Depilatzearen sufrikarioa

Nork erabaki ote zuen emakumeok gorputzean dugun ilea itsusia eta desegokia dela? Ez dakigu nork, noiz eta zergatik hartu zuen erabaki hori, baina emakumeok jaiotzean jasotzen dugun herentzia sozialaren zati bat dela esango nuke. Emakume gehienok barneraturik daukagun sufrikario galanta.

Izan ere, itxuroso egoteko besoetan, hanketan, besazpietan edota bibotean dugun biloa kendu egin behar izaten du askok. Eta idatzi gabeko lege aldrebesa betetzeko,  naturaren aurkakoa den legea, kristonak egin eta sekulakoak pasatzen ditugu sarritan.

Gainera, orain artekoa gutxi balitz, gaur egun pubiseko depilazioa jarri da modan. Osoa, brasildarra, laser bidezkoa, argizariz egindakoa…hainbat aukera eskaintzen dira sufrikarioa areagotuz. Moda honek sufrikarioaz gain, dirua ere eskatzen du. Hau da, gizarte kapitalistak emakumeoi ezartzen digun beste zerga bat. Gainera badirudi gero eta ohikoagoak direla depilazioaren ondorioz jaso daitezkeen gaixotasunak, baina hortxe dihardu ohitura berriak.

Behin baino gehiagotan depilazioa egiteko arrazoi higienikoak eman izan dira. Zenbait autorek ordea, kultura usadio eta estetika hutsa dela defendatu dute. Esate baterako emakume musulmanek depilatzeari buruzko arau gogorrak dituzte. Zenbait herrialdetan bekainak depilatzea debekatuta daukate, pubisa eta besapeak aldiz, depilatu beharra dute, araudiak horrela agintzen dielako. Leku batzuetan,  besterik ezean, azukrearekin depilatzen dira.

Gurean ez dugu araudi idatzirik baina, zein da gure hautua? Nola joango gara igerilekura? Hondartzara? Ospitalera? Zitara? Depilatu barik, erdi depilatuta ala guztiz depilatuta?

Behin Amalia Barquin irakasleari honako hau irakurri nion: “Gure ile sozial eta politikoak paseatzera atera ditzagun: lagunak, uda badator, bildu gaitezen eta goazen depilatu gabe gure maukarik gabeko elastiko, soineko, gona, short, praka piratekin terraza batera te berde bat (edo whatever you want) hartzera.

Arraio! Ze ekintza sinple eta subertsiboa izan daitekeen! Egingo nuke herritar batzuentzat askoz asaldagarriagoa izan daitekeela hori drag queen edo king koadrila batekin topo egitea baino. Nor animatzen da?” http://abarquin.wordpress.com/tag/depilazioa/

Gure esku dago sufrikarioa jasan, dirua horretan eman eta ondo depilatuta joatea, edota, ekintza subertsiboan parte hartu eta gure ileak paseatzera ateratzea.

Marisa Barrena psikopedagogoa da