Kantatzeko eta dantzatzeko gonbitea egin dute biharko Ibilaldiko antolatzaileek

Datorren maiatzaren 29an ospatuko den Ibilaldia gerturatzen ari dela eta, musikaz eta dantzaz osatutako jaialdia prestatu duzte biharko Durangon. Antolatutako ekitaldiak herrian zehar egingo dira, bost gune desberdinetan hain zuzen, goizeko 11.00etan hasita.

‘Jalgi, dantzatu eta kantatu Dagidun!’ gonbitarekin, bost gunetan zehar egingo den ibilaldian eta bertan eskainiko diren ekitaldietan parte hartzeko proposamena luzatzen dute antolatzaileek. Gune batetik bestera dagoen tartea Tabira Musika Bandak lagundutako kalejiran egingo da.

Goizeko 11.00etan izango da lehenengo hitzordua Plateruena Kafe Antzokian eta bertan Durangoko Orfeoia, Doinuzahar eta Bogoroditsie abesbatzen saio egongo da. Hasierako ekitaldi hori amaitu ondoren, Ezkurdi plazan kokatutako bigarren gunean egingo da bigarren geldialdia eta bertan Bartolome Ertzilla Musika Eskolako Korda taldearen entzunaldia eskainiko da.

Eguneko hirugarren gunea Andra Mari inguruan kokatuko da eta gune horretan ‘Eirband’ taldearen agerraldia hasiko da. Ondoren, Udaletxe aurrealderako bidea hartuko dute partaideek, bertan dagoen plazan jarritako laugarren gunean joko baitute Bartolome Ertzilla Musika Eskolako Flauta taldea eta Saxo laukotea.

Azken gunea Santa Ana plazan jarriko da eta bertara gerturatutakoek Ibilaldia 2016ko kanta abestu eta dantzatzeko aukera izango dute, bertaratutako guztien artean L´Atelier Dantza eta Antzerki Eskolak prestatutako koreografia erraldoia eginez.

Eguraldi txarra eginez gero, ekitaldi guztiak Andra Mariko elizpean egingo dira.