Sexualitate-tailerra ekainera arte luzatuko dute

Abadiñoko Udalak antolatutako sexualitate-tailerrak harrera ona izan du, hori dela eta abenduan bukatzeko zen ikastaroa, ekainera arte luzatzea erabaki dute.  Herriko hogeita bi neska ari dira parte hartzen tailerrean. Sexualitateari buruzko kezkak agertu eta ideiak partekatzea du helburu ikastaroak.

Joan den urrian hasi zen ikastaroa, eta hasieran abendura arte luzatuko zen, baina parte hartzaileen aldetik harrera ona izan duenez, ekainera arte luzatuko du Udalak. Hori dela eta matrikulatzeko epea berriz ireki dute, Argi Abad, Berdintasuneko zinegotziak prentsa ohar baten bidez azaldu duenez.

Sexuari buruz askatasunez hitz egiteko aukera ematen die parte hartzaileei, “Oro har, sexuari buruz mito asko eta aurrez finkatutako ideia asko daude, eta komeni da horiek argitzea etorkizunean arazorik ez eragiteko” . Ikastaroa Noelia txarro psikopedagoga eta terapeuta sexualak zuzentzen du.

Neska zein mutilei zuzendua egon arren, parte hartzaile denak neskak izan dira orain arte. “Oso aberasgarria izango litzateke mutil talde bat osatu ahal izatea. Orain arte izena ematera animatu ez diren arren, badakigu haiek ere gai horri buruzko zalantza eta kezka asko dituztela”, nabarmendu du Argi Abadek.

Errota kultur etxean ematen da ikastaroa, ostiralero, 18.00etatik 21.00etara. Izena eman nahi duenak Udaletxeko Berdintasun sailera joan beharko du, telefonoz edo posta elektronikoz (berdintasuna@abadiano.org). Ikastaro honetan parte hartzen duten unibertsitateko ikasleei EHUk aukera askeko kredituak emango dizkie.