Herriko 20 andrei buruzko bideoa eta arineketan egiteko ekimena prestatu dituzte

Ezohiko ekitaldiekin ospatuko dute Iurretan aurten Martxoaren 8ko Emakumeen Nazioarteko Eguna. Udalak eta Anderebide elkarteak prestatutako egitarauan herriko 20 emakume protagonista dituen bideoaren estreinaldia eta kirola eta arineketan egiteko ‘Gu be bai runners’ ekimena tartekatzen dira.

Ekitaldiak bihar, martxoak 6, hasiko dira arratsaldeko zazpietan Ibarretxe Kultur Etxean. Martxoaren 8ari buruzko adierazpen instituzionala irakurri ondoren, ‘Hogei emakume historia bat’ dokumentalaren estreinaldia gauzatuko da.

Ikus-entzunezko horretan Iurretako 20 emakumek herriko historian izandako papera jartzen du agerian. Dokumentalean 20 andre azaltzen diren 20 andrek, besteak beste, politikariak, kirolariak, etxeko-andreak, baserritarrak eta musikariak dira.
44 minutuko pelikula horretan “historia desberdinak bizi izan dituzten emakumeak euren ibilbidea eta bizipenak azaltzen dituzte”, Gizarte-ongizatea saileko Amaia Legorburuk azaldu zuenez.

Larunbatean, 2009tik herriko emakumeak urtero egiten duten afaria egingo dute aurten ere. Goiurian izango da afaria eta bertara joateko doako autobusak izango dira. Afalostea Dj batek girotuko du.

‘Gu be bai runners’

Igande eguerdian burutuko den ‘Gu be bai runners’ ekimen berritzailearen lehen saioarekin osotuko dira Martxoaren 8ko ospakizunak. Iraia Garcia atleta zornotzarrak bultzatutako ekimen horren lehen hitzordura familia osoarentzat prestatuta dago.

Berdintasuna aldarrikatzeaz gain kirola egitera, eta ondorioz bizi kalitatea hobetzeko xede duen ekimen horretara gerturatzen diren guztiak, F.J. Askondo kaletik abiatu eta herriko kaleak zeharkatuko dituen ibilbidea burutuko dute. Prestatutako zirkuituari lehen itzulia oinez eman ondoren, ondorengoak korrika edo bere erritmora emateko aukera izango da.

‘Gu be bai runners’ ekimenak jarraipena izango du astean birritan eta bertan parte hartzeko izen-ematea igandean bertan irekiko da. Emakumeak korrika egitera bultzatu nahi dituen ekimen horrek hiru maila izango baditu ere, denek dute oinarri berbera: 40 minutuko ariketa fisikoa eta 20 minutuko luzamenduak.