Norabide berriak jorratzen

Gogoetaren Plaza lehenengoz ireki zen atzo goizean Durangoko azokan eta gogo honez hartu zuten ekimena Landakora  gerturatu ziren bisitariek eta profesionalek. ‘Nola kanta, hizkuntzaren hautua’ gaia landu zen ekimen berritzailearen lehen bi hitzorduetan, lepo bete zen aretoa, eta egitasmoari jarraipena ematen bazaio datozen edizioetan, antolatzaileek espazio hori handitzea pentsatu beharko lukete.

Publiko desberdina izan bazen Fermin Muguruzari egindako elkarrizketan eta Anari Alberdi eta Bernardo Atxagaren arteko solasaldian, biak Iñigo Astiz kazetariak zuzenduak, biak ala biak oso interesgarriak izan ziren bertan bildutako ikuslegoarentzat. Muguruzak eta Atxagak aitortu egin zuten euskararen aldeko hautua gaztelaniaz hasi ondoren egin zutela, eta Anarik berriz, kantagintzan emandako lehen urratsak ingelesez egin zituela esan zuen.

Azokako gune gehienak gainezka egotea, espero zitekeen. Ehunka bisitarik egin zuen Durangora gerturatzearen alde eta, behin bertan egonda eta kontuan izanda eguraldi ezin txarragoa zela, non hobe Landakon edo gainontzeko guneen eskaintzen zuten aterpeetan baino.

Atzo bertaratu ziren sortzaileek ederto berotu zituzten eskuak liburuak, diskoak eta abarreko materiala sinatzen. Eurek eta argitaletxeetako langileek lan ederra izan zuten Azokara eramandako materiala saltzen.

Goizegi bada inolako baloraziorik egiteko, pozik ziren Pamielan Bernardo Atxagaren ‘Txoriak kolpeka’ liburuak izan zuen harrerarekin, Ereinen Jon Arretxeren ‘Beti iparralderantz’ekin eta haur eta gazte literatura postetan ere, bertara gerturatzen ziren askok poltsak alde egiten zuen eta. Musikari dagokionez, oso harrera ona izan zuten  Berri Txarrak nafarren ‘Denbora da poligrafo bakarra’, Fermin Muguruzaren ‘Black is beltza’, Gatiburen ‘Euritan dantzan’, Goseren ‘Gosariak’ eta Ruper Ordorikaren ‘Lurrean etzanda’ bildumek.