Iurretako Udalak 10.000 euro banatuko ditu familietako hezkuntza-gastuak ordaintzeko

Iurretako Udalak 2021-2022 ikasturtean haurtzaindegitik DBHko 4. mailara bitarte eskolatutako familientzako dirulaguntzak eskatzeko epea ireki du eta eskariak uztailaren 11ra arte egin daitezke. Egitasmo horretarako 10.000 euroko diru-atala ezarri da.

Diru-laguntzak, “ikasturteko hezkuntzak eragindako gastuei aurre egiteko, eta, horrela, hezkuntza-curriculuma errazago eskuratzeko” helburua  du, araudian azaltzen denez.

Horregatik, familia-unitate osoa Iurretako udalerrian erroldatuta egon behar da, eskolatutako seme-alabak edo ardurapekoak adingabeak izan behar dira eta zerga-betebeharrak, ogasunarekikoak, Gizarte Segurantzarekikoak eta udal-ogasunarekikoak egunean izan behar dira.

Diru-laguntzak 45 eta 150 euro bitartekoak izango dira eta banatzeko orduan kontuan hartuko dira familia-unitatearen errenta, seme-alaben edo ardurapeko adingabeen ikasketa-maila edo kide-kopurua. Hala ere, eskabide kopurua aurrekontuetan dagoen dirua baino handiagoa bada, onartutako eskarien artean hainbanatuko da.

Diru-laguntza lehen aldiz eskatzen dutenek, behar bezala betetako eskabidea aurkeztu beharko dute, baita elkarreragingarriak ez diren agiriak ere.

Familia-unitate bakoitzeko eskaera bakarra tramitatu ahal izango da eta eskabidea behar bezala beteta aurkeztu behar da egoitza elektronikan edo Bidebarrieta kaleko 5ean dagoen HAZ-Herritarrendako Arreta Zerbitzuan. Informazio eta eskabide eredua HAZen zein Udalaren web orrian (www.iurreta.eus) daude eskuragarri.