Zein da zure super-boterea? Euskerea da nirea

Elastiko batean ikusi neban esaldi hori eta
buruan geratu jatan betiko itsatsita. Ez ete da
super-boterea era guztietako zapalketak,
debekuak, ardurabakokeriak eta mesprezuak
sufridu dituen hizkuntza zaharra hitz egitea?
Zuk be super-botere hori dozula? Biba zu!
zenbat eta gehiago hobe.

Lortzeko prozesuan zagozala? Animo!
 Euskaldun guztiak gagoz zure ondoan.
Ez dozula oraindik eskuratu? Seguruenik ez
dozu zutabe hau irakurriko. Baina… batek
daki. Izan lei lagun edo senideren batek
irakurtzea. Gurako zeunke zuk be super-
botereduna izan? Ba, ez da horren
gatxa…aurtengo korrikaren lema gogoan…
egin zaitez EUSKAHALDUN!!

Barikua eta 13, zorte txarreko eguna. Ez
ete zan “martes y trece ni te cases ni te
embarques”? Bardin da, zoria ona zein
txarra edozein momentutan agertu ahal
dalako. Dana dala, gaurkoa zein egun dan
esan deust lanerako bidean Korrikaren
pegatina eskaini deusten neskak.

Hasi da 19. Korrika eta burura etorri jat
orain dala mila milioi urte (pleistozenoan edo)
koadrilan goizaldeko ordu txikietan urten
ginala Korrika Zornotzatik pasatzean
agurtzeko. Txanpon batzuk eskaini deutsadaz
trukean,  euskaldun bakotxak bere
ahalegina egin ezik nire diru eskas horreekaz
gauza gitxi egin daitekeala jakinik.

Bardin gertatzen da hizkuntzagaz.
Euskaldun guzti-guztien ahalegina behar dogu
euskereak aurrera egin dagian. Barriro esan
beharko dogu babesteagaz eta alde egoteagaz
gauza gitxi lortuko doguzala, hizkuntza batek
hiztun aktiboak behar dituala. Behar
beharrezko dogu militantzia eredugarria. Guk
euskaraz, zuk zergatik ez kantagaz esaten
genduan mezua. Gogoratzen? Eta, Bai
Euskarari? Oskorriren Euskal Herrian euskaraz?
Eta… euskara ez da galduko ez dakitenek
ikasten ez dutelako, baizik eta dakitenek hitz
egiten ez dutelako esaldia?.

Eta, euskaldun dinot, ez euskaldun barri,
zahar, garbizale, alternatibo, trakets, landu…
edo antzekorik erabili barik. Euskaraz hitz
egiten badozu, euskalduna zara, bardin da lau,
hamalau, berrogeta lau edo berrehun eta
berrogeta lau berba ezagutzen badozuz.
Dakizuzanak erabiltzen dozuzala? Ba hori!
Pentsatu dozu nora helduko zaran egunean bat
gehiago ikasten eta erabiltzen badozu?
Badogu?

Aldarrikapen apal hau egin gura izan dot
gaur Durangonek eskaintzen deusten txoko
honetan, euskarak euskaldun eta euskahaldun
egingo gaituela argi eta ozen esateko. Nire
berba honeekaz ezertan lagundu ahal badot…

Karmele Aurtenetxe Elorriaga kazetaria da