Sorginola Gaztetxeak kontzertu birtuala iragarri du gaur iluntzerako

Durangoko Sorginola Gaztetxeko kideek hainbat ekitaldi prestatzen ari dira Covid-19ak eragindako konfinamendua arintzeko asmoarekin, tarteko gaur iluntzean eskainiko den kontzertu birtuala. Gainera, Kukutxa III kantarekin bideo muntaketa egiteko grabaketa kolektiboa ere egiten ari dira.

Gaur iluntzerako iragarritako minikontzertua 20:15ak aldera hasiko da eta ekitaldian parte hartuko duten Parkatu eta DUBE taldeek Sorginolan kontzertua ematekotan ziren pasa den astean. Baina koronabirusarengatik agindutako konfinamendua dela eta, agerraldia bertan behera geratu zen.

Nahiz eta talde biak entzuteko aukera berri bat egongo den aurrerago, Sorginolakoek agerraldia prestatu dute gaurko. Gainera, hasieran jo behar zuten Parkatu eta DUBE taldeekin batera, BPP ere arituko da gaztetxeko sare sozialen bidez ikusgai egongo den saioan.

Egunotan Tabirako gaztetxea itxita badago ere, espazio horren erabiltzaileek euren jarduerari eusten diote sare sozialen bidez. Egunotan egiten ari diren beste ekitaldi bat ‘Kukutza III’ abestiaren grabaketarekin egingo den bideo kolektibo erraldoia da.

Ekimenean parte hartzeko, abestiaren letra hartu eta musika aurikularretatik entzuten den une berean, abestu, dantzatu, musika tresnaren bat jo edo bestelako zerbait eginez, bideoan grabatu eta 630080220 telefonora bidali behar da. Ondoren, muntaia erraldoia egingo dute.

Bestalde, 2015eko ekainean okupatutako ekintzaren inguruko inkesta-lehiaketa ere prestatu dute ‘Zer dakizu Sorginolaren inguruan?’ goiburuarekin. Parte hartzaileek galdera erraza erantzun behar dute; hain zuzen, urte horretako Gazte Egunean, izena erabakitzeko bozketan jarritako  bost proposamenak zeintzuk izan ziren.

Gainera, Sorginolako kideek gaztetxearen jardueraren inguruko asanblada birtualak egiten jarraitzen dute.