Lau jaiegun antolatu dituzte Dudeako San Miguelak ospatzeko

Zornotzako Dudeako San Miguel auzoak inguruari izena ematen dion patroiaren jaiak ospatuko ditu gaurtik domekara bitartean. Auzokideek egitarau zabala prestatu dute, musika, dantza eta hainbat txapelketekin.

Eguerdiko hamabietako kanpai-hotsekin eta txapliguekin emango diote hasiera jaiei gaur bertan. Ondoren, auzoko hildakoen aldeko meza ospatuko da eta jarraian bazkaria izango dute bertoko nagusiek Kanbio jatetxearen eskutik. Arratsaldean triki-pintxo-poteoa eta Zornotzako ikasleen abesbatzaren ekitaldia izango dira.

Biharko ospakizunak hamabietan hasiko dituzte txosnen irekierarekin. Arratsalderako hiru txapelketa antolatu dira; 20.00etan tortillena, 20.30etan mus azkarrarena eta 22.30etan banakako bolo txapelketaren txanda izango da. Gainera, gaueko hamarretatik aurrera Dj-Bull-ek girotutako dantzaldia egongo da.

Mozorro eguna ospatuko dute zapatuan eta eguneko lehen ekitaldia goizeko 9.30etatik aurrera Padelanden ospatuko den padel txapelketa izango da. Hamarretan auzoko ermitetatik egingo den ibilaldia abiatuko da, eguerdian puzgarriak egongo dira eta 13.00etan igel txapelketa hasiko da. Arratsaldean Xaiborren musika ekitaldia eta binakako briska txapelketa egongo dira.

Zapatuko egitaraua Kanbio jatetxean egongo den afari herrikoiarekin jarraituko du eta bertan parte hartzeko tabernan bertan saltzen diren tiketak erosi behar dira. Gaueko 22.30ean dantzaldia egongo da ‘Titau’ taldearen eskutik eta saio horren atsedenaldian mozorro onena sarituko dute.

Domekan ospatuko den azken jai eguna eguerdiko 12.00etan emango den meza nagusiarekin, padel txapelketaren finalarekin eta animalien erakustaldiarekin hasiko da. 17.00etarako bingoa antolatu dute eta jaiei amaiera emateko parrillada, txokolatada eta zestaren zozketa izango da zazpietatik aurrera. Txapliguekin emango zaie amaiera aurtengo San Migueleko jaiei, 20.30etan.