Ikasleek goizean egingo duten kalejirarekin hasiko dira bihar Berrizko inauteriak

Eskola umeak eta herriko koadrilak izango dira protagonista nagusiak Berrizen bihar eta etzi ospatuko diren Inauterietan. Bihar, kalejira eta diskofesta izango dute gaztetxoek eta zapatuan koadrilen topaketa eta kalejira eta afari herrikoia egongo dira.

Biharko egitaraua goizeko 10:30ean abiatuko den haurreskolako ikasleen kalejirarekin hasiko da. Ordu erdi geroago, herriko ikasleen mozorro kalejira hasiko da eta jarraian ekitaldia egongo da Berrizburu kiroldegian.

Eguerdiko 12:00etatik 13:30era bitartean trena ibiliko da Olakuetatik Elizondoraino eta 16:30etik 19:30era bitartean Elizondotik Olakuetarako bidea egingo du. 18:30ean musikaz eta bestelako ekitaldiekin osatutako Euskal Diskofesta hasiko da frontoian eta ondoren, txokolate dastaketa egongo da.

Zapatuko ekitaldiak arratsaldeko 18:30ean hasiko dira, koadrilak kiroldegi aurreko plazan egingo duten topaketarekin. Ondoren, kalejira egingo dute Olakueta plazaraino Triki Pandero Scottish Band taldearen laguntzarekin.

Gaueko 21:00etan mozorrodunen afari herrikoia egingo da frontoian eta ondoren Dj  Robertek girotutako erromeria egongo da. Gauerdiko mozorro lehiaketako sari banaketan, 250 euro eskuratuko ditue nagusien koadrila onenak eta hamasei urte beherako gaztetxoen koadrilak berriz, 100 euro jasoko ditu.