Eider Eibarrek eta Iskander Sagarminagak Kokolulu erronka gainditu dute Hawaiin

Iskander Sagarminaga igerilariak eta Eider Eibar ilustratzaile zornotzarrak Kokolulu abenturako erronka nagusia lortu dute Hawaiin. Aurreko asteazkenean, 6an, goizeko 01:30ean hasi zuen Iskanderrek Ka‘iwi kanala zeharkatzeko saiakera, Eider bidelagun zuela txalupan, eta 19 orduren ostean amaitu du 42 kilometroko itsas-zeharkaldi gogorra. Gainera, haize bortitzengatik kontrako norabidean egin behar izan dute zeharkaldia, hau da, O’ahutik Moloka’ira.

Hasierako aurreikuspena 15 ordutan helmugara iristea bazen ere, itsas korronteek egoera asko zaildu dute, eta Iskanderrek denbora luzez korrontearen aurka egin behar izan du igerian. Horrek erronka are gogorrago egin du, munduko itsas-zeharkaldi zailenetako batean.

Ka‘iwi kanala Ozeano Barean dago, Hawaiiko uharteen artean, eta olatu handiak, korronte indartsuak eta itsas-baldintza aldakorrak ditu ezaugarri. Gainera, marrazoak eta marmoka pozoitsuak egoten dira. “Gogorra baino gogorragoa izan da, baina bueno, badaukat Moloka’i eginda”, aitortu du igerilariak, erronka betetzeak eragindako poza ezkutatu ezinik.

Kokoak unibertsoa

Erronka osoaren berri @kokoakgara Instagrameko kontutik eman dute. Eider Eibarrek berak azaldu duenez, erronka ez da soilik kirol balentria bat. Hawaiin egindako egonaldian, gainera, koko misteriotsuen bila ere aritu dira, Kokoak unibertsoaren barruko kontakizuna osatzeko. Kokolulu proiektuaren abentura osoa sare sozialen eta kokoak.eus atariaren bidez kontatzen ari dira, ilustrazioa, ikus-entzunezkoak eta narrazioa uztartuz.

Lortutako zeharkaldia beste mugarri handi bat da Zazpi Itsasoak (Oceans Seven) nazioarteko erronkan. Aurretik Mantxako kanala, Manhattaneko bira, Santa Katalina kanala eta Ipar Kanala gainditu dituzte, eta Hawaiikoa laugarren urratsa izan da erronka ospetsua osatzeko bidean.