterako irakurle talde berriak antolatu ditu, irakurketaz gozatu, hausnartu eta irakurritakoa partekatzeko aukera eskaintzeko. Aurten, helduentzako bi irakurle talde eta familientzako irakurketa-saioak egongo dira.

Helduentzako irakurle taldeen artean, Txiri-txiri eta Miszelanea izango dira aukeran. Txiri-txiri taldea euskaraz irakurtzeko ohitura handirik ez duten edo euskaraz irakurtzea zaila egiten zaien pertsonei zuzenduta dago. Taldean, euskaraz irakurtzeko ohitura lantzeko aukera izango dute parte-hartzaileek.

Txiri-txiri saioak urriaren 8an hasiko dira eta hilean behin egingo dira maiatzera arte, 17:30etik 19:00etara.

Bestalde, Miszelanea irakurle taldean hainbat generotako lanak landuko dira: nobelak, ipuinak, saiakerak, poesia eta komikiak, besteak beste. Taldearen lehen saioa urriaren 22an izango da, eta saioak maiatzera arte egingo dira, 18:00etatik 19:30era.

Bi taldeak Berrizko Nagusien Zentroan egingo dira. Horrez gain, urtarrilaren 21ean eta maiatzaren 13an bi taldeetako parte-hartzaileak elkartuko dituzten kafe-tertuliak egingo dira, Oihana Arana eta Miren Agur Meabe idazleekin.

Irailaren 27ra arte

Horrez gain, Kontulekuak programak familian irakurtzeko aukera eskainiko du. Guraso eta haurrei zuzendutako irakurketa-saioak izango dira, 3 eta 5 urte bitarteko eta 6 eta 8 urte bitarteko haurrentzat. Saioak Berrizko Kultur Etxean egingo dira.

​Irakurketak euskaraz izango dira, eta ikasturtean zehar hainbat saiotan banatuko dira. Interesa duten pertsonek irailaren 27ra arte eman ahal izango dute izena. Izen-ematea kartelean aurki daitezkeen QR kodeen bidez egin ahal izango da, baita liburutegian bertan ere.