ITG taldeak inkestak egingo ditu durangarrek erosketetan dituzten hizkuntza ohiturak jakiteko

ITG taldeak, hau da, ‘Salerosketak be euskeraz’ kanpaina garatzen duen erakundeak, inkestak egingo ditu uztailean zehar durangarrek erosketak egiterakoan dituzten hizkuntza ohiturak jakiteko. Galdeketari erantzuten diotenen artean iPada zozkatuko da.

Uztailaren 1etik 31ra bitartean egingo diren inkesten ardatza “Erosketak ze hizkuntzatan egiten dozuz?” izango da. Galdetegian jasotako erantzunen bitartez, “Durangoko euskeraren erabileraren errealitate mapa” gauzatu nahi dute ekimenaren arduradunek.

Galdetegia dozena bete galderez osatuta dago eta parte hartzaileen datu orokorrak eta erosketa ohiturei buruzkoez gain, “Salerosketak euskeraz egiteko aukera izatea eskertzen dozu?” edo “Gaur egun salerosketak euskeraz egiteko aukerak ze asebetasun maila sortzen deutsu” bezalako galderei erantzun behar da. Partaide guztien artean iPad bat zozkatuko da.

Formularioa erantzutea nahi duenak helbide honetan edo Facebooken du galdetegia.

Honako hau, ITG taldeak durangarrek salerosketetan dituzten ohiturak jakiteko egiten duen bigarrena izango da. Lehena 2013ko azaroan egin zen eta orduan merkatarien hizkuntza ohiturak aztertu ziren.

Uztaileko iPada

Bestalde, ‘Salerosketak be euskeraz’ kanpainaren hogeita hirugarren iPad elektronikoa zozkatu zen uztailaren 1ean eta zenbaki saritua Saltsanen banatutako 493.251 izan zen.

Ordezko zenbakia berriz, Naturalki dendan banatutako 477.325 txartelari egokitu zitzaion.

ITG taldeak bultzatutako ‘Salerosketak be euskeraz’ kanpainaren helburua Durangoko merkataritzan euskararen erabilera bultzatzea da.